ខេត្តបន្ទាយមានជ័យ ៖ រថយន្តក្រុមហ៊ុនរស្មីភ្នំពេញដឹកអ្នកដំណើរត្រូវបានក្រុមមន្ត្រីគយចល័តតាមចាប់ឆែកឆេរដោយសង្ស័យថា ដឹកទំនិញគេចពន្ធ តែពេលចាប់ឃាត់ត្រួតពិនិត្យនោះឃើញតែផ្លែឈើប៉ុណ្ណោះ មិនមានទំនិញគេចពន្ធនោះទេ ។ ការតាមឃាត់ឆែកឆេរនេះនៅវេលាម៉ោង១០ និង២០នាទី ថ្ងៃទី៥ តុលា នៅតាមបណ្តោយផ្លូវជាតិលេខ៥ មុខសាខាគយ និងរដ្ឋាករខេត្ត ។
សកម្មភាពដេញចាប់រថយន្តក្រុងដឹកអ្នកដំណើរនេះ គេឃើញមានរថយន្ត៣គ្រឿងរបស់មន្ត្រីគយចល័ត ក្នុងនោះមានរថយន្តហាយឡែនឌ័រ១គ្រឿង, រថយន្តតូយ៉ូតាថៃហ្គ័របំពាក់ដោយស៊ីរ៉ែន១គ្រឿង និងហ្វដ១គ្រឿង គ្មានស្លាកលេខ ។ ក្រោយពេលដេញឃាត់បាននៅចំណុចមុខសាខាគយ និងរដ្ឋាករខេត្ត បានធ្វើឱ្យអ្នកដំណើរជិត១០នាក់ចុះពីរថយន្តហើយបានឡើងឆែកឆេរអស់រយៈពេល១០នាទី ។ ការឆែកឆេរឃើញមានតែទំនិញផ្លែឈើដែលដាក់កេះមិនឃើញមានទំនិញល្អឡើយ ហើយបានឱ្យអ្នកដំណើរឡើងរថយន្តក្រុងចេញទៅកាន់ចំណតដោយរថយន្ត៣គ្រឿងរបស់មន្ត្រីគយចល័តនាំមុខ ។
ពាក់ព័ន្ធការដេញចាប់រថយន្តក្រុងក្រុមហ៊ុនរស្មីភ្នំពេញដឹកអ្នកដំណើរដែលមានលេខរៀង PP3C1398 ពាក់ស្លាកលេខភ្នំពេញ 3C-1398 ដែលបើកបរចេញពីក្រុងប៉ោយប៉ែតក្នុងទិសដៅទៅរាជធានីភ្នំពេញ ពេលបើកចេញពីប៉ោយប៉ែតរថយន្តមន្ត្រីគយចល័តនៅចំណុចផ្លូវ៥០ភូមិកូនដំរីសង្កាត់និមិត្តក្រុងប៉ោយប៉ែត បានដេញរហូតដល់ចំណុចមុខសាខាគយ និងរដ្ឋាករខេត្តទើបឃាត់ដំណើរបាន ។
មន្ត្រីគយចល័តដែលឃាត់រថយន្តក្រុងដឹកអ្នកដំណើររកទំនិញគេចពន្ធនេះ គឺមន្ត្រីគយ២ទៅ៣នាក់ធ្វើសកម្មភាពប្រញាប់ប្រញាល់នៅពេលឃើញអ្នកយកព័ត៌មានថតសកម្មភាពទាំងមិនបាននិយាយប្រាប់អ្វីមួយម៉ាត់ឡើយ ។
គួររលឹកថា រយៈពេលកន្លងមកមន្ត្រីគយចល័តចំណុចផ្លូវ៥០បានឃាត់រថយន្តក្រុង៣គ្រឿងដឹកទំនិញគេចពន្ធត្រូវបានអនុវត្តតាមច្បាប់ តែក្រោយមកដូចជាស្ងាត់ដោយសារអ្នករកស៊ីដឹកទំនិញគេចពន្ធបានបង់លុយ ៕
ចែករំលែកព័តមាននេះ