ខេត្តបន្ទាយមានជ័យ ៖ កងរាជអាវុធហត្ថបានឃាត់ខ្លួនអ្នកកាសែតម្នាក់ កាលពីវេលាម៉ោង១១ព្រឹក ថ្ងៃទី៣ តុលា ២០១៥ នៅមុខបញ្ជាការដ្ឋានកងរាជអាវុធហត្ថខេត្ត ដោយចោទប្រកាន់ពីបទឆបោកមេបញ្ជាការទាក់ទិននឹងប្រាក់ចំនួន១០០ដុល្លារ ។
ខេត្តបន្ទាយមានជ័យ ៖ កងរាជអាវុធហត្ថបានឃាត់ខ្លួនអ្នកកាសែតម្នាក់ កាលពីវេលាម៉ោង១១ព្រឹក ថ្ងៃទី៣ តុលា ២០១៥ នៅមុខបញ្ជាការដ្ឋានកងរាជអាវុធហត្ថខេត្ត ដោយចោទប្រកាន់ពីបទឆបោកមេបញ្ជាការទាក់ទិននឹងប្រាក់ចំនួន១០០ដុល្លារ ។ អ្នកកាសែតដែលត្រូវឃាត់ខ្លួននេះឈ្មោះ ជ័យ តារា ភេទប្រុស អាយុ៥៣ឆ្នាំ ជាអ្នកយកព័ត៌មានឲ្យកាសែតសុជីវធម៌ ដែលកាសែតនេះត្រូវបានលុបឈ្មោះចេញពីបញ្ជីយូរឆ្នាំមកហើយ ។ ជនជាប់ចោទរស់នៅភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ។
លោកឧត្តមសេនីយ៍ត្រី ឱ បូរិន មេបញ្ជាការកងរាជអាវុធហត្ថខេត្ត ថ្លែងថា នៅមុនពេលឃាត់ខ្លួន គឺឈ្មោះ ជ័យ តារា ដែលអះអាងថា ជាអ្នកយកព័ត៌មានឲ្យកាសែតសុជីវធម៌ បានប្រើល្បិចឆបោកលោកដោយប្រាប់ថា ឈ្មោះ មុត សុវណ្ណ អ្នកកាសែតនៅភ្នំពេញ បានទូរស័ព្ទមកទារលុយលោកចំនួន១០០ដុលា្លរ ។ ក្រោយពីឈ្មោះនេះទូរស័ព្ទមកទារលុយ លោកក៏ឲ្យមកយកលុយ ហើយបានឱ្យកម្លាំងកងរាជអាវុធហត្ថខេត្តឃាត់ខ្លួននាំយកមកសាកសួរ ។ ពេលនោះ ឈ្មោះ ជ័យ តារា ប្រាប់ថា ខ្លួនជាអ្នកយកព័ត៌មានឲ្យកាសែតសុជីវធម៌ប្រចាំខេត្តបាត់ដំបង តែពេលសួររកប័ណ្ណអង្គភាពគ្មាន ទើបឃាត់ខ្លួនដោយចោទពីបទឆបោកលុយ១០០ដុល្លារ ។
លោកឧត្តមសេនីយ៍ត្រី ឱ បូរិន បន្តថា នៅពេលឃាត់ខ្លួនឈ្មោះ ជ័យ តារា នេះហើយ ក៏បានសុំបញ្ជាពីព្រះរាជអាជ្ញាអមសាលាដំបូងខេត្តដើម្បីឃាត់ខ្លួនសាកសួរ និងឈានទៅអនុវត្តតាមច្បាប់ ។ រីឯឈ្មោះ ជ័យ តារា ឆ្លើយថា គាត់ពិតជាបានទូរស័ព្ទទៅលោក ឱ បូរិន សុំលុយចំនួន១០០ដុល្លារមែន ព្រោះឈ្មោះ មុត សុវណ្ណ អ្នកកាសែតនៅភ្នំពេញបានទូរស័ព្ទប្រាប់ថា ឱ្យទៅយកលុយពីលោក ឱ បូរិន ចំនួន១០០ដុល្លារ ។ នៅពេលទូរស័ព្ទណាត់ជួបលោក ឱ បូរិន នៅទីបញ្ជាការដើម្បីយកលុយ១០០ដុល្លារ ក៏ត្រូវកម្លាំងកងរាជអាវុធហត្ថឃាត់ខ្លួននាំមកសាកសួរ ។
លោក ផាន់ ភិរម្យ ព្រះរាជអាជ្ញាអមសាលាដំបូងខេត្តថ្លែងថា ការឃាត់ខ្លួនឈ្មោះ ជ័យ តារា ដែលអះអាងថាជាអ្នកកាសែតនោះ គឺគ្មានប័ណ្ណសម្គាល់អង្គភាពណាមួយឱ្យបានច្បាស់លាស់ ហើយប្រើល្បិចឆបោកលុយពីលោកមេបញ្ជាការកងរាជអាវុធហត្ថខេត្ត ទើបត្រូវបានឃាត់ខ្លួនជាបណ្តោះអាសន្នដើម្បីស្រាវជ្រាវរកអ្នកដែលពាក់ព័ន្ធក្នុងករណីឆបោកលុយនេះ ។
លោក ស៊ុំ ចាន់គារ អ្នកសម្របសម្រួលអង្គការអាដហុកប្រចាំខេត្តបន្ទាយមានជ័យថ្លែងថា ការឃាត់ខ្លួនអ្នកការសែតម្នាក់ឈ្មោះ ជ័យ តារា នេះ ជាការធ្វេសប្រហែសមួយសម្រាប់អ្នកសារព័ត៌មានដែលមិនបានដាក់កាត ឬប័ណ្ណសម្គាល់ខ្លួនជាប់នឹងខ្លួន ហើយធ្វើខុសពីវិជ្ជាជីវៈ។ ការទូរស័ព្ទសុំលុយ ឬទារលុយ គឺជាទង្វើខុសពីក្រមសីលធម៌ តែវាមិនអាចថាមានទោសទៅដល់កម្រិតទោសដែលត្រូវចោទប្រកាន់ពីបទឆបោកឡើយ ៕
ចែករំលែកព័តមាននេះ