ខេត្តឧត្តរមានជ័យ ៖ កម្មករចំការកៅស៊ូក្រុមហ៊ុនប៉េរ៉ូយ៉ាល់នាំគ្នាផឹកស៊ីនៅក្នុងបុណ្យកាន់បិណ្ឌទី៦នារដូវបុណ្យភ្ជុំបិណ្ឌ ស្រាប់តែទាស់ពាក្យសម្តីគ្នាកើតជារឿងជម្លោះ ជនដៃដល់បានទាញកាំបិតកាប់ទៅលើជនរងគ្រោះជាច្រើនកាំបិត បណ្តាលឲ្យស្លាប់ភ្លាមៗនៅនឹងកន្លែងកើតហេតុ ដែលហេតុការណ៍នេះកើតឡើងកាលពីវេលាម៉ោង១០ និង១០នាទីយប់ ថ្ងៃទី៣ តុលា ២០១៥ នៅថ្នល់កែង ស្ថិតក្នុងឃុំត្រពាំងប្រាសាទ ស្រុកត្រពាំងប្រាសាទ ។
សាក្សីនៅនឹងកន្លែងកើតហេតុបានឲ្យដឹងថា មុនពេលកើតហេតុគេបានឃើញកម្មករចំការកៅស៊ូរបស់ក្រុមហ៊ុនប៉េរ៉ូយ៉ាល់មានគ្នីគ្នាចំនួន៧នាក់បាននាំគ្នាផឹកស្រាបៀរចាប់ពីម៉ោង៦ល្ងាច រហូតដល់ម៉ោង១០ និង១០នាទីយប់ថ្ងៃទី៣ តុលា ២០១៥ នៅក្នុងបរិវេណដីក្រុមហ៊ុន នៅក្នុងភូមិ-ឃុំខាងលើ ។ សាក្សីបានបន្តថា បន្ទាប់មកគេបានឮសម្លេងជនរងគ្រោះនឹងជនដៃដល់ជជែកគ្នាយ៉ាងតឹងសរសៃ.ករៀងៗខ្លួនពីរឿងចំពាក់លុយ ដោយជនដៃដល់បានចំពាក់លុយជនរងគ្រោះ៦ម៉ឺនរៀល ក្រោយពីប្រកែកគ្នានោះ ស្រាប់តែជនដៃដល់ដែលមានឈ្មោះ វ៉េង ផល្លី ភេទប្រុស អាយុ២១ឆ្នាំ រស់នៅក្នុងភូមិ-ឃុំកើតហេតុ បានទាញកាំបិតខ្វែវកាប់ទៅលើជនរងគ្រោះឈ្មោះ តូច ចិត្ត ភេទប្រុស អាយុ៣៦ឆ្នាំ រស់នៅភូមិទួលប្រសើរ ឃុំត្រពាំងប្រាសាទ ស្រុកត្រពាំងប្រាសាទ ជាច្រើនកាំបិតបណ្តាលឲ្យស្លាប់ភ្លាមៗ ។
លោកវរសេនីយ៍ទោ អ៊ិន កាយ អធិការនគរបាលស្រុកត្រពាំងប្រាសាទបានឲ្យដឹងថា បន្ទាប់ពីកើតហេតុ លោកបានដឹកនាំកម្លាំងចុះទៅដល់កន្លែងកើតហេតុ ដើម្បីពិនិត្យ និងធ្វើការស្រាវជ្រាវ ស្រាប់តែបានឃើញជនរងគ្រោះមានស្នាមកាប់ស្ទើរតែសុះសាច់ដេកស្លាប់បាត់បង់ជីវិតនៅក្នុងថ្លុកឈាម ដោយឡែកជនដៃដល់បានរត់គេចខ្លួនបាត់ស្រមោល តែទោះជាយ៉ាងណាសមត្ថកិច្ចកំពុងតែធ្វើការស្រាវជ្រាវ ដើម្បីស្វែងរកចាប់ខ្លួនដើម្បីយកមកផ្តន្ទាទោសតាមច្បាប់ ៕
ចែករំលែកព័តមាននេះ