ខេត្តកំពង់ស្ពឺ ៖ ជនសង្ស័យ២នាក់ត្រូវបានកងរាជអាវុធហត្ថខេត្តឃាត់ខ្លួន ខណៈពួកគេកំពុងធ្វើសកម្មភាពលួចប្រេងម៉ាស៊ូតនៅក្នុងក្រុមហ៊ុនកិនថ្ម កាលពីវេលាម៉ោង១០ និង៣០នាទីយប់ ថ្ងៃទី០៥ តុលា ២០១៥នៅចំណុចក្រុមហ៊ុនថ្ម H.T.T.K ស្ថិតនៅភូមិព្រៃវៀវ ឃុំធម្មតា ស្រុកសំរោងទង ខេត្តកំពង់ស្ពឺ។
លោកអនុសេនីយ៍ឯកទិត្យ វណ្ណៈ ប្រធានមន្ទីរយុត្តិធម៌បានឱ្យដឹងថា ជនសង្ស័យ០២នាក់ដែលខាងកងរាជអាវុធហត្ថឃាត់ខ្លួនមានឈ្មោះ ម៉ាក សូណា ភេទប្រុស អាយុ២៤ឆ្នាំ មុខរបរធ្វើការរោងចក្រ មានទីលំនៅភូមិឃុំកើតហេតុខាងលើ និងឈ្មោះ ភឿង ពន្លឺ ភេទប្រុស អាយុ១៨ឆ្នាំ មុខរបរសិស្សសាលា មានទីលំនៅភូមិ-ឃុំជាមួយគ្នា។
ប្រភពពីមន្ត្រីអាវុធហត្ថបានឱ្យដឹងថា ការឃាត់ខ្លួននេះបន្ទាប់ពីសមត្ថកិច្ចទទួលពាក្យបណ្តឹងពីខាងក្រុមហ៊ុនកិនថ្មថា មានមនុស្សលួចបូមប្រេងលក់ជារៀងរាល់យប់ទើបលោកអនុសេនីយ៍ឯកទិត្យ វណ្ណៈ ប្រធានមន្ទីរយុត្តិធម៌សុំបទបញ្ជាពីលោកឧត្តមសេនីយ៍មេបញ្ជាការកងរាជអាវុធហត្ថខេត្ត ហើយដឹកនាំកម្លាំងក្រោមបញ្ជាចុះធ្វើការឃ្លាំមើលមុខសញ្ញាលួចប្រេងរហូតកំណត់បានមុខសញ្ញាក៏ឃាត់ខ្លួនតែម្តង។
ក្រោយឃាត់ខ្លួននេះដែរសមត្ថកិច្ចកងរាជអាវុធហត្ថដកហូតបានប្រេងម៉ាស៊ូត២ប៊ីដុងស្មើនឹង៦០លីត្រ ម៉ូតូ០១គ្រេឿង ម៉ាកស្គូពី ពណ៌ផ្កាឈូក ស្លាកលេខ កំពង់ស្ពឺ ១G.3095 ទូរសព្ទ័ដៃចុចពិលចំនួន០២គ្រឿង៕
ចែករំលែកព័តមាននេះ