រាជធានីភ្នំពេញ ៖ ក្រុមហ៊ុនអាកាសចរណ៍ហុងកុង HK Express បើកការហោះហើរត្រង់ដំបូងរបស់ខ្លួនមកកាន់ខេត្តសៀមរាប ដើម្បី ពង្រីកផ្លូវហោះហើរថ្មី និងតភ្ចាប់បណ្តាញដឹកជញ្ជូនផ្លូវអាកាសរវាងទីក្រុងហុងកុង-កម្ពុជា និងកម្ពុជា-ហុងកុង ដែលជាកាតាលីករជំរុញនូវសក្ដានុពលសេដ្ឋកិច្ចរវាងទីក្រុងទាំងពីរ ។ នេះបើយោងតាមសេចក្តីប្រកាសព័ត៌មានរបស់អាកាសយានដ្ឋានអន្តរជាតិសៀមរាប ។
សេចក្តីប្រកាសព័ត៌មានដដែលបានឲ្យដឹងថា វត្តមាននៃក្រុមហ៊ុនអាកាសចរណ៍ HK Express មកកាន់អាកាសយានដ្ឋានអន្តរជាតិខេត្តសៀមរាបនាពេលនេះ គឺឈានមួយជំហានទៀតក្នុងការតភ្ជាប់របស់ខ្លួនពីហុងកុង-សៀមរាប និងសៀមរាប-ហុងកុង ដែលជាការហោះហើរប្រចាំថ្ងៃ ក្នុងនោះក្រុមហ៊ុនអាកាសចរណ៍Dragonair ក៏ប្រតិបត្តិការហោះហើរដូចទៅនឹងHK Express ដែរ ។
លោក Bruno Désveaux ប្រធានគ្រប់គ្រងទូទៅនៃអាកាសយានដ្ឋានអន្តរជាតិសៀមរាបមានប្រសាសន៍ថា ៖ « យើងត្រេកអរនឹងស្វាគមន៍ការមកដល់ក្រុមហ៊ុនអាកាសចរណ៍ HK Express ដែលជាក្រុមហ៊ុនមួយក្នុងចំណោមក្រុមហ៊ុនអាកាសចរណ៍ដឹកជញ្ជូនដែលមានតម្លៃទាប និងរហ័សនៅក្នុងតំបន់ ។ នេះជាឱកាសដ៏ល្អបំផុតក្នុងការផ្តល់សេវាកម្មដឹកជញ្ជូនតាមផ្លូវអាកាសមកកាន់ខេត្តសៀមរាប ដែលជាគោលដៅទេសចរណ៍មួយរបស់កម្ពុជា ។ ក្នុងពេលថ្មីៗនេះ ទីក្រុងសៀមរាបត្រូវបានទទួលចំណាត់ថ្នាក់លេខ១ចំពោះការធ្វើដំណើរមកកម្សាន្តរបស់ភ្ញៀវទេសចរនៅជុំវិញពិភពលោក ដែលវាយតម្លៃដោយ Lonely Planet ហើយក៏បានជាប់ចំណាត់ថ្នាក់លេខ២ជាតំបន់ទេសចរណ៍ល្អបំផុតលើពិភពលោក ដោយគេហទំព័រTripAdvisor ផងដែរ » ។
លោក Sherman Luk អ្នកគ្រប់គ្រងទូទៅប្រចាំតំបន់អាស៊ីប៉ាស៊ីហ្វិករបស់ក្រុមហ៊ុនHK Express មានប្រសាសន៍ក្នុងពិធីស្វាគមន៍ក្រុមហ៊ុនអាកាសចរណ៍HK Express ដែលបានចុះចតនៅអាកាសយានដ្ឋានអន្តរជាតិសៀមរាបថា HK Express បានចំណាយពេលជិត២ឆ្នាំដើម្បីតភ្ចាប់ការដឹកជញ្ជូនផ្លូវអាកាសរវាងហុងកុងនិងសៀមរាបអង្គរនេះ ។
លោក Sherman Luk បញ្ជាក់ថា ៖ «យើងនាំនូវក្តីសង្ឃឹមជូនអតិថិជនជាអ្នកដំណើរនៅកម្ពុជា និងនៅហុងកុង ជាមួយនឹងការធ្វើដំណើរទៅមកហុងកុង-សៀមរាប សៀមរាប-ហុងកុង ក្នុងតម្លៃមួយដ៏សមរម្យ ដោយក្នុងសប្តាហ៍ដំបូងនៃការសម្ពោធនេះ តម្លៃក្នុងការធ្វើដំណើរតាមជើងហោះហើរ HK Express ត្រឹមតែ៣៥ដុល្លារប៉ុណ្ណោះ ដែលមានចំនួន៣ជើងក្នុងមួយសប្តាហ៍ គឺថ្ងៃអង្គារ ព្រហស្បតិ៍ និងថ្ងៃអាទិត្យ » ។
