ខេត្តកំពង់ចាម ៖ ដោយអនុវត្តតាមបញ្ជារបស់ប្រតិភូរាជរដ្ឋាភិបាលទទួលបន្ទុករដ្ឋបាលជលផល កម្លាំងសមត្ថកិច្ចចម្រុះក្នុងនោះមានអធិការដ្ឋានជលផលមេគង្គ, សហគមន៍នេសាទ ព្រមទាំងសមត្ថកិច្ចពាក់ព័ន្ធ
ខេត្តកំពង់ចាម ៖ ដោយអនុវត្តតាមបញ្ជារបស់ប្រតិភូរាជរដ្ឋាភិបាលទទួលបន្ទុករដ្ឋបាលជលផល កម្លាំងសមត្ថកិច្ចចម្រុះក្នុងនោះមានអធិការដ្ឋានជលផលមេគង្គ, សហគមន៍នេសាទ ព្រមទាំងសមត្ថកិច្ចពាក់ព័ន្ធ បានចុះបង្ក្រាបបទល្មើសនេសាទស្ថិតនៅចំណុច B6 ស្ថិតក្នុងស្រុកកងមាស ខេត្តកំពង់ចាម ពេញមួយថ្ងៃទី១ កញ្ញា ២០១៥ ក្នុងនោះរឹបអូសទូកនេសាទល្មើសច្បាប់២គ្រឿង, លូស្បៃមុងចំនួន៩៣មាត់, របាំងស្បៃមុងប្រវែង៤៦៥០ម៉ែត្រ, បង្គោល១៣៩៥ដើម និងចាក់លែងកូនត្រីចម្រុះទម្ងន់៣៥០គីឡូក្រាមចូលទៅក្នុងបឹងធម្មជាតិវិញផងដែរ ។
លោក អ៊ុក ណារិន នាយខណ្ឌរដ្ឋបាលជលផលខេត្តបានប្រាប់ឲ្យដឹងថា នៅក្នុងរដូវបិទនេសាទនេះត្រូវបានលោក អេង ជាសាន ទទួលបន្ទុករដ្ឋបាលជលផលបានឲ្យរូបលោកត្រូវបន្តដឹកនាំកម្លាំងមន្ត្រីក្រោមឱវាទបន្តចុះបង្ក្រាបទល្មើសនេសាទនៅតាមបឹងបួរនានាជាអតីតឡូត៍នេសាទជាប់តាមដងទន្លេមេគង្គ ពិសេសក្រុមជនខិលខូចដែលតែងលួចនេសាទប្រើប្រាស់ឧបករណ៍នេសាទខុសច្បាប់នោះ ។
លោកនាយខណ្ឌរដ្ឋបាលជលផលខេត្តបន្តថា ចាប់តាំងពីរដូវបិទនេសាទដែលត្រូវបានអនុវត្តចាប់ពីថ្ងៃទី១ មិថុនា ២០១៥ រហូតមកដល់ពេលនេះ កម្លាំងជំនាញរដ្ឋបាលជលផលខេត្តបានចុះបង្ក្រាបបទល្មើសនេសាទបានជាហូរហែរ ។ ជាក់ស្តែងកន្លងទៅថ្មីៗនេះប្រធានរដ្ឋបាលជលផលបានដឹកនាំកម្លាំងសមត្ថកិច្ចចម្រុះចុះបង្ក្រាបបទល្មើសនេសាទក្នុងស្រុកកងមាស ដែលជាលក្ខណៈទ្រង់ទ្រាយធំ ដោយរឹបអូសបានឧបករណ៍នេសាទល្មើសច្បាប់ជាច្រើន រួចបានដុតកំទេចចោល និងចាក់លែងកូនត្រីជាច្រើនរយគីឡូក្រាមចូលទៅក្នុងទន្លេមេគង្គ ។
លោកបន្ថែមទៀតថា ដោយកម្លាំងសហគមន៍នេសាទ B6 បានរាយការណ៍មករូបលោក (អ៊ុក ណារិន ) ថាមានក្រុមអ្នកខិលខូចបានបន្តលួចដាក់ឧបករណ៍នេសាទខុសច្បាប់ចាប់ត្រីតូច-ធំគ្រប់ប្រភេទនៅត្រង់ចំណុចតំបន់ B6 ទើបនៅព្រឹកថ្ងៃទី១ កញ្ញា រូបលោក ក៏ដូចជាលោកនាយអធិការដ្ឋានរដ្ឋបាលជលផលមេគង្គ ដឹកនាំកម្លាំងចុះបង្ក្រាបជាបន្ទាន់តែម្តង ។
លោក អ៊ុក ណារិន បញ្ជាក់ទៀតថា ក្នុងប្រតិបត្តិការនេះ កម្លាំងសមត្ថកិច្ចដកហូតបានរួមមាន លូស្បៃមុងចំនួន៩៣មាត់, របាំងស្បៃមុងប្រវែង៤៦៥០ម៉ែត្រ ត្រូវបានដុតបំផ្លាញចោល, បង្គោល១៣៩៥ដើម ត្រូវបានកាប់បំផ្លាញចោល និងចាក់លែងកូនត្រីចម្រុះ៣៥០គីឡូក្រាម ។
ជាមួយគ្នានោះដែរ រូបលោកនឹងបន្តដឹកនាំកម្លាំងចុះបង្ក្រាបបទល្មើសនេសាទនៅកន្លែងផ្សេងៗទៀតឲ្យបានដូចភ្លៀងរលឹម សូមឲ្យបងប្អូនដែលកំពុងតែលួចនេសាទល្មើសច្បាប់ មេត្តាងាកមកប្រើប្រាស់របស់ស្របច្បាប់វិញ ដើម្បីថែរក្សានិរន្តភាពពពួកមច្ឆជាតិឲ្យនៅគង់វង្សយូរអង្វែង ៕
ចែករំលែកព័តមាននេះ