រាជធានីភ្នំពេញ ៖ ការនាំចេញអង្កររបស់កម្ពុជាទៅក្រៅប្រទេសនៅក្នុងត្រីមាសទី២កន្លងទៅ មានកំណើនគួរឲ្យកត់សម្គាល់ តែនៅត្រីមាសទី៣នេះ ឃើញថា មានការថមថយនូវបរិមាណនៃការនាំចេញ បើធៀបនឹងរយៈពេលដូចគ្នាកាលពីឆ្នាំ២០១៤ ។ នៅត្រីមាសទី៣នេះ កម្ពុជានាំចេញអង្ករទៅក្រៅប្រទេសមានចំនួនសរុប៨៥.២៨០តោន ធ្លាក់ចុះប្រមាណ៦,៧% បើធៀបនឹងរយៈពេលដូចគ្នាកាលពីឆ្នាំមុន មានចំនួន៩១.៤៤២តោន ។ នេះបើយោងតាមរបាយការណ៍ពីលេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករ ។
លោកបណ្ឌិត ហ៊ាន វណ្ណហន ប្រធានលេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករមានប្រសាសន៍ថា មូលហេតុនៃការធ្លាក់ចុះក្នុងត្រីមាសទី៣នេះ បើតាមការសិក្សាឃើញថា មានមូលហេតុធំៗ៣ គឺទី១-ការធ្លាក់ចុះតម្លៃនៃលុយអឺរ៉ូ ធៀបនឹងដុល្លារ បង្កឲ្យប៉ះពាល់ការលក់ចេញទៅទីផ្សារអឺរ៉ុប (ពីមុន១អឺរ៉ូស្មើនឹង១,៣៨ដុល្លារ បច្ចុប្បន្ន១អឺរ៉ូស្មើ១,១១ដុល្លារ) ។ ទី២- ថៃកំពុងបច្ចេញអង្ករផ្កាម្លិះពីស្តុកដែលមានតម្លៃថោកជាងយើង(ពីមុនអង្ករថៃលក់ថ្លៃ១.០០០ដុល្លារក្នុងមួយតោន តែពេលនោះអង្ករយើងលក់៨០០ដុល្លារក្នុងមួយតោន ហើយបច្ចុប្បន្ននេះថៃលក់៨០០ដុល្លារក្នុងមួយតោនដូចអង្ករកម្ពុជាដែរ) និងទី៣-កន្លងមក អង្ករមីយ៉ាន់ម៉ាមានតម្លៃថោកជាងអង្ករកម្ពុជា ។ តែថ្មីៗនេះ រដ្ឋាភិបាលគេទើបសម្រេចបិទការនាំចេញអង្ករ ធ្វើការបញ្ជាទិញអង្ករកម្ពុជាមានកើនឡើងនៅចុងត្រីមាសទី៣ ដែលសញមួយនឹងជំរុញឲ្យមានកំណើននាំចេញអង្ករកម្ពុជានៅចុងឆ្នាំនេះ ។
ដោយឡែក ក្រុមហ៊ុន AMRU RICE Cambodia នៅក្នុងខែកញ្ញានេះ ការនាំចេញអង្ករមានការធ្លាក់ចុះប្រហែល២០% បើធៀបនឹងខែមុនៗ ប៉ុន្តែបើយើងធៀបនឹងឆ្នាំ២០១៤នៅក្នុងខែកញ្ញាដូចគ្នា គឺមានកើនឡើង។ នៅ ក្នុងខែកញ្ញាកន្លងទៅនេះ ក្រុមហ៊ុនបាននាំចេញអង្ករបានជាង៣ពាន់តោន ខុសពីអ្វីដែលក្រុមហ៊ុនកំណត់ការនាំចេញស្ថិតក្នុងរង្វង់៦ពាន់តោន ។ នេះបើតាមលោក សុង សារ៉ន អគ្គនាយកក្រុមហ៊ុនបានបញ្ជាក់ ។
លោកបន្តទៀតថា៖ «ការធ្លាក់ចុះនេះយើងមានទឡ្ហីកមួយចំនួនដែលអ្នកបញ្ជាទិញមិនទាន់ឲ្យយើងនាំចេញបាន៖ ទី១ -នៅប្រទេសអឺរ៉ុបមួយចំនួន គេដល់រដូវច្រូតកាត់ដែរ ហើយកសិផលរបស់គេមានតម្លៃសមរម្យ ។ ទី២-រូបិយប័ណ្ណអឺរ៉ូ និងអង្ករថៃធ្លាក់ចុះជាកត្ដារួមផ្សំ ។ ទី៣-ប្រទេសមួយចំនួនដូចជា វៀតណាម មីយ៉ាន់ម៉ា ជាប្រទេសទទួលបានការនាំចេញដោយរួចពន្ធដូចកម្ពុជាដែរ ហើយតម្លៃស្រូវប្រទេសទាំងនោះថោកជាងកម្ពុជា និងទី៤ -ប្រភេទស្រូវក្រអូបផ្កាម្លិះយើងមិនមាននៅក្នុងស្តុកគ្រប់គ្រាន់ ព្រោះតែយើងមិនមានលទ្ធភាពទិញស្រូវស្តុកទុកបានច្រើន ធ្វើឲ្យការនាំចេញទៅទីផ្សារសំខាន់នៅអឺរ៉ុបមានការថយចុះ » ។
ទោះបីយ៉ាងណា លោកថា បើគិតពីខែមករាដល់ខែកញ្ញា ឆ្នាំ២០១៥នេះ ក្រុហ៊ុនរបស់លោកបាននាំចេញអង្ករសរុបបានប្រមាណ៥ម៉ឺនតោន បើធៀបនឹងពេលដូចគ្នាកាលពីឆ្នាំមុន កើនឡើងប្រហែល៤% ។ នៅដំណាច់ឆ្នាំ២០១៥នេះ ក្រុមហ៊ុនមានផែនការនាំចេញអង្ករឲ្យបានជាង៦ម៉ឺនតោន ដោយនាំចេញប្រភេទអង្ករក្រអូប៣០% និងអង្ករក្រអូបធម្មតាប្រមាណ៧០% ។
យោងតាមរបាយការណ៍ពីលេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករបង្ហាញថា គិតត្រឹម៩ខែឆ្នាំ២០១៥នេះ កម្ពុជានាំចេញអង្ករទៅក្រៅប្រទេសមានចំនួន៣៦៩.១០៥តោន កើនឡើង៣៧% បើធៀបនឹងរយៈពេលដូចគ្នាកាលពីឆ្នាំ២០១៤ មានចំនួន២៦៩.៣៧០តោន ។ ក្នុងនោះប្រទេសចំនួន១០ដែលកម្ពុជានាំចេញទៅច្រើនជាងគេដូចជា ចិន បារាំង ប៉ូឡូញ ម៉ាឡេស៊ី ហូឡង់ អុីតាលី ក្រិក អង់គ្លេស អេស្ប៉ាញ និងបែលហ្ស៊ីក ។
គួរបញ្ជាក់ថា កាលពីពេលថ្មីៗនេះ គណៈកម្មាធិការវិន័យ និងក្រមសីលធម៌របស់សហព័ន្ធ ស្រូវអង្ករកម្ពុជា បានរៀបចំឲ្យមាននីតិវិធីក្នុងការដាក់ទណ្ឌកម្មចំពោះសមាជិកទាំងឡាយណាដែលប្រព្រឹត្តផ្ទុយពីវិន័យនិងក្រមសីលធម៌ ដូចជា ចំពោះអ្នកដែលនាំចូលអង្ករពីប្រទេសជិតខាងសម្រាប់ចែកចាយទីផ្សារក្នុងស្រុក ត្រូវមានឯកសារប្រវេទន៍គយនិងលិខិតបង់ពន្ធឲ្យបានត្រឹមត្រូវតាមច្បាប់ ។ ចំពោះសមាជិកទាំងឡាយណាដែលនាំចូលអង្ករពីប្រទេសជិតខាង ហើយបាននាំចេញទៅកាន់ទីផ្សារអន្តរជាតិ ដោយប្រើប្រាស់វិញ្ញាបនបត្របញ្ជាក់ប្រភពដើមទំនិញពីប្រទេសកម្ពុជា ប្រសិនបើសហព័ន្ធចាប់បាន នឹងត្រូវពិន័យជាប្រាក់ ហើយនៅតែមិនរាងចាល ប្រសិនបើសហព័ន្ធចាប់បានលើកទី២ ត្រូវទទួលពិន័យក្នុងកម្រិតធ្ងន់ ដោយសហព័ន្ធនឹងបញ្ជូនឈ្មោះក្រុមហ៊ុននោះទៅឲ្យស្ថាប័នពាក់ព័ន្ធដើម្បីទទួលការពិន័យទៅតាមផ្លូវច្បាប់នៃព្រះរាជាណាចក្រកម្ពុជា ៕
ចែករំលែកព័តមាននេះ