ខេត្តកំពត ៖ កម្លាំងការិយាលយ័កណ្តាលនគរបាលព្រហ្មទណ្ឌនៃស្នងការដ្ឋានខេត្តដឹកនាំដោយលោកវរសេនីយ៍ត្រី លក ញ៉ាវ នាយរងការិយាលយ័ព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្ត បានចុះបង្ក្រាបក្រុមសេព និងចែកចាយគ្រឿងញៀនបីទីតាំងគឺនៅចំណុចក្បាលស្ពានឥន្ទធនូព្រែកកំពង់បាយប៉ែកខាង លិចគល់ស្ពានខាងកើត និងមួយកន្លែងទៀត នៅម្ដុំផែទូកកំពង់កណ្ដាលកាលពីចន្លោះម៉ោង១១យប់ទៅម៉ោង១២អធ្រាត្រថ្ងៃទី១ឈានចូល ថ្ងៃទី២ តុលា ។ ក្នុងប្រតិបតិ្តការនោះសមត្ថកិច្ចឃាត់ខ្លួនជនសង្ស័យបានចំនួន១៣នាក់ នាំមកការិយាលយ័ប្រឆាំងបទល្មើសគ្រឿងញៀនខេត្ត ដើម្បីកសាងសំណុំរឿងបញ្ជូនទៅតុលាការ ។
លោកវរសេនីយ៍ឯក គង់ សុខន នាយការិយាលយ័ព្រហ្មទណ្ឌកម្រិតធ្ងន់នៃស្នងការដ្ឋានខេត្តបានឲ្យដឹងថា នៅព្រលប់ថ្ងៃទី១ តុលាលោកឧត្តមសេនីយ៍ត្រី ម៉ៅ ចន្ទ័មធុរិទ្ធ ស្នងការនគរបាលខេត្ត បានដឹកនាំកម្លាំងចេញល្បាតរកមុខសញ្ញាប្រើប្រាស់ និងចែកចាយគ្រឿង ញៀន ។ ក្នុងប្រតិបត្តិការខាងលើមានលោកវរសេនីយ៍ត្រី លក ញ៉ាវ នាយរងការិយាលយ័ព្រហ្មទណ្ឌកម្រិតធ្ងន់នៃស្នងការដ្ឋានខេត្ត ក៏បានចូលរួមដឹកនាំកម្លាំងចុះបង្ក្រាបទីតាំងបទ ល្មើសគ្រឿងញៀនខាងលើនេះដែរ ។
លោក គង់ សុខន មានបានបន្តថា ក្នុងការបង្ក្រាបនេះកម្លាំងបានចុះបង្ក្រាបបីទីតាំងផ្សេងគ្នា ដែលទី១នៅចំណុចក្បាលស្ពានឥន្ទធនូត្រើយខាងកើតនៅវេលាម៉ោង១០និង១៥នាទីយប់ឃាត់ខ្លួនជនប្រើប្រាស់គ្រឿងញៀនបានចំនួន៥នាក់ និងឧបករណ៍ប្រើប្រាស់មួយចំនួន ។ ទី២នៅចំណុចគល់ស្ពានឥន្ទធនូត្រើយខាងលិចនៅចន្លោះវេលាម៉ោង១១និង១២យប់ ឃាត់ខ្លួនជនចែកចាយ និងប្រើប្រាស់បានចំនួន៥នាក់រួមទាំងវត្ថុតាងថ្នាំញៀន និងឧបករណ៍សម្រាប់ជក់មួយចំនួន និងទី៣នៅម្តុំផែទូកកំពង់កណ្តាលស្ថិតក្នុងភូមិសុវណ្ណសាគរ សង្កាត់កំពង់កណ្តាល ក្រុងកំពត នៅវេលាម៉ោង១និង១៥នាទីរំលងអធ្រាតឈានចូលថ្ងៃទី២ តុលា ឃាត់ខ្លួនជនសេពគ្រឿងញៀនបានបីនាក់ រួមទាំងវត្ថុតាងប្រដាប់ជក់ និងថ្នាំញៀន ៕
ចែករំលែកព័តមាននេះ