ខេត្តកំពង់ចាម ៖ ដោយមើលឃើញបទល្មើសសេនេសាទខុសច្បាប់សម្បូរនៅក្នុងតំបន់B6 ស្ថិតនៅជាប់ព្រំប្រទល់៣ឃុំ មាន ឃុំរកាអា ឃុំកងតាណឹង និងឃុំស្តៅ ស្រុកកងមាស ទោះបីជាកម្លាំងសមត្ថកិច្ចចម្រុះតែងតែធ្វើការបង្ក្រាបជារឿយៗយ៉ាងណាក៏ដោយ ក៏បទល្មើសនេសាទនៅតែមានដដែល ។
ហេតុដូច្នេះហើយ ទើប លោក យុទ្ធ ប៊ូថង រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងលោក អេង ជាសាន ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានរដ្ឋបាលជលផល បានដឹកនាំកម្លាំងចុះបង្ក្រាបបន្តទៀត ដោយធ្វើឡើងស្ទើរពេញ១ថ្ងៃ នៅថ្ងៃទី២ កញ្ញា ២០១៥ រឹបអូបបានលូស្បៃមុង៨៩មាត់ របាំងស្បៃមុងប្រវែង
៤.៤៥០ម៉ែត្រ បង្គោល១.៣៣៥ដើម ព្រមទាំងចាក់លែងកូនត្រីចម្រុះចំនួន៤៤៥គីឡូក្រាមផងដែរ ។
លោក អ៊ុក ណារិន នាយខណ្ឌរដ្ឋបាលជលផលខេត្ត បានឲ្យដឹងថា ស្របពេលដែលទឹកទន្លេមេគង្គបានជន់លិចតាមបឹងបួរនានានោះនៅតំបន់B6 ស្រុកកងមាស ដែលមានបឹងមួយធំជាងគេលាតសន្ធឹងដោយជាប់នឹងឃុំចំនួន៣ខាងលើ ថែមទាំងសម្បូរទៅដោយបទល្មើសនេសាទខុសច្បាប់ជាច្រើនដែលក្រុមជនខិលខូចដាក់ស្បៃមុង ចាប់យកត្រីគ្រប់ប្រភេទល្មើសទៅនឹងច្បាប់នេសាទ ។
លោកនាយខណ្ឌរដ្ឋបាលជលផលខេត្ត បានបញ្ជាក់ថា នៅតំបន់ខាងលើសម្បូរទៅដោយបទល្មើសនេសាទជាច្រើន គ្រាន់តែកម្លាំងដកថយត្រឡប់មកអង្គភាពវិញ គឺក្រុមជនខិលខូចបានបន្តនេសាទដដែល ហាក់បីដូចជាផ្គើនសមត្ថកិច្ច និងវែកចកដូច្នោះដែរ ទើបថ្នាក់លើបន្តយកចិត្តទុកដាក់ចុះបង្ក្រាបជាលក្ខណៈទ្រង់ទ្រាយធំនៅស្រុកកងមាស សំដៅធ្វើយ៉ាងណាឲ្យបទល្មើសនេសាទបានថមថយតិចទៅៗ ។
ក្នុងករណីប្រសិនបើឃើញជនដដែលៗនៅតែបន្តប្រើប្រាស់ឧបករណ៏នេសាទខុសច្បាប់នោះ សមត្ថកិច្ចនឹងចាប់ខ្លួនបញ្ជូនទៅសាលាដំបូងខេត្ត ចាត់ការតាមច្បាប់ ៕
ចែករំលែកព័តមាននេះ