លោក កៅ ស៊ីវន អគ្គនាយកទទួលបន្ទុកផ្នែកបច្ចេកទេសនៃរដ្ឋលេខាដ្ឋានអាកាសចរស៊ីវិលកម្ពុជាមានប្រសាសន៍ថា វាជាឱកាសល្អសម្រាប់ប្រទេសកម្ពុជាចំពោះវត្តមានថ្មីរបស់ក្រុមហ៊ុនអាកាសចរណ៍ HK Express មកកម្ពុជា ។ លោកបន្តថា វត្តមាននៃក្រុមហ៊ុនអាកាសចរណ៍ថ្មីនេះ សបញ្ជាក់អំពីការកើនឡើងនៃវិស័យសេដ្ឋកិច្ច និងវិស័យទេសចរណ៍ ។ លោកស៊ីវន បានមានប្រសាសន៍បន្ថែមថា ក្រុមហ៊ុនអាកាសចរណ៍ថ្មីនេះបានសិក្សាយ៉ាងល្អិតល្អន់ទាក់ទងនឹងលំហូរនៃភ្ញៀវទេសចរ លំហូរសេដ្ឋកិច្ច និងទីផ្សារ មុនធ្វើការចាប់ផ្តើមហោះហើរមកកម្ពុជា ។
លោក កៅ ស៊ីវន បញ្ជាក់ថា ៖ « យើងដឹងហើយថា សេដ្ឋកិច្ចរបស់យើងក៏ទាក់ទងគ្នាច្រើនដែរជាមួយនឹងហុងកុង អុីចឹងវត្តមានរបស់ HK Express ជាដំណឹងល្អ និងបង្ហាញពីការរីកចម្រើនរបស់កម្ពុជា ពីព្រោះគេយល់ថាកន្លែងហ្នឹងគេអាចរកស៊ីបាន គេមកហើយ គេមានទំនុកចិត្តលើសេដ្ឋកិច្ច និងការរីកចម្រើនរបស់កម្ពុជា » ។
លោក អាង គឹម អៀង ប្រធានសមាគមភ្នាក់ងារទេសចរណ៍កម្ពុជា បានប្រាប់កោះសន្តិភាពថា ការហោះហើរថ្មីនេះបានផ្តល់អត្ថប្រយោជន៍ច្រើនដល់ភ្ញៀវទេសចរក្នុងការមកកម្សាន្តនៅប្រទេសកម្ពុជា ពីព្រោះហុងកុង គឺជាទីក្រុងធំមួយរបស់ចិន ជាពិសេស HK Express ជាក្រុមហ៊ុនអាកាសចរណ៍មានតម្លៃទាប អីុចឹង អាចទាក់ទាញភ្ញៀវមកច្រើន ។
លោក អាង គឹម អៀង មានប្រសាសន៍បញ្ជាក់ថា ៖ « ប្រជាជនហុងកុងចូលចិត្តដើរលេងខាងក្រៅច្រើន ហើយគាត់ចូលចិត្តចាយវាយច្រើនដែរ ។ ជាទូទៅ ពួកគាត់មកលេងចាប់ពី៣ទៅ៤យប់ ហើយការហោះហើរត្រង់នេះ នឹងទាក់ទាញភ្ញៀវហុងកុងមកច្រើន និងសម្រួលការធ្វើដំណើរពីកម្ពុជាទៅហុងកុងផងដែរ » ។
លោក ស្រី ចន្ធី អ្នកវិភាគសេដ្ឋកិច្ចឯករាជ្យមានប្រសាសន៍ប្រាប់កោះសន្តិភាពថា លោកស្វាគមន៍ចំពោះការហោះហើរត្រង់ពីហុងកុងមកកាន់កម្ពុជា ។ លោកបន្តថា ក្រុមហ៊ុននឹងមានសមត្ថភាពក្នុងបម្រើជូនភ្ញៀវទេសចរដែលធនធាន និងធុរជនមកពីទីក្រុងហុងកុង ខណៈពេលដែលទីក្រុងហុងកុងមានអាត្រាប្រជាជនច្រើនជាងសង្ហិបុរីប្រមាណជា៣០ភាគរយ ហើយប្រជាជនហុងកុង ក៏ជាអ្នកមានច្រើនដែរ បើ គិតជាមធ្យម ។
