ខេត្តកំពត ៖ ក្នុងខេត្តកំពតគេសម្គាល់ឃើញថា ក្នុងត្រពាំង បឹងបួ ព្រែកធ្លាប់តែមានទឹកដក់ជាប់មិនដែលរីងស្ងួត ស្រាប់តែរដូវវស្សាឆ្នាំនេះរីងស្ងួតទាំងអស់រកតែទឹកគោក្របីផឹកស្ទើរតែមិនបានផង។
ពលរដ្ឋម្នាក់ឈ្មោះឈិន ចាន្ធី ភេទប្រុស អាយុ៥៣ឆ្នាំ នៅភូមិឈើទាល ឃុំស្តេចគង់ខាងលិច ស្រុកបន្ទាយមាសបានប្រាប់ឱ្យដឹងថា ឆ្នាំនេះគ្រួសារគាត់មិនបានស្ទូងបានមួយកណ្តាប់ដល់ដីទេ ដោយសារតែអត់មានទឹកភ្លៀង ម្យ៉ាងវិញទៀតមិនមានប្រភពសម្រាប់បូមដាក់សំណាប។
លោកឈិន ចាន្ធី និយាយថា រដូវវស្សាចូលមកដល់ហើយបែរជាសំណាបងាប់អស់ តើឱ្យពួកគាត់សង្ឃឹមអ្វី? ពលរដ្ឋម្នាក់ឈ្មោះព្រំ យិន ភេទប្រុស អាយុ៦៨ឆ្នាំ នៅភូមិឈើទាលក៏មានការព្រួយបារម្ភដែរ ដោយសារភូមិស្រុករបស់គាត់ជួបនឹងគ្រោះរាំងស្ងួតធ្វើឱ្យសំណាបសន្ទូងស្វិត និងងាប់អស់បណ្តើរៗ។
ព្រំ យិន អ្នកភូមិឈើទាលបាននិយាយថា រូបគាត់ក៏ដូចជាអ្នកភូមិឈើទាលទាំងអស់ម្នាក់ៗស្រែមានតិច តែបើមិនបានស្ទូងទេឆ្នាំក្រោយពិតជាខ្វះអង្ករច្រកឆ្នាំងហើយ ។
លោកខូយ ឃុនហ៊ួរ អភិបាលខេត្តកំពតបានថ្លែងឱ្យដឹងក្នុងពិធីសម្ពោធផ្លូវទៅកន្លែងគ្រោងធ្វើរោងចក្រក្រុមហ៊ុនជីបម៉ុងថា ស្រុកដែលជួបការរាំងស្ងួតមាន ១-ស្រុកបន្ទាយមាស,២-ស្រុកអង្គរជ័យ, ៣-ស្រុកដងទង់ និង៤-ស្រុកជុំគិរី៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