រាជធានីភ្នំពេញ ៖ រថយន្តលុច្សស៊ីសមួយគ្រឿង ពណ៌ខ្មៅ មិនចាំស្លាកលេខ បានបើកទៅកៀរអ្នកជិះម៉ូតូម៉ាកគុបមូលមួយគ្រឿង ពណ៌ទឹកប៊ិច ពាក់ស្លាកលេង ស៊េរីចាស់ ឌ.៥៨០៣ ភព១ បណ្តាលឲ្យដួលបោកទៅនឹងថ្នល់រងរបួសធ្ងន់ ហើយត្រូវបានអ្នកឃើញហេតុការណ៍ហៅរថយន្តសង្គ្រោះដឹកទៅសង្គ្រោះភ្លាមៗ ។
ហេតុការណ៍គ្រោះថ្នាក់ខាងលើនេះបានកើតឡើង កាលពីវេលាម៉ោង១ និង២០នាទីយប់ឈានចូលថ្ងៃទី៣ កញ្ញា ២០១៥ ស្ថិតនៅតាមបណ្តោយផ្លូវលេខ២៧១ ក្នុងសង្កាត់បឹកសាឡាង ខណ្ឌទួលគោក ខាងត្បូងវិទ្យាល័យជាស៊ីមសាមគ្គី ។
ដោយឡែកអ្នកបើកបររថយន្តមិនត្រូវបានស្គាល់អត្តសញ្ញាណទេ ចំណែកជនរងគ្រោះក៏មិនស្គាល់អត្តសញ្ញាណដែរ ដោយបើកបរម៉ូតូតាមផ្លូវលេខ២៧១ ក្នុងទិសដៅពីជើងទៅត្បូង ពេលជិះមកដល់ចំណុចកើតហេតុហួសវិទ្យាល័យជាស៊ីមសាមគ្គីប្រហែល២០ម៉ែត្រស្រាប់តែរថយន្តបង្កបើកយ៉ាងលឿនតាមបណ្តោយផ្លូវលេខ២៧១ ក្នុងទិសដៅស្របគ្នាជាមួយម៉ូតូក៏ជ្រុលចង្កូតទៅកៀរម៉ូតូធ្វើឲ្យជនរងគ្រោះដួលបោកនឹងថ្នល់ របួសធ្ងន់តែម្តង ។
ប្រភពពីអ្នកឃើញហេតុការណ៍បានឲ្យដឹងថា ពេលរថយន្តបើកកៀរម៉ូតូជនរងគ្រោះហើយ មិនបានឈប់មើលនោះទេក៏បន្ថែមល្បឿនបើកគេចខ្លួនបាត់ ។ ចំណែកជនរងគ្រោះត្រូវបានអ្នកឃើញហេតុការណ៍ហៅរថយន្តសង្គ្រោះដឹកទៅព្យាបាលនៅគ្លីនិកជិតនោះ ៕
ចែករំលែកព័តមាននេះ