ខេត្តកំពង់ស្ពឺ ៖ សេចក្តីរាយការណ៍បានឱ្យដឹងថា បុរសម្នាក់ត្រូវបានសមត្ថកិច្ចចាប់ខ្លួនកាលពីវេលាម៉ោង៩ និង២០នាទីព្រឹកថ្ងៃទី៤ តុលា នេះ បន្ទាប់ពីបើករថយន្តបង្កគ្រោះថ្នាក់ចរាចរណ៍រួចដកកាំភ្លើងបាញ់បង្អើរមេឃ បង្កឱ្យមានការភ្ញាក់ផ្អើលកាលពីវេលាម៉ោង៧យប់ ថ្ងៃទី៣ តុលា នៅចំណុចភូមិទឹកអន្ទង់ ឃុំទំព័រមាស ស្រុកសំរោងទង។
ប្រភពបានឱ្យដឹងថា មុនពេលកើតហេតុជនបង្កបានបើករថយន្តម៉ាកតូយ៉ូតាហ៊ីលុច្ស២បាំង ពណ៌ស ពាក់ស្លាកលេខភ្នំពេញ២C០៧៣៧ ចេញពីផ្ទះមកបុករថយន្តមួយគ្រឿងទៀតជាប្រភេទរថយន្តដឹកទំនិញម៉ាកហ៊ីយ៉ាន់ដាយ ពណ៌ស អត់ស្លាកលេខបណ្តាលឱ្យរងការខូចខាត។
បន្ទាប់ពីកើតហេតុរួចម្ចាស់រថយន្តរងគ្រោះបានទាមទារសំណងចំនួន៧០០ដុល្លារអាមេរិក តែជនបង្កថា មិនបាច់ដោះស្រាយអីទេ យករថយន្តទៅជួសជុលរៀងខ្លួនទៅ ហើយក៏ឡើងបើករថយន្តចេញទៅបាត់ទៅ ខណៈនោះម្ចាស់រថយន្តរងគ្រោះមិនសុខចិត្តទេ គឺនៅឈប់រថយន្តចាំនៅមុខផ្ទះជនបង្ករហូតដល់ពេលជនបង្កត្រឡប់មកវិញឃើញម្ចាស់រថយន្តរងគ្រោះកំពុងចាំនៅមុខផ្ទះរបស់ខ្លួនក៏កើតក្តីក្តៅក្រហាយដកកាំភ្លើងបាញ់បង្អើរមេឃបង្កឱ្យមានការភ្ញាក់ផ្អើលតែម្តង។
ជនបង្កមានឈ្មោះគ្រី ម៉េងអាង ភេទប្រុស អាយុ៤២ឆ្នាំ រីឯអ្នកបើកបររថយន្តហ៊ីយ៉ាន់ដាយឈ្មោះណន់ ដារ៉ាត់ ភេទប្រុស អាយុ៤២ឆ្នាំ រស់នៅសង្កាត់ច្បារមន ក្រុងច្បារមន។
ក្រោយពេលឃាត់ខ្លួន នៅចំពោះមុខសមត្ថកិច្ចជនបង្កបាននិយាយថា «មិនបាច់យកគេទៅណាទេ ដោយអះអាងថា រូបគេធ្វើការនៅទីស្តីការគណៈរដ្ឋមន្ត្រី និងក្រសួងមហាផ្ទៃ ដោះស្រាយនៅទីនេះហើយ»៕
ចែករំលែកព័តមាននេះ