ខេត្តព្រះសីហនុ ៖ ស្លាបមាន់ ជង្គង់មាន់ និងប្រហិត ដែលនាំមកពីប្រទេសថៃ ត្រូវបានគេសង្កេតឃើញថា មានការដាក់លក់គ្រប់ទីកន្លែង គ្រប់ច្រកល្ហកនៅក្នុងក្រុងព្រះសីហនុ
ខេត្តព្រះសីហនុ ៖ ស្លាបមាន់ ជង្គង់មាន់ និងប្រហិត ដែលនាំមកពីប្រទេសថៃ ត្រូវបានគេសង្កេតឃើញថា មានការដាក់លក់គ្រប់ទីកន្លែង គ្រប់ច្រកល្ហកនៅក្នុងក្រុងព្រះសីហនុ ហើយក៏ជាចំណីអាហារដ៏ពេញនិយមរបស់ពលរដ្ឋខ្មែរ ប៉ុន្តែអ្វីដែលគួរឱ្យព្រួយបារម្ភនោះ គឺចំណីអាហារទាំងនេះគេពុំដែលបានឃើញមន្ត្រីជំនាញកាំកុងត្រូល ចុះត្រួតពិនិត្យអំពីគុណភាព និងផលប៉ះពាល់នានាម្តងណាឡើយ ជាពិសេសនៅទីតាំងចែកចាយស្លាបមាន់ ជង្គង់មាន់ និងប្រហិត ។
ប្រជាពលរដ្ឋនៅខេត្តព្រះសីហនុ បានបញ្ចេញទស្សនៈដូចៗគ្នាថា បន្ទាប់ពីមានការផ្សាយព័ត៌មានពាក់ព័ន្ឋទៅនឹងផលប៉ះពាលចំណីអាហាររបស់កុមាររួចមក គេសង្កេតឃើញ មន្ត្រីជំនាញកាំកុងត្រួលគ្រប់បណ្តាលខេត្ត ជាពិសេសខេត្តព្រះសីហនុ បានស្ទុះស្ទារចុះពិនិត្យគួរឱ្យសរសើរ ប៉ុន្តែអ្វីដែលគួរឱ្យសោកស្តាយនោះ ចំណីអាហារដែលកំពុងប្រឈមខ្លាំងចំពោះមនុស្សធំ និងកុមារនោះ បែរជាមន្ត្រីកាំកុងត្រូលហាក់ធ្វើពុំដឹង ពុំឮទៅវិញ ដូចជា ស្លាបមាន់ ជង្គង់មាន់ និងប្រហិត ដែលឈ្មួញនាំចូលមកពីប្រទេសថៃដោយមានច្បាប់ខ្លះ អត់ច្បាប់ខ្លះ លក់ទាំងតោនៗក្នុងមួយថ្ងៃ ពុំឃើញមានការត្រួតពិនិត្យពីមន្ត្រីកាំកុងត្រូលឡើយ ។
ប្រភពដដែលបានបន្តថា ចំពោះចំណីអាហារ ដូចជា ស្លាបមាន់ ជង្គង់មាន់ និងប្រហិត ទាំងនេះ ពួកគាត់ពុំបានដឹងថា មានផលប៉ះពាល់ប៉ុណ្ណាទេ ប៉ុន្តែពួកគាត់មានការសង្ស័យថា ចំណីអាហារទាំងនេះពិតណាស់កំពុងបំផ្លាញដល់សុខភាពរបស់ពួកគាត់យ៉ាងពិតប្រាកដ ព្រោះនៅលើចំណីអាហារទាំងនេះ ហាក់ពុំមានការប្រែប្រួលបន្តិចឡើយ បើទោះបីការរក្សាទុកមានរយៈពេលយូរយ៉ាងណាក្តី ។
អាស្រ័យហេតុនេះ ដើម្បីសុខភាពកូនចៅរបស់ពួកគាត់ ក៏ដូចជាសុខភាពរបស់ប្រជាពលរដ្ឋទាំងអស់ ពួកគាត់សូមអំពាវនាវយ៉ាងទទូចដល់ថ្នាក់ដឹកនាំ ស្ថាប័នពាក់ព័ន្ឋ សូមមេត្តាចុះធ្វើការត្រួតពិនិត្យផង ព្រោះនៅខេត្តព្រះសីហនុ កំពុងធំក្លិនអំពីភាពមិនប្រក្រតីជុំវិញការនាំចូលចំណីអាហារទាំងនេះ ។
លោក ជា ប៉ិច មន្ត្រីសាខាកាំកុងត្រូលខេត្ត បានបញ្ជាក់ថា ចំពោះការនាំចូលចំណីអាហារ ដូចជា ស្លាបមាន់ ជង្គង់មាន់ និងប្រហិត ពីប្រទេសថៃនេះ គាត់ពុំបានដឹងនោះទេ ប៉ុន្តែនៅតាមមាត់ច្រកមន្ត្រីកាំកុងត្រូលបានធ្វើការរត្រួតពិនិត្យរួចហើយ ឯបញ្ហាពាក្យចចាមអារ៉ាមទាក់ទិនទៅនឹងចំណីអាហារខាងលើនេះ គាត់សូមទទួលស្គាល់ ចំពោះចំណីអាហារដែលនាំចូលមកពីប្រទេសថៃ មានការដាក់លក់នៅលើទីផ្សារប្រាកដមែន លោកនឹងធ្វើរបាយការណ៍ជូនថ្នាក់លើ ដើម្បីឆ្លងយោបល់សុំការចុះត្រួតពិនិត្យ អំពីបាតុភាពទាំងនេះ ៕
ចែករំលែកព័តមាននេះ