ខេត្តកោះកុង ៖ ការតវ៉ាដ៏រ៉ាំរ៉ៃមួយដែលអូសបន្លាយចាប់ពីថ្ងៃទី១៩ សីហា ២០១៥ រហូតដល់ថ្ងៃទី០២ កញ្ញា ២០១៥ ធ្វើឡើងដោយប្រជាពលរដ្ឋប្រមាណពី១៥នាក់ ទៅ២០នាក់ ក្នុងមួយថ្ងៃៗមកពីតំបន់អារ៉ែងខ្លះ និងក្រុមបះបោរមកពីខេត្តផ្សេងៗទៀត តវ៉ានៅមុខសាលាដំបូងខេត្តកោះកុង សុំឱ្យមានការដោះលែងយុវជនចំនួន៣នាក់ ដែលត្រូវបានសាលាដំបូងខេត្តចាប់ឃុំខ្លួនតាំងពីថ្ងៃ១៩ សីហា ២០១៥ រហូតមក ខណៈពេលយុវជនទាំង៣នាក់ បានដឹកនាំប្រជាពលរដ្ឋជាច្រើននាក់ អះអាងខ្លួនជាសកម្មជនរបស់អង្គការមាតាធម្មជាតិ ចូលទៅបង្កចលាចល អសន្តិសុខ ក្នុងម៉ោងរដ្ឋបាលរបស់សាលាស្រុកបទុមសាគរ កាលពីចុងខែកក្កដា និងដើមខែសីហា ២០១៥ កន្លងទៅ ។
មិនតែប៉ុណ្ណោះ បានធ្វើការរារាំងដល់ក្រុមហ៊ុនបូមខ្សាច់មួយឈ្មោះដាយរិច អេសេស (Diric Acces) នៅព្រែកអណ្តូងទឹក បំផ្លាញគ្រឿងចក្រ និងជេរប្រមាថកម្មករបូមខ្សាច់ និងអូសជន្លៀសសាឡង់យកទៅលាក់ដូចជាសកម្មភាពប្លន់យ៉ាងដូច្នេះ ។
ប្រភពពីខេត្តកោះកុងរាយការណ៍ថា នៅវេលាម៉ោង៩ព្រឹកថ្ងៃទី០២ កញ្ញា ២០១៥ នេះ មានប្រជាពលរដ្ឋមកពី២សង្កាត់ គឺសង្កាត់ដងទង់ និងសង្កាត់ស្មាច់មានជ័យចំនួនប្រមាណជាង១៣០នាក់ បានមកធ្វើការតវ៉ាប្រឆាំង និងបណ្តេញក្រុមអ្នកតវ៉ានៅមុខសាលាដំបូងជាច្រើនថ្ងៃមកហើយនោះ ដោយបានចោទថា បានធ្វើឱ្យប៉ះពាល់ដល់សន្តិសុខ សណ្តាប់ធ្នាប់សង្គម និងរំខានដល់ការប្រកបមុខរបររកស៊ីរបស់ពួកគាត់អស់ជាច្រើនថ្ងៃ ។
មិនតែប៉ុណ្ណោះ ក្រុមពលរដ្ឋដែលមកបណ្តេញអ្នកតវ៉ារ៉ាំរ៉ៃទាំងនោះថា កុំធ្វើអ្វីតាមតែការបញ្ជាអ្នកនៅពីក្រោយខ្នង ។
ចែករំលែកព័តមាននេះ