ខេត្តព្រះសីហនុ ៖ ក្រោយពេលដែលសារព័ត៌មានកោះសន្តិភាពបានចេញផ្សាយកាលពីថ្ងៃទី៣០ កញ្ញា ២០១៥ នៅក្នុងលេខផ្សាយ៨៥៩៨ ដែលមានចំណងជើងអត្ថបទថា «ក្រុងមាត់សមុទ្រកំពុងរីកដុះដាលសំណង់ទាំងមានច្បាប់ និងរំលោភច្បាប់» រួចមក នៅក្នុងខ្លឹមសារអត្ថបទបានផ្តោតសំខាន់ទៅលើសំណង់រំលោភច្បាប់មួយកន្លែង អតីតៈយីហោចម្រើនផល ដែលមានទីតាំងស្ថិតនៅតាមបណ្តោយវិថីឯករាជ្យក្បែរស្ថានីយប្រេងឥន្ធនៈកាលតិច ស្ថិតក្នុងសង្កាត់២ ក្រុងព្រះសីហនុ ដែលម្ចាស់សំណង់ខាងលើនេះ បានសាងសង់រំលោភមកលើចំណីផ្លូវសាធារណៈ នាពេលកន្លងមកនោះ អាជ្ញាធរមូលដ្ឋានសង្កាត់/ក្រុង បានបង្កើតគណៈកម្មការចុះធ្វើកំណត់ហេតុឱ្យរុះរើ ហើយតម្រូវឱ្យកាត់សំយាបកែតម្រូវថយចូលទៅក្នុងដីឡូត៍ប្រវែង១ម៉ែត្រពីចំណីផ្លូវសាធារណៈ ។
លោក អ៊ី សុខឡេង អភិបាលក្រុងព្រះសីហនុ បានឱ្យដឹងតាមទូរស័ព្ទ កាលពីព្រឹកថ្ងៃទី៦ តុលា ២០១៥ ថា បញ្ហាសំណង់ខាងលើនេះ លោកបានចុះត្រួតពិនិត្យសាជាថ្មី បន្ទាប់ពីបានធ្វើកិច្ចសន្យាឱ្យម្ចាស់សំណង់កាត់បន្ថយសំយាប ដែលបានសាងសង់លយចូលមកលើចំណីផ្លូវ នាពេលកន្លងមក ឃើញថា ម្ចាស់សំណង់បានគោរពទៅតាមកិច្ចសន្យារបស់ខ្លួន ប៉ុន្តែបន្ទាប់ពីពិនិត្យជាក់ស្តែង លើផ្នែកបច្ចេកទេសដែលម្ចាស់សំណង់តម្រូវឱ្យក្រុមជាងសាងសង់ជាទ្វារដែករមូលដើរដោយថាមពលអគ្គិសនី នៅជុំវិញអគារ ដែលការសាងសង់បែបនេះជាហេតុធ្វើឱ្យប៉ះពាល់ និងបាត់បង់សោភ័ណភាពទីក្រុង ។
លោកអភិបាលក្រុង បានបន្តថា លោកបានធ្វើការអប់រំណែនាំដល់ម្ចាស់សំណង់ឱ្យកែតម្រូវរុះរើទ្វារដែករមូលដែលបានដាក់រួចហើយនោះចេញវិញ និងឱ្យដាក់ជំនួសជាទ្វារកញ្ចក់នៅជុំវិញអគារ ដើម្បីបង្កើននូវសោភ័ណភាពទីក្រុងទេសចរណ៍ ។ លោកបានបញ្ជាក់ទៀតថា លោកនៅតែបន្តតាមដានការដ្ឋានសំណង់ខាងលើនេះបន្តទៀត ជាពិសេស រាល់សំណង់ទាំងឡាយណា ដែលរំលោភទៅលើច្បាប់សំណង់ ដែលធ្វើឱ្យប៉ះពាល់សោភ័ណភាពក្រុង សណ្តាប់ធ្នាប់ និងប៉ះពាល់ដល់ផលប្រយោជន៍ជាតិ ៕
ចែករំលែកព័តមាននេះ