ខេត្តតាកែវ ៖ ជនជាតិវៀតណាមស្នាក់នៅខុសច្បាប់ចំនួន១២នាក់ត្រូវបានប៉ូលិសអន្តោប្រវេសន៍ក្រសួងចុះឃាត់ខ្លួននៅចំណុចភូមិស្នោ សង្កាត់រកាក្នុង ក្រុងដូនកែវ កាលពីថ្ងៃទី២ កញ្ញា ២០១៥ រួចធ្វើសំណុំបែបបទបញ្ជូនទៅស្រុកកំណើតវិញ។
ប៉ូលិសការិយាល័យអន្តោប្រវេសន៍ខេត្តបាននិយាយថា អនុវត្តទៅតាមបទបញ្ជាពីលោកនាយឧត្តមសេនីយ៍នេត សាវឿន អគ្គស្នងការនគរបាលជាតិ និងអនុវត្តបទបញ្ជាផ្ទាល់ពីលោកឧត្តមសេនីយ៍ត្រី អ៊ុក សំណាង ស្នងការនគរបាលខេត្តតាកែវផងនោះ ការិយាល័យអន្តោប្រវេសន៍ខេត្តបានសហការជាមួយប៉ូលិសអគ្គនាយកដ្ឋានអន្តោប្រវេសន៍ក្រសួងបានចុះស្រាវជ្រាវ និងត្រួតពិនិត្យនៅចំណុចភូមិខាងលើឃើញមានជនជាតិវៀតណាមស្នាក់នៅដោយខុសច្បាប់ចំនួន១២នាក់ ក្នុងនោះស្រី៨នាក់រួចនាំមកសាកសួរនៅការិយាល័យអន្តោប្រវេសន៍ខេត្ត ។
លោកឧត្តមសេនីយ៍ត្រី អ៊ុក ច័ន្ទកុសល ស្នងការរងបានឱ្យដឹងថា ជនជាតិវៀតណាមដែលបានចូលមកស្នាក់នៅខុសច្បាប់ទាំងនោះចូលមកតាមច្រកបាវិត ខេត្តស្វាយរៀង ច្រកទ្វារអន្តរជាតិភ្នំដិន និងច្រកទ្វារទ្វេភាគីកំពង់ក្រសាំង ដែលមកស្នាក់នៅ និងបម្រើការងារមិនស្របច្បាប់ ដោយគ្មានលិខិតស្នាមអ្វីទាំងអស់ ហើយជនអន្តោប្រវេសន៍ខុសច្បាប់ទាំង១២នាក់នេះនឹងស្នើសុំបញ្ជូនទៅអគ្គនាយកដ្ឋានអន្តោប្រវេសន៍ដើម្បីចាត់វិធានការបន្ត៕
ចែករំលែកព័តមាននេះ