លោក ស្រី ចន្ធី មានប្រសាសន៍បញ្ជាក់ថា៖ « ដោយសារតែការហោះហើរត្រង់ ខ្ញុំគិតថា ភ្ញៀវទេសចរនិងធុរជនជាច្រើននឹងមកកម្ពុជា ចំពោះវិស័យទេសចរណ៍ គឺថាកម្ពុជាមានតំបន់ទេសចរណ៍រាប់រយកន្លែង រួមមានប្រាសាទជាដើម ចំពោះវិស័យធុរកិច្ច កម្ពុជាគឺជាចំណុចកណ្តាលនៃអាស៊ាន គួបផ្សំនឹងប្រាក់កម្រៃកម្មករ នៅទាប ធនធានមនុស្សមានច្រើន វិស័យសេដ្ឋកិច្ចគឺបើកទូលាយ គ្មានការកេងវ័ញ្ច ទីតាំងភូមិសាស្ត្រអំណោយផល គ្មានគ្រោះធម្មជាតិ វាគឺជាទីផ្សារយ៉ាងធំ » ។
បើទោះបីជាក្រុមហ៊ុនអាកាសចរណ៍មួយចំនួនធ្វើការហោះហើរត្រង់ទៅកាន់តំបន់សៀមរាបអង្គរ ដោយមិនឆ្លងកាត់ ឬឈប់សំចតនៅអាកាសយានដ្ឋានអន្តរជាតិភ្នំពេញក៏ដោយ ក៏ប្រទេសកម្ពុជាមិនខាតបង់អ្វីដែរ ទៅលើវិស័យសេដ្ឋកិច្ចជាតិ ។ នេះបើតាមប្រសាសន៍លោក កៅ ស៊ីវន អគ្គនាយកទទួលបន្ទុកផ្នែកបច្ចេកទេសនៃរដ្ឋលេខាដ្ឋានអាកាសចរស៊ីវិលកម្ពុជា ។
លោកស៊ីវនបញ្ជាក់ថា ៖ « គំនិតដែលថាចុះចតនៅអាកាសយានដ្ឋានភ្នំពេញ មុននឹងបន្តដំណើរទៅកាន់ខេត្តសៀមរាបគឺជាគំនិតហួសសម័យ វាអត់អីទេ យើងគិតជើងហោះហើរក្នុងស្រុក អីុចឹង ក្រុមហ៊ុនអាកាសចរណ៍ក្នុងស្រុក វាមិនមានន័យថាសម្លាប់ក្រុមហ៊ុនអាកាសចរណ៍ធំៗហោះពីមុននោះទេ សំខាន់គេចង់បានជើងហោះហើរថ្មីៗទៀត ដែលជិះតិចតួច គេបង្កើន ជើងនោះវិញ បញ្ហាចុះសៀមរាប មិនបានន័យថា សេដ្ឋកិច្ចយើងត្រូវថយ ឬក៏មិនបានចុះភ្នំពេញ យើងមិនបានពន្ធព្រលាននោះទេ អីុចឹង កំណើនទេសចរនិងសេដ្ឋកិច្ចវាអត់ចុះទេ ឲ្យតែចុះទៅច្រើន វាកាន់តែល្អ ពីព្រោះទិសដៅវាខុសគ្នា អ្នកខ្លះគេចង់មកទស្សនាអង្គរវត្ត ប្រាសាទទាំងអស់ គេត្រូវតែទៅសៀមរាប នៅភ្នំពេញគេមានទិសដៅផ្សេងៗ » ។
អ្នកវិភាគសេដ្ឋកិច្ចឯករាជ្យក៏មានសុទិដ្ឋិនិយម លើបញ្ហានេះដែរថា វាមិនមានអ្វីជាបញ្ហាចោទនោះទេចំពោះការដែលមានការហោះហើរត្រង់ទៅកាន់សៀមរាប ឬខេត្តព្រះសីហនុ ដរាបណាវាអាចបង្កើនឲ្យសេដ្ឋកិច្ចលូតលាស់ នេះគួរតែស្វាគមន៍ ។
លោកបញ្ជាក់ថា ៖ « អ្វីដែលខ្ញុំព្រួយបារម្ភគឺថា សំឡេងនិងរលកសំឡេងញ័រចេញពីយន្តហោះ អាចនឹងប៉ះពាល់ដល់ប្រាសាទនៅក្នុងខេត្តសៀមរាប បើសិនជាអាច គួរតែរៀបចំអាកាសយានដ្ឋានឲ្យឆ្ងាយពីឧស្យានប្រវត្តិសាស្ត្រអង្គរ និងប្រាសាទបុរាណ » ។
គួរបញ្ជាក់ដែរថា អាកាសយានដ្ឋានអន្តរជាតិសៀមរាបបានទទួលអ្នកដំណើរចំនួន៣លាននាក់កាលពីឆ្នាំ២០១៣ ដោយមានកំណើន ១៣ភាគរយ និងឆ្នាំ២០១៤មានអ្នកដំណើរចំនួន៥លាននាក់ ក្នុងនោះច្រករង់ចាំ និងចេញដំណើរថ្មី ក្នុងអាកាសយានដ្ឋានដែលបាននិងកំពុងពង្រីកបន្ថែម រំពឹងថា នឹងបញ្ចប់ជាស្ថាពរនៅជិតពាក់កណ្តាលឆ្នាំ២០១៦ ។ នេះបើយោងតាមសេចក្តីប្រកាសព័ត៌មាន ៕
ចែករំលែកព័តមាននេះ