ខេត្តកំពត ៖ តាមសេចក្តីរាយការណ៍ពីអ្នកឆ្លើយឆ្លងព័ត៌មាននៅកន្លែងកើតហេតុបានឱ្យដឹងថា ស្ត្រីម្នាក់ត្រូវបានឃាតករសម្លាប់ប្លន់យកម៉ូតូម៉ាកហុងដាឌ្រីម ស៊េរិឆ្នាំ២០១៣ កាលពីនៅចន្លោះម៉ោង៨ទៅម៉ោង៩យប់ថ្ងៃទី១ កញ្ញា ឆ្នាំ២០១៥ ស្ថិតនៅភូមិច្រកឃ្លៃ ឃុំទូកមាសខាងលិច ស្រុកបន្ទាយមាស ។
មន្ត្រីសមត្ថកិច្ចបានឱ្យដឹងថា ស្ត្រីរងគ្រោះដែលគេសម្លាប់ប្លន់យកម៉ូតូឈ្មោះ ឡេង ចាន់ថន អាយុ៤២ឆ្នាំ មានកូន២នាក់ រស់នៅក្នុងភូមិឃុំកើតហេតខាងលើ ចំណែកប្តីនៅយប់កើតហេតុមិនបាននៅផ្ទះទេ ដោយមកធ្វើការនៅឯរាជធានីភ្នំពេញ ។
មន្ត្រីសមត្ថកិច្ចបានបន្តថា ក្រោយកើតហេតុ សមត្ថកិច្ចពុំបានធ្វើកោសល្យវិច័យសពនោះឡើយ ព្រោះសពស្ត្រីរងគ្រោះត្រូវបានឪពុកនាំយកមកតម្កល់ទុកនៅផ្ទះសពទាំងយប់ ដោយគ្រាន់តែធ្វើការហ៊ុមព័ទ្ធកន្លែងកើតហេតុ និងរកឃើញពូថៅ១ ដែលឃាតករបន្សល់ទុកនៅកន្លែងកើតហេតុបន្ទាប់ពីធ្វើសកម្មភាពរួច ។
ករណីឃាតកម្មខាងលើនេះ ត្រូវបានសមត្ថកិច្ចដាក់ការសង្ស័យទៅលើក្រុមគ្រួសាររបស់សព ហើយសមត្ថកិច្ចបាននិងកំពុងធ្វើការស្រាវជ្រាវតាមរកចាប់ឃាតករយកមកផ្តន្ទាទោសតាមច្បាប់ ៕
ព័ត៌មានលម្អិតមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