លោកអាម៉ាឌីណឺហ្សាដ ៖ អ៊ីស្រាអែលមិនអាចវាយប្រហារអ៊ីរ៉ង់់បានឡើយ
ដោយ ៖ ប្រុសកោះ
ថ្ងៃចន្ទ ទី៦ ខែកញ្ញា ឆ្នាំ២០១០ ម៉ោង ១០:៣៩
គេហទំព័របរទេស
ប្រមុខកងទ័ពអ៊ីស្រាអែលដែលទើបតែងតាំង
ប្រធានាធិបតីអ៊ីរ៉ង់ លោកម៉ាមូដ អាម៉ាឌីណឺហ្សាដ ថ្លែងកាលពីថ្ងៃទី៥ កញ្ញា ថា អ៊ីស្រាអែលមិនអាចវាយប្រហារលើអ៊ីរ៉ង់បានឡើយ ដោយលោកបានច្រានចោលចំពោះការប្រលយពាក្យវាយប្រហាររបស់អ៊ីស្រាអែលលើប្រទេសរបស់លោកចំពោះសកម្មភាពនុយក្លេអ៊ែរ ។ លោកអាម៉ាឌីណឺហ្សាដ ថ្លែងថា អ៊ីស្រាអែលដែលជាប្រទេសកាន់សាសនាជ្វីហ្វមានភាពផុយស្រួយណាស់មិនអាចវាយប្រហារអ៊ីរ៉ង់បានឡើយ ។
លោកម៉ាមូដ អាម៉ាឌីណឺហ្សាដ បានថ្លែងដូច្នេះក្នុងឱកាសនៃសន្និសីទកាសែតមួយដែលរៀបចំឡើងនៅក្នុងទីក្រុងដូហា ប្រទេសកាតារ ។ លោកអាម៉ាឌីណឺហ្សាដ បានអញ្ជើញទៅដល់ទីក្រុងដូហា កាលពីថ្ងៃទី៥ កញ្ញា ដើម្បីជួបពិភាក្សាជាមួយព្រះមហាក្សត្រនៃប្រទេសកាតារ Emir Sheikh Hamad bin Khalifa Al Thani ។
លោកអាម៉ាឌីណឺហ្សាដ ថ្លែងថា ពុំមានសង្គ្រាមប្រឆាំងអ៊ីរ៉ង់ឡើយ ហើយរាល់ការគំរាមកំហែងទាំងអស់ដែលលេចចេញពីអ៊ីស្រាអែល និងសហរដ្ឋអាេមរិកជារឿងដែលគ្មានអ្វីត្រូវព្រួយបារម្ភឡើយ ។ លោកប្រធាធិបតីបានថ្លែងបន្តទៀតថា អ៊ីរ៉ង់បានត្រៀមខ្លួនរួចជាស្រេច ហើយអាចវាយប្រហារប្រឆាំងការឈ្លានពាន និងការរំលោភបំពានទាំងឡាយ ។ ប្រទេសលោកខាងលិច និងអ៊ីស្រាអែលបាននិងកំពុងសង្ស័យថា អ៊ីរ៉ង់បន្តកម្មវិធីនុយក្លេអ៊ែរសំរាប់ទិសដៅយោធារបស់ខ្លួន ៕
