យប់ថ្ងៃទី២៤ កញ្ញា តាមដងផ្លូវជាតិលេខ៧ ក្នុងភូមិសាស្ត្រស្រុកស្នួល មេព្រៃរួមជាមួយព្រះរាជអាជ្ញារងមួយរូប លោកធុន បញ្ចៈសន្តិភាព សហការចាប់បានឡានយីឌុបមួយគ្រឿងដឹកឈើប្រណីត ដោយដាក់ជំនៀរឈើគ្របពីលើ ជាមួយអ្នកបើកបរម្នាក់ផងដែរ ឈ្មោះខន ខេមរា អាយុ៣០ឆ្នាំ វ៉ៃខ្នោះដៃភ្លាមៗ ។
អ្នកបើកបរប្រាប់សមត្ថកិច្ចថា នេះជាឈើរបស់ឧកញ៉ា សី ឯខ្លួនគ្រាន់តែជាអ្នកបើកបរប៉ុណ្ណោះ ។
ព្រះរាជអាជ្ញារងបានទុកឱកាសនេះឱ្យមេព្រៃយកឈើទៅទុកម្តុំ ហើយវាស់វែងមានឈើ៣០ម៉ែត្រគូប ដែលអ្នកបើកបរប្រាប់ថា ដឹកមកពីព្រៃសម្បទានសេដ្ឋកិច្ចនៅតំបន់លំផាត់ និងជាឈើប្រមូលទិញពីតំបន់ព្រៃការពារ យកមកដាក់ក្នុងដីព្រៃសម្បទានដែលរិចរិល។
សមត្ថកិច្ចបានបញ្ជាក់ច្បាស់ថា ជាឈើចោរ ជាឈើអត់ច្បាប់ ដែលឧកញ៉ា សី ជាឈ្មួញធ្លាប់ធ្វើមានបានយូរឆ្នាំមកហើយ នៅក្នុងខេត្តរតនគិរី ។
មិនដឹងមួយណាទេ ឈ្មោះឧកញ៉ា សី ។ ប៉ុន្តែនៅប៉ែកខាងខេត្តរតនគិរី ក្រចេះ ស្ទឹងត្រែង មានឈ្មួញឈើដ៏ក្លាហានម្នាក់ឈ្មោះឧកញ៉ា រិទ្ធ ពិសី ។ ដូច្នេះឈ្មោះឧកញ៉ា សី ក្លាយមកពីឈ្មោះឧកញ៉ា ពិសី ក៏មិនច្បាស់ដែរ ព្រោះរកអ្នកស្គាល់ច្បាស់មិនទាន់
បាន។
ប្រភពជាច្រើននៅខេត្តរតនគិរីប្រាប់កោះសន្តិភាពថា ឈ្មោះឧកញ៉ា សី ជាឈ្មួញឈើដ៏ល្បីល្បាញយូរមកហើយ នៅតាមដងផ្លូវជាតិលេខ៧ កម្រចាប់បានណាស់ ចេះតែរបូតរលូតរហូតដល់មេមត់ ខេត្តត្បូងឃ្មុំ ក៏បាត់តែម្តង ដែលគេសង្ស័យថា កំបាំងកាយនៅច្រកទ្វារទន្លេចាម ជាប់ព្រំដែនយួន ។
ប្រភពខ្លះនិយាយថា ចាប់បានច្រើនដងដែរ ប៉ុន្តែចេះតែរបូតទៅវិញ ។ ដូច្នេះចាំមើល ចាប់លើកនេះ តើអាចរបូតដូចមុនដែរឬអត់? មានព័ត៌មានប្លែក យើងនឹងផ្សាយជូនបន្តទៀតលើករណីមួយនេះ និងចង់ដឹងថា តើមួយណាឈ្មោះឧកញ៉ា សី ។
ចែករំលែកព័តមាននេះ