រាជធានីភ្នំពេញ ៖ ក្រុមអង្គការសង្គមស៊ីវិលប្រមាណ៤០អង្គការ និងសហគមន៍ បានសម្តែងនូវការខកចិត្តយ៉ាងខ្លាំង ចំពោះការអនម័តរបស់សភាជាតិ នៃសាធារណរដ្ឋប្រជាធិបតេយ្យប្រជាមានិតឡាវ លើកិច្ចសន្យាសម្បទានរបស់គម្រោងសាងសង់ទំនប់វារីអគ្គិសនី ដនសាហុង ។
យោងតាមសេចក្ដីប្រកាសព័ត៌មានរបស់សង្គមស៊ីវិល ដែលចេញផ្សាយនៅថ្ងៃទី ២១ ខែកញ្ញា បានឲ្យដឹងថា ការអនុម័តទៅលើកិច្ចសន្យាសម្បទានរបស់សភាជាតិឡាវ ធ្វើឡើងក្នុងខណៈពេលដែលសំណូមពរទាំងឡាយរបស់ប្រទេសជាសមាជិកនៃគណៈកម្មការទន្លេមេគង្គទាំង៣ប្រទេស (កម្ពុជា វៀតណាម ថៃ) ព្រមទាំងសហគមន៍ផ្នែកខាងក្រោមនៃទន្លេមេគង្គ និងអង្គការសង្គមស៊ីវិលនានា មិនទាន់ត្រូវបានឆ្លើយតប និងដោះស្រាយប្រកបដោយអត្ថន័យនៅឡើយ ផ្អែកទៅលើ «នីតិវិធីសម្រាប់ការជូនដំណឹង ការពិគ្រោះយោបល់ជាមុន និងកិច្ចព្រមព្រៀង (PNPCA)» ចំពោះទំនប់វារីអគ្គិសនី ដនសាហុង កាលពីថ្ងៃទី១២ ខែធ្នូ ឆ្នាំ២០១៤ និងមិនទាន់មានការឆ្លើយតបជាផ្លូវការរបស់រដ្ឋាភិបាលកម្ពុជា វៀតណាម និងថៃ ដែលបានដាក់ជូនគណៈកម្មការទន្លេមេគង្គ(MRC) នៅដើមឆ្នាំ ២០១៥ កន្លងមកនេះ ។
ប្រភពដដែលបន្តថា លើសពីនេះទៅទៀត រដ្ឋាភិបាលឡាវមិនបានគោរពស្មារតីនៃកិច្ចប្រជុំកាលពីថ្ងៃទី១៩ ខែមិថុនា ឆ្នាំ២០១៥ ដែលសមាជិកទាំងបួននៃគណៈកម្មការទន្លេមេគង្គ មាន កម្ពុជា ឡាវ ថៃ និងវៀតណាម បានឯកភាពគ្នាថា ការសម្រេចទៅលើការពិគ្រោះយោបល់ជាមុននៃទំនប់វារីអគ្គិសនីដែលកំពុងស្នើឡើងនេះ ត្រូវបញ្ជូនបន្តទៅពិភាក្សា និងសម្រេចនៅកម្រិតក្រុមប្រឹក្សា (Council) ដែលរួមមានរដ្ឋាភិបាលកម្រិតថ្នាក់ដឹកនាំកំពូលនៃប្រទេសទាំងបួន ពីព្រោះពួកគេមិនអាចឈានដល់ការឯកភាពជារួមមួយពីដំណើរការនៃគម្រោងនេះ ។
ជាមួយគ្នានេះ ក្រុមអង្គការសង្គមស៊ីវិលបានបន្តស្នើសុំយ៉ាងទទូច ចំពោះការអនុម័តរបស់សភាជាតិ នៃសាធារណរដ្ឋប្រជាធិបតេយ្យប្រជាមានិតឡាវ លើកិច្ចសន្យាសម្បទានរបស់គម្រោងសាងសង់ទំនប់វារីអគ្គិសនី ដន សាហុង នូវចំណុចមួយចំនួនដូចជា ៖
ទី១-បញ្ឈប់ជាបន្ទាន់នូវរាល់សកម្មភាពទាំងឡាយ ពាក់ព័ន្ធនឹងការសាងសង់ទំនប់ ដនសាហុង ។
ទី២-មិនត្រូវអនុម័តលើកិច្ចសន្យាទិញអគ្គិសនី (Power Purchase Agreement) មុនពេលដែលបញ្ហាឬសំណូមពរទាំងឡាយរបស់ភាគីពាក់ព័ន្ធមិនទាន់បានដោះស្រាយ ។
ទី៣-កុំបន្តឲ្យមានការចុះកិច្ចសន្យាផ្សេងទៀតលើគម្រោងនេះ ដោយរួមបញ្ចូលទាំងកិច្ចព្រមព្រៀងលទ្ធកម្មវិស្វកម្មទំនប់ និងការសាងសង់ ។
ទី៤-ធ្វើការសិក្សាវាយតម្លៃហេតុប៉ះពាល់ឆ្លងដែន ដោយស្ថាប័នប្រឹក្សាយោបល់ឯករាជ្យ ដោយមានការចូលរួមពេញលេញពីភាគីពាក់ព័ន្ធ (សហគមន៍ដែលនឹងរងផលប៉ះពាល់ និងអង្គការសង្គមស៊ីវិល) ។
ទី៥-ជំរុញឱ្យមានការជជែកដោះស្រាយ និងឯកភាពនូវរាល់សំណូមពរ និងក្តីព្រួយបារម្ភរបស់ភាគីពាក់ព័ន្ធនានា ប្រកបដោយការទទួលខុសត្រូវខ្ពស់ ។
ទី៦-រដ្ឋាភិបាលទាំងអស់ជាសមាជិកនៃគណៈកម្មការទន្លេមេគង្គ ត្រូវដាក់សម្ពាធតាមគ្រប់រូបភាពទៅលើរដ្ឋាភិបាលឡាវ ដែលបានធ្វើការសម្រេចលើការបន្តគម្រោងសាងសង់ទំនប់ដនសាហុង ជាឯកតោភាគី ។
ជាបន្តបន្ទាប់ ការប្រឆាំងនឹងគម្រោងសាងសង់ទំនប់វារីអគ្គិសនីដ៏ធំបំផុតតាមដងទន្លេមេគង្គព្រោះតែធ្វើឱ្យមានការព្រួយបារម្ភពីហានិភ័យលើដងទន្លេមេគង្គដែលហូរកាត់ប្រទេសកម្ពុជា និងវៀតណាម ដែលនៅភាគខាងក្រោម ជាពិសេសប្រទេសកម្ពុជាតែម្តងដែលវារីអគ្គិសនីនេះនៅចម្ងាយប្រមាណ២គីឡូម៉ែត្រពីព្រំដែនកម្ពុជា ។
ទោះបីជាបែបណា ប្រតិកម្មពីរាជរដ្ឋាភិបាលនៅមិនទាន់បានបង្ហាញនូវជំហរបែបណានៅឡើយទេ ។ ក្រុមអ្នកអភិរក្សធម្មជាតិបានបង្ហាញថា បើទំនប់នោះត្រូវបានសាងសង់មែននោះ បណ្តាជីវចម្រុះនានានៅទន្លេមេគង្គផ្នែកខាងលើរបស់កម្ពុជា នឹងជួបគ្រោះហានិភ័យមិនខាន ៕
ចែករំលែកព័តមាននេះ