ខេត្តសៀមរាប ៖ រហូតមកដល់ព្រឹកថ្ងៃទី៤ តុលា ២០១៥ នេះ ចំនួនអ្នកពុលកាហ្វេទឹកដោះគោកបណ្តាលឱ្យក្អួតចង្អោរនៅវត្តតាអុង ស្ថិតក្នុងភូមិតាអុង ឃុំល្វែងប្ញស្សី ស្រុកជីក្រែង ខេត្តសៀមរាបបានកើនឡើងដល់២៥អង្គ/នាក់ ហើយត្រូវបានក្រុមគ្រួពេទ្យជួយសង្គ្រោះទាន់ពេលវេលា និងបានត្រឡប់មកវត្ត/ផ្ទះវិញធម្មតាហើយ ដែលហេតុការណ៍នេះពុលកាហ្វេទឹកដោះគោនេះធ្វើឱ្យមានការភ្ញាក់ផ្អើលពេញក្នុងពិធីកាន់បិណ្ឌវេនទី៧ របស់អ្នកភូមិឈូក ឃុំប្រឡាយ ស្រុកជីក្រែង កាលពីវេលាម៉ោង៧យប់ ថ្ងៃទី៣ តុលា ២០១៥ ស្ថិតនៅក្នុងវត្តតាអុង ភូមិតាអុង ឃុំល្វែងប្ញស្សី ស្រុកជីក្រែង ខេត្តសៀមរាប ។
លោក តូច សាកល អធិការនគរបាលស្រុកជីក្រែងបានប្រាប់«កោះសន្តិភាព»នៅព្រឹកថ្ងៃទី៤ តុលានេះថា ហេតុការណ៍នេះកើតឡើងបន្ទាប់ពីលោកសង្ឃ និងប្រជាពលរដ្ឋចាស់-ក្មេង-ប្រុស-ស្រីសរុប២៥អង្គ/នាក់នៅវត្តតាអ៊ុងបានឆាន់កាហ្វេទឹកដោះគោ រយៈពេលជិត២ម៉ោងក្រោយមកក៏មានអាការៈក្អួតចង្អោរ បណ្តាលឱ្យមានការភ្ញាក់ផ្អើលពេញរោងពិធីកាន់បិណ្ឌទី៧របស់ប្រជាពលរដ្ឋភូមិឈូក ឃុំប្រឡាយ ស្រុកជីក្រែង ខេត្តសៀមរាបតែម្តង ។
លោកបន្តថា ក្រោយពីទទួលបានព័ត៌មានភ្លាមៗ លោកបានដាក់កម្លាំងចុះទៅពិនិត្យរួចបញ្ជូនប្រជាពលរដ្ឋ និងលោកសង្ឃមួយចំនួនទៅព្យាបាលនៅមណ្ឌលសុខភាពឃុំល្វែងប្ញស្សី និងមួយចំនួនទៀតបានបញ្ជូនបន្តទៅព្យាបាលសង្គ្រោះនៅមណ្ឌលសុខភាពស្រុកជីក្រែង ។ បច្ចុប្បន្នប្រជាពលរដ្ឋ និងលោកសង្ឃចំនួន២៥អង្គ/នាក់បានត្រឡប់ទៅវត្ត និងទៅផ្ទះវិញអស់ហើយនៅព្រឹកថ្ងៃទី៤ តុលា ឆ្នាំ២០១៥នេះ បន្ទាប់ពីត្រូវបានក្រុមគ្រួពេទ្យជួយសង្គ្រោះយ៉ាងដុតដៃដុតជើង ។
លោក តូច សាកល បញ្ជាក់ថា លោកកំពុងឱ្យកម្លាំងជំនាញប្រមូលយកវត្ថុតាងដែលជាកាហ្វេទាំងអស់នោះ ដើម្បីយកទៅរកម្ចាស់ដែលលក់ឱ្យម្ចាស់បុណ្យមកសួរនាំ ប៉ុន្តែកាហ្វទាំងអស់នោះបានទិញមកពីកន្លែងផ្សេងៗគ្នា ។
ទោះជាយ៉ាងណា ពលរដ្ឋនៅក្នុងស្រុកជីក្រែង និងនៅជុំវិញខេត្តសៀមរាប ទន្ទឹងរង់ចាំមើលថា តើសមត្ថកិច្ចជំនាញ និងលោកអភិបាលខេត្ត មានចំណាត់ការទៅលើម្ចាស់លក់កាហ្វេ និងនំបុ័ងដែលពុលកន្លងមក រហូតពុលដល់លោកសង្ឃផងដែរនោះយ៉ាងណា ហើយនេះជាករណីពុលលើកទី៤ហើយនៅក្នុងខេត្តសៀមរាប ប៉ុន្តែមិនទាន់អាចចាប់បានម្នាក់នៅឡើងទេ គ្រាន់តែសមត្ថកិច្ចមានការសង្ស័យប៉ុណ្ណោះ ។
សូមបញ្ជាក់ថា នេះជាលើកទី៤ហើយដែលកើតមានករណីពុលបែបនេះនៅខេត្តសៀមរាប ដែលលើក១ ករណីពុលនំប៉័ង នៅស្រុកជីក្រែង, លើកទី២ ករណីពុលនំប៉័ង នៅស្រុកសូត្រនិគម, លើកទី៣ ករណីពុលនំប៉័ង នៅស្រុកអង្គរធំ ក្រោយពីប្រជាពលរដ្ឋនាំគ្នាទិញនំប៉័ងដែលគេដឹកលក់តាមម៉ូតូយកមកបរិភោគ និងលើកទី៤នេះ ពុលកាហ្វេទឹកដោះគោចំថ្ងៃពិធីកាន់បិណ្ឌទី៧របស់អ្នកភូមិឈូក ឃុំប្រឡាយ ស្រុកជីក្រែង ខេត្តសៀមរាប នៅវត្តតាអុង ស្ថិតក្នុងភូមិល្វែងឫស្សី ឃុំប្រឡាយ ស្រុកជីក្រែងនេះតែម្តង ៕
ចែករំលែកព័តមាននេះ