រាជធានីភ្នំពេញ ៖ ក្រុមអ្នកតំណាងរាស្ត្រគណបក្សសង្គ្រោះជាតិ និងសមាជិកព្រឹទ្ធសភាខាងគណបក្សសម រង្ស៊ី បានជួបប្រជុំគ្នាដើម្បីស្វែងរកគន្លឹះជាគោលនយោបាយថ្មីរបស់ខ្លួន ក្នុងការប្រកួតប្រជែងការបោះឆ្នោតនៅពេលខាងមុខនេះ ដែលនឹងមានការរៀបចំជាបន្តបន្ទាប់នៅឆ្នាំ២០១៧ និងឆ្នាំ២០១៨ ។
ថ្លែងក្នុងសិក្ខាសាលា ស្តីពីដំណើរការឆ្ពោះទៅរកការបោះឆ្នោតដើម្បីការផ្លាស់ប្តូរ ដែលមានវត្តមានអ្នកតំណាងរាស្ត្រ និងសមាជិកព្រឹទ្ធ
សភាខាងគណបក្សនេះ នាព្រឹកថ្ងៃទី២ តុលា នៅសណ្ឋាគារអុឹមភើរៀល លោក កឹម សុខា ថ្លែងថា «ខ្ញុំយល់ឃើញថា ដើម្បីកសាងគោលនយោបាយ យុទ្ធសាស្ត្រនយោបាយ និងផែនការសកម្មភាពប្រកបដោយប្រសិទ្ធភាពគណបក្សនយោបាយត្រូវពិនិត្យស្ថានភាពផ្ទៃក្នុងនៃគណបក្សរបស់ខ្លួន និងបរិយាកាសខាងក្រៅ រួមមានគណបក្សនយោបាយដែលជាដៃគូប្រកួត និងស្ថាប័នពាក់ព័ន្ធផ្សេងៗទៀតនៅក្នុងនិងក្រៅប្រទេសមកសិក្សា» ។
ជាមួយគ្នានេះ លោក កឹម សុខា អនុប្រធានគណបក្សសង្គ្រោះជាតិ បានលើកយកចំណុចសម្រាប់ពិភាក្សាដូចជា ៖
១-ការរក្សានិងពង្រឹងកម្លាំងដែលមានស្រាប់ រក្សាទាំងរូបភាពនយោបាយ គោលជំហរនយោបាយដែលធ្លាប់បង្ហាញប្រជាពលរដ្ឋទទួលបានជោគជ័យនាពេលកន្លងមក ។
២-ការទាក់ទាញនិងការពង្រីកកម្លាំងថ្មីបន្ថែម ត្រូវបើកចិត្តឲ្យទូលាយ កុំរើសអើង កុំប្រកាន់បក្ខពួក ដើម្បីឲ្យអ្នកដទៃគេកក់ក្តៅចូលរួមសកម្មភាពជាមួយ ។
៣-ស្វែងយល់ឲ្យបានច្បាស់ពីច្បាប់ នីតិវិធី និងយន្តការបោះឆ្នោត ។
៤-វាយតម្លៃចំពោះគណបក្សសង្គ្រោះជាតិខ្លួនឯង ត្រូវត្រួតពិនិត្យ និងស្វែងយល់ចំពោះចំណុចខ្សោយរបស់ខ្លួនដើម្បីធ្វើការកែលម្អ និងលុបបំបាត់ចោល ។
៥-កំណត់ចំណុចខ្លាំង និងចំណុចខ្សោយរបស់គូប្រកួត ដោយលើកចំណុចខ្សោយរបស់គូប្រកួតបង្ហាញជាសាធារណៈ ។
៦-កំណត់ប្រធានបទចំពោះមុខ គឺសមាជិកទាំងអស់មិនត្រូវលើកពីប្រធានបទចំពោះមុខតែម្តងនោះទេ ត្រូវលើកយកបញ្ហាប្រព័ន្ធតុលាការ អយុត្តិធម៌ ដីធ្លី ធនធនាធម្មជាតិ ភាពក្រីក្រយុវជនអត់ការងារធ្វើ ចំណាកស្រុក និងអំពើពុករលួយ… ។
លោក កឹម សុខា បានលើកឡើងថា ដើម្បីការគិតពិចារណាទទួលបានប្រសិទ្ធភាព គណបក្សសង្គ្រោះជាតិនឹងបង្កើតក្រុមការងារមួយដូចជា ៖ ១-បង្កើតឲ្យមានក្រុមគិត វិភាគ និងផ្តល់យោបល់ ២-បង្កើតក្រុមបកស្រាយព័ត៌មាន ឬហៅថាប្រតិកម្មតប ។
ចំណែកលោក សម រង្ស៊ី ប្រធានគណបក្សសង្គ្រោះជាតិ បានលើកឡើងតបនឹងការលើកឡើងរបស់សម្តេចតេជោនាយករដ្ឋមន្ត្រីថា ប្រសិនបើគណបក្សរបស់លោកឈ្នះឆ្នោតហើយឡើងកាន់អំណាចនោះនឹងមានសង្គ្រាមកើតឡើង ប្រហែលជាអ្នកនោះនៅមានអនុស្សាវរីយ៍ជាខ្មែរក្រហមហើយ នៅពេលគណបក្សសង្គ្រោះជាតិកាន់អំណាចនោះ នឹងមិនមានសង្គ្រាមដូចការលើកឡើងឡើយ ។
លោក សម រង្ស៊ី ថ្លែងថា «គេថាគណបក្សសង្គ្រោះជាតិ គឺស្អប់អ្នកមាន មិនពិតទេ ហើយពេលឡើងមកកាន់អំណាចកម្ចាត់អ្នកមាន យកទ្រព្យសម្បត្តិពីអ្នកមានទាំងអស់យកទៅចែកអ្នកក្រ សម្លាប់អ្នកមានទាំងអស់អត់ឲ្យមានសល់អ្នកមាន។ នេះមិនមែនទ្រឹស្តីម៉ាក់ឡេនីន គឺទ្រឹស្តីខ្មែរក្រហម អ៊ីចឹងអ្នកនិយាយបែបហ្នឹង ប្រហែលជាមានអនុស្សាវរីយ៍ខ្មែរក្រហមច្រើន។ ឆ្លើយតបទៅនឹងការចោទប្រកាន់មកលើយើង ការវាយប្រហារ គឺជាការមួលបង្កាច់មកលើយើង ហើយបើយើងអត់មានជំនួយស្មារតីឲ្យនិយាយដូចគ្នាហ្នឹងវាមិនសូវមានប្រសិទ្ធភាព ។ គេថា បើគណបក្សសង្គ្រោះជាតិ ឈ្នះឆ្នោតនឹងមានសង្គ្រាមកើតឡើង» ។
លោក សម រង្ស៊ី ថ្លែងទៀតថា សង្គ្រាមរវាងអ្នកមាននិងអ្នកក្រ គឺគណបក្សប្រជាជនកម្ពុជា ការពារអ្នកមាន គណបក្សសង្គ្រោះជាតិការពារអ្នកក្រ មានន័យថា អ្នកមាន និងអ្នកក្រធ្វើសង្គ្រាមជាមួយគ្នា គឺសង្គ្រាមវណ្ណៈ ហើយសង្គ្រាមវណ្ណៈទាល់តែមើលទ្រឹស្តីម៉ាក្សឡេនីន គណបក្សសង្គ្រោះជាតិមិនមែនកុម្មុយនីស្តទេ ។ លោកបន្តថា ចំណែកសង្គ្រាមមួយទៀត គឺរវាងខ្មែរនិងប្រទេសជិតខាង យើងគ្រាន់តែប្រកាសថា យើងទាមទារទឹកដីដែលបាត់បង់មកវិញ អ៊ីចឹងបានគេចោទប្រកាន់ថា នឹងមានសង្គ្រាមដែរ ។
លោក សម រង្ស៊ី បញ្ជាក់ថា «អត់មានសង្គ្រាមកើតឡើងជាមួយប្រទេសក្បែរខាងទេ ។ លោកស្នើឲ្យដោះស្រាយដោយសន្តិវិធី ដោយប្រព័ន្ធតុលាការយុត្តិធម៌អន្តរជាតិ ។ លោកបន្ថែមថា គេរៀបចំប្រទេសគេតាមបែបសេរីនិយម ប្រជាធិបតេយ្យ មិនមែនកុម្មុយនីស្តទៅកម្ចាត់អ្នកមាន អត់មានទេ ។
ប្រទេសជឿនលឿន គឺសម្បូរទៅដោយអ្នកមានដែលរកស៊ីស្របច្បាប់ ។ អ្នកមានស្រុកខ្មែរនាពេលបច្ចុប្បន្ន ជាអ្នកមានខិលខូច មានល្បិចកល ប៉ុន្តែលោកក៏ទទួលស្គាល់ថា មានអ្នកមានខ្លះគេរកស៊ីដោយត្រឹមត្រូវ តាមខ្ញុំដឹងខ្លះៗ ។
ជាមួយគ្នានេះ លោក សម រង្ស៊ី លើកឡើងថា លោករក្សាឧត្ដមគតិដើម៤ចំណុច របស់គណបក្សហ្វុ៊នស៊ិនប៉ិចសម្រាប់ការបោះឆ្នោតឆ្នាំ២០១៨ ។ លោកថ្លែងថា គណបក្សរបស់លោកនឹងប្រើប្រាស់ឧត្ដមគតិដើម៤ចំណុច របស់គណបក្សហ្វុ៊នស៊ិនប៉ិច កាលពីឆ្នាំ១៩៩៣ឡើងវិញ ដោយលោកយល់ថា ឧត្ដមគតិដើម៤ចំណុចធ្វើឲ្យគណបក្សហ្នឹងជាប់ឆ្នោតនៅគ្រាដែលម្ចាស់ដើម បានបោះបង់ចោលអស់ទៅហើយ ។
លោក សម រង្ស៊ី បន្តថា ក្នុងការបោះឆ្នោតឆ្នាំ២០១៨ ខាងមុខនេះ លោកនឹងប្រកាន់ខ្ជាប់នូវនិន្នាការកម្លាំងនយោបាយរបស់គណបក្សហ្វ៊ុនស៊ិនប៉ិចកាលពីឆ្នាំ១៩៩៣ ដើម្បីទាញយកការគាំទ្ររបស់ប្រជាជនកម្ពុជាឲ្យបានច្រើន ខណៈគណបក្សហ្វ៊ុនស៊ិនប៉ិចបានកែប្រែ និងលះបង់ឧត្ដមគតិដើមរបស់ខ្លួនដែលប្រជារាស្ដ្រស្រឡាញ់គាំទ្រនោះ ។
លោកគូសបញ្ជាក់ថា ឧត្ដមគតិដើមរបស់គណបក្សហ្វ៊ុនស៊ិនប៉ិចទាំង៤ចំណុចរួមមាន ៖
១-ប្រឆាំងបរទេសឈ្លានពាន
២-ប្រឆាំងកុម្មុយនីស្តផ្ដាច់ការ
៣-ប្រឆាំងអំពើពុករលួយ
៤-ការពារអ្នកក្រីក្រ ការពារអ្នកទន់ខ្សោយ ការពារអ្នករងគ្រោះ ដើម្បីផ្ដល់យុត្ដិធម៌ជូនដល់ប្រជារាស្ដ្រ ។
ខ្ញុំសូមពន្យល់ថា ហ្វ៊ុនស៊ិនប៉ិចបានផ្ដួចផ្ដើម ប្រកាសគោលជំហរទាំង៤ចំណុចនេះទ្បើង ប៉ុន្តែជាក់ស្ដែង នៅពេលទៅធ្វើការក្នុងរាជរដ្ឋាភិបាល ទៅដឹកនាំប្រទេសជាមួយគេ បោះបង់ចោល។ ដូច្នេះឧត្ដមគតិនេះនឹងផ្សារភ្ជាប់ហើយគាំទ្រ គណបក្សហ្វ៊ុនស៊ិនប៉ិចកាលពីអាណត្ដិទី១ មកគាំទ្រ សម រង្ស៊ី វិញ» ។
ទោះជាយ៉ាងណា លោក សម រង្ស៊ី បង្ហាញការយល់ឃើញថា ការបោះឆ្នោតដែលត្រឹមត្រូវ ពិតប្រាកដ និងយុត្ដិធម៌ គឺមានតែមួយគត់កាលពីឆ្នាំ១៩៩៣ ដែលគណបក្សឈ្នះឆ្នោតហ្វ៊ុនស៊ិនប៉ិចទទួលបានការគាំទ្រពីប្រជារាស្ដ្រច្រើនមែនទែន ដែលប្រកាន់នូវគោលជំហរ៤ចំណុចរបស់ខ្លួន ។
អ្នកវិភាគរំឭកថា លោក សម រង្ស៊ី ប្រហែលជាភ្លេចហើយថា គណបក្សហ្វ៊ុនស៊ិនប៉ិចដែលឈ្នះឆ្នោតកាលពីឆ្នាំ១៩៩៣នោះ ដោយសារយកព្រះកិត្តិនាមព្រះបរមរតនកោដ្ឋ ទៅឃោសនាប៉ុណ្ណោះ ហើយការឈ្នះនោះក៏មិនច្រើនលើសលប់ដែរ ។ ទោះបីជាបែបណា គណបក្សប្រជាជន មិនបានទទួលស្គាល់លទ្ធផលនោះទេ ប៉ុន្តែបានព្រមព្រៀងក្រោមព្រះតម្រិះព្រះមហាក្សត្រ សម្តេចឪ ៕
ចែករំលែកព័តមាននេះ