ខេត្តបាត់ដំបង ៖ យុវជនម្នាក់ ត្រូវជនមិនស្គាល់មុខ២នាក់ជិះម៉ូតូមកកា.ប់ចំក្បាលបណ្ដាលឲ្យរងរបួសធ្ងន់ គ្រាដែលកំពុងដើរនៅម្ដុំរង្វង់មូលលោកតាដំបងគ្រញូង
ខេត្តបាត់ដំបង ៖ យុវជនម្នាក់ ត្រូវជនមិនស្គាល់មុខ២នាក់ជិះម៉ូតូមកកាប់ចំក្បាលបណ្ដាលឲ្យរងរបួសធ្ងន់ គ្រាដែលកំពុងដើរនៅម្ដុំរង្វង់មូលលោកតាដំបងគ្រញូង កាលពីវេលាម៉ោង៥និង៣៥នាទីល្ងាចថ្ងៃទី៣១ សីហា កន្លងទៅនេះ នៅក្រុងបាត់ដំបង ។
មន្ត្រីសមត្ថកិច្ច បានឱ្យដឹងថា យុវជនរងគ្រោះឈ្មោះ ធន់ មករា អាយុ១៨ឆ្នាំ រស់នៅភូមិអូរតាគាំ៣ សង្កាត់ទូលតាឯង ក្រុងបាត់ដំបង ត្រូវជនមិនស្គាល់មុខមានគ្នា២នាក់ ពាក់មួកសុវត្ថិភាពជិះម៉ូតូម៉ាកហុងដាឌ្រីម ពណ៌ក្រហម មួយគ្រឿង កាប់ចំក្បាលផ្នែកខាងក្រោយបណ្ដាលឲ្យរងរបួសធ្ងន់ ដោយគ្មានអ្នកណាដឹងពីមូលហេតុឡើយ ។
សមត្ថកិច្ច បានបញ្ជាក់ថា ក្រោយពីកាប់យុវជនរងគ្រោះឲ្យរបួសធ្ងន់ហើយ ជនដៃដល់មិនស្គាល់មុខទាំង២នាក់នោះ បានជិះម៉ូតូគេចខ្លួនយ៉ាងលឿនតាមផ្លូវជាតិលេខ៥ ឆ្ពោះទៅទិសខាងកើតបាត់ស្រមោល ។ រីឯសមត្ថកិច្ចក៏ចុះទៅដល់កន្លែងកើតហេតុភ្លាមៗដែរ តែគ្មានតម្រុយពីមុខសញ្ញាជនដៃដល់ឡើយ ។
សាក្សីនៅកន្លែងកើតហេតុ បាននិយាយថា ជនរងគ្រោះរបួសធ្ងន់ត្រង់ក្បាលហើយដួលសន្លប់នៅនឹងកន្លែង ដោយសារមានឈាមហូរជោកខ្លួន ។ សមត្ថកិច្ចបានជួយបញ្ជូនជនរងគ្រោះទៅមន្ទីរពេទ្យបង្អែកខេត្ត ។
សាក្សីបានបន្តថា នៅរង្វង់មូលលោកតាដំបងគ្រញូង ឃើញមានមន្ត្រីនគរបាលក្រុងម្នាក់យាមជាប្រចាំរាប់ឆ្នាំមកហើយ តែមន្ត្រីរូបនេះមិនដែលចេះជួយអន្តរាគមន៏អ