ខេត្តព្រះសីហនុ ៖ គ្រួសារសពអតីតយុទ្ឋជនចំនួន១៤គ្រួសារ បានទទួលថវិកាបេឡាមរណៈសង្គ្រោះ កាលពីរសៀលថ្ងៃទី២ តុលា ២០១៥ កន្លងមក នៅបញ្ជាការដ្ឋានកងរាជអាវុធហត្ថខេត្ត ដែលបានប្រព្រឹត្តទៅក្រោមអធិបតីភាព លោក យន្ត មីន អភិបាលខេត្ត និងជាប្រធានកិត្តិយសគណៈកម្មាធិការសមាគមអតីតៈយុទ្ឋជនកម្ពុជាខេត្ត និងលោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្ត និងជាប្រធានគណៈកម្មាធិការសមាគមអតីតៈយុទ្ឋជនកម្ពុជាខេត្ត និងមានការអញ្ជើញពីលោក លោកស្រី យ៉ាងច្រើនកុះករ ។
លោក យន្ត មីន និងលោក ហេង ប៊ុនទី បានមានប្រសាសន៍សំណេះសំណាលជាមួយបងប្អូនគ្រួសារសព សមាជិកសមាគមអតីតៈយុទ្ឋជនកម្ពុជាខេត្ត ដែលមានអត្ថន័យប្រហាក់ប្រហែលគ្នាថា កន្លងមក គ្រួសារសពអតីតៈយុទ្ឋជន ត្រូវទទួលបានថវិកាចំនួន៤លានរៀល ដើម្បីយកទៅធ្វើបុណ្យ ។ ស្របតាមយុទ្ឋសាស្ត្រដំណាក់កាលទី៣ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ឱ្យគ្រួសារសពអតីតៈយុទ្ឋជននៅតាមបណ្តាខេត្តនានា ទទួលបានថវិកាយកទៅធ្វើបុណ្យនៅក្នុងរដូវបុណ្យភ្ជុំបិណ្ឌ ប្រពៃណីជាតិឱ្យបានគ្រប់ៗគ្នា ព្រោះរាជរដ្ឋាភិបាលកម្ពុជា មិនដែលបោះបង់ចោលអតីតៈយុទ្ឋជននោះទេ ព្រមទាំងមានការជំរុញឱ្យគិតគូរពីសុខទុក្ខដល់គ្រួសារអតីតៈយុទ្ឋជន ដែលបានលះបង់កម្លាំងកាយ-ចិត្ត និងបានបូជាសាច់ស្រស់ឈាមស្រស់ ក្នុងបុព្វហេតុការពារបូរណភាពទឹកដីនៃព្រះរាជាណាចក្រកម្ពុជា នាពេលកន្លងមក ។
លោកមេបញ្ជាការកងរាជអាវុធហត្ថខេត្ត បានមានប្រសាសន៍ថា គ្រួសារអតីតៈយុទ្ឋជនខេត្ត ដែលទទួលមរណភាពមានចំនួន៦០នាក់ យើងបានប្រគល់ថវិកាបេឡាមរណៈសង្គ្រោះ ជូនគ្រួសារសពសមាជិកសមាគមអតីតៈយុទ្ឋជនកម្ពុជាខេត្តបានចំនួន៤៦នាក់រួចហើយ នៅសល់១៤នាក់ កំពុងប្រគល់ជូននាពេលនេះ ។ លោកបញ្ជាក់ទៀតថា ក៏ប៉ុន្តែថវិកាដែលបានមក គឺសម្រាប់ប្រគល់ជូនសពសមាជិកសមាគមអតីតៈយុទ្ឋជនកម្ពុជា ចំនួនតែ៨នាក់ប៉ុណ្ណោះ គឺរដូវភ្ជុំបិណ្ឌបានមកដល់ លោកនឹងយកថវិកាផ្ទាល់ខ្លួន ដើម្បីប្រគល់ជូនចំនួន៦នាក់បន្ថែមទៀត ។
បន្ទាប់មក លោក យន្ត មីន និងលោកឧត្តមសេនីយ៍ត្រី ហេង ប៊ុនទី បានប្រគល់ថវិកាបេឡាមរណៈសង្គ្រោះជូនគ្រួសារសពសមាជិកសមាគមអតីតៈយុទ្ឋជនកម្ពុជាខេត្តចំនួន១៤នាក់ ដោយក្នុងមួយគ្រួសារទទួលបានថវិកាចំនួន៤លានរៀល ៕
ចែករំលែកព័តមាននេះ