រាជធានីភ្នំពេញ ៖ មនុស្ស២នាក់បានរងរបួសធ្ងន់ និង២នាក់ទៀតរបួសស្រាលដោយសាររថយន្តនីស្សាន់អ្នកបើកបរស្រវឹងបើកទៅបុករថយន្តដឹកមាន់ពេញទំហឹងនៅក្បែរស្ថានីយប្រេងឥន្ធនៈតូតាល់
រាជធានីភ្នំពេញ ៖ មនុស្ស២នាក់បានរងរបួសធ្ងន់ និង២នាក់ទៀតរបួសស្រាលដោយសាររថយន្តនីស្សាន់អ្នកបើកបរស្រវឹងបើកទៅបុករថយន្តដឹកមាន់ពេញទំហឹងនៅក្បែរស្ថានីយប្រេងឥន្ធនៈតូតាល់ តាមផ្លូវលេខ២៧១ សង្កាត់បឹងសាឡាង ខណ្ឌទួលគោក កាលពីវេលាម៉ោង៤ និង២០នាទីទៀបភ្លឺ ថ្ងៃទី៥ តុលា ។
ប្រភពព័ត៌មានពីកន្លែងកើតហេតុបានឲ្យដឹងថា រថយន្តបង្កម៉ាកនីស្សាន់មួយបាំងកន្លះ ពណ៌ត្រីឆ្លូញ ពាក់ស្លាកលេខ ភ្នំពេញ 2AF 5336 ជិះគ្នា៣នាក់ អ្នកបើកបរស្រវឹងជោកជាំ ទិសដៅពីកើតទៅលិច ចំណែករថយន្តទីតាន ពណស ជារថយន្តដឹកមាន់ បើកបរដោយបុរសម្នាក់ពីលិចទៅកើត ពេលមកដល់ចំណុចខាងលើ ស្រាប់តែរថយន្តបង្កបើករេចង្កូតទៅបំណែកខាងផ្លូវរថយន្តដឹកមាន់ហើយបានបួងចង្កូតមកស្តាំវិញក៏ត្រូវរថយន្តដឹកមាន់បុកពេញទំហឹងបណ្តាលឲ្យរថយន្តនីស្សាន់នៅទទឹងពីមុខរថយន្តដឹកមាន់ធ្វើឲ្យអ្នកបើករថយន្តដឹកមាន់របួសជើងធ្ងន់ ចំណែកអ្នកបើកបររថយន្តនីស្សាន់របួសស្រាល តែស្រវឹងជោកជាំ រីឯអ្នករួមដំណើរម្នាក់របួសដៃឆ្វេង និងម្នាក់ទៀតរបួសស្រាល ។
ក្រោយពេលកើតហេតុអ្នករងរបួសដែលបើករថយន្តដឹកមាន់ត្រូវសាច់ញាតិដឹកយកទៅព្យាបាលនៅមន្ទីរពេទ្យភ្លាមៗ ចំណែកអ្នកជិះរថយន្តបង្កដែលរងរបួសដៃបានជិះរ៉ឺម៉កម៉ូតូទៅព្យាបាលនៅមន្ទីរពេទ្យព្រះកុសុមៈ ។ រថយន្តដឹកមាន់បានយករថយន្តមួយគ្រឿងទៀតមកសេងមាន់ដឹកយកទៅឲ្យម៉ូយបន្តទៀត ទើបសមត្ថកិច្ចវាស់វែងយកទៅដោះស្រាយនៅអធិការដ្ឋានខណ្ឌទួលគោក ៕
ចែករំលែកព័តមាននេះ