ខេត្តរតនគិរី ៖ គណៈកម្មការខេត្តបានបើកកិច្ចប្រជុំផ្ទៃក្នុងមួយនៅសាលាស្រុកអណ្តូងមាសនាព្រឹកថ្ងៃទី២ តុលា ២០១៥ ស្តីពីការសុំបញ្ឈប់ទូកដថ្មីដែលគ្មានច្បាប់អនុញ្ញាតនៅថ្ងៃសុក្រសប្តាហ៍ក្រោយ ។
លោក លី វិន្ទ អភិបាលរងខេត្ត បានផ្តល់បទសម្ភាសន៍ជាមួយអ្នកសារព័ត៌មានថា គណៈកម្មការបានសម្រេចបញ្ឈប់ទូកដថ្មី ហើយត្រូវរង់ចាំរយៈពេល២-៣ខែទៀតទើបដាក់ដេញថ្លៃសាជាថ្មី ព្រោះទូកដចាស់ឆ្លងរាល់ថ្ងៃ គេមានច្បាប់ធ្វើអាជីវកម្មដោយបានបង់ប្រាក់ចូលរដ្ឋរយៈពេល៥ខែរួចមកហើយ ។ ដូច្នេះទូកដ ដែលទើបដំណើរការថ្មីនេះមិនអនុញ្ញាតឱ្យឆ្លងទៀតឡើយ ព្រោះមិនទាន់មានច្បាប់ត្រឹមត្រូវ។ លោកបន្តថា បច្ចុប្បន្នយើងឱ្យទូកដដែលមានច្បាប់បញ្ចុះតម្លៃចម្លងក្រោមសៀវភៅបន្ទុកដោយអនុញ្ញាតឱ្យយកពីរថយន្តប្រភេទទេសចរណ៍ត្រឹមតែ២ម៉ឺន៥ពាន់រៀលសម្រាប់ឆ្លងទៅមក និងបញ្ចុះតម្លៃម៉ូតូដោយធ្វើយ៉ាងណាឱ្យប្រជាពលរដ្ឋអ្នកឆ្លងអាចទទួលយកបាន ។ គណៈកម្មការនឹងចាត់វិធានការចរចាតម្លៃជាមួយប្រជាពលរដ្ឋថា តើមតិភាគច្រើនអាចទទួលយកត្រឹមតម្លៃប៉ុន្មាននៅពេលឆាប់ៗនេះ ។
លោក ប៉ាន់ សុខុម ប្រធានទូកដថ្មីបានបញ្ជាក់ថា ចំពោះការបញ្ឈប់ទូកដថ្មីរបស់លោកមិនមែនសម្រេចលើលោកទេ គឺសម្រេចលើបងប្អូនប្រជាពលរដ្ឋធ្វើដំណើរឆ្លងទូក ប្រសិនបើពួកគាត់យល់ព្រមជាការប្រសើរ បើពួកគាត់ទាំងអស់គ្នាមិនព្រមលោកមិនដឹងធ្វើយ៉ាងម៉េចទេ ។ ចំពោះការដាក់ដេញថ្លៃកំពង់ចម្លងនៅស្រុកអណ្តូងមាសឆ្លងកាត់ទន្លេសេសាននេះ លោកមិនជំទាស់ជាមួយអាជ្ញាធរដែនដីទេ ព្រោះកន្លងមកលោកក៏ជាអ្នករត់ទូកដម្នាក់ដែរ ។ លោកបន្តថា ចំពោះទូកដថ្មីរបស់លោកមិនចង់មានទំនាស់ទេ បើម្ចាស់ទូកដចាស់យល់ព្រមឱ្យទូកដថ្មីបង់ជូនលោកមិនជំទាស់ទេឱ្យតែអាចទទួលយកបាន ។
ចំណែកអ្នកស្រី កែវ សុខា ម្ចាស់ទូកដចាស់បានបញ្ជាក់ថា ចំពោះបញ្ហាដែលចង់មានការចរចាតម្លៃបង់ប្រាក់ជូនគាត់នោះ គាត់មិនយល់ព្រមជាដាច់ខាត ព្រោះគាត់បានបង់ប្រាក់ជូនរដ្ឋច្រើនណាស់ រយៈពេលតែ៥ខែប៉ុណ្ណោះមានចំនួនដល់ទៅ៧លាន៥សែនរៀល និងមានច្បាប់អនុញ្ញាតត្រឹមត្រូវទទួលស្គាល់តាំងពីថ្នាក់ស្រុកដល់ថ្នាក់ខេត្ត ។
លោក នង ណារិទ្ធ អភិបាលស្រុកអណ្តូងមាស ឲ្យដឹងថា អាជីវកម្មទូកដរបស់អ្នកស្រី កែវ សុខា មានច្បាប់ត្រឹមត្រូវ និងបង់ប្រាក់ជូនរដ្ឋតាមសៀវភៅបន្ទុករបស់ក្រសួងសេដ្ឋកិច្ច និងហិរញ្ញវត្ថុ និងមន្ទីរហិរញ្ញវត្ថុខេត្ត ពេលនេះស្រាប់តែមានទូកដថ្មីដែលគ្មានច្បាប់អនុញ្ញាតត្រឹមត្រូវធ្វើអាជីវកម្មដែរធ្វើឲ្យរដ្ឋខាតចំណូល និងធ្វើឱ្យអាជ្ញាធរដែនដីឈឺក្បាល ។ នៅពេលនេះអាជ្ញាធរដែនដីកំពុងរកដំណោះស្រាយ ហើយនៅរយៈពេល២-៣ខែទៀតអ្នកស្រី កែវ សុខា ចប់អាណត្តិ អាជ្ញាធរខេត្តនឹងដាក់ឲ្យដេញថ្លៃជាសាធារណៈ ៕
ចែករំលែកព័តមាននេះ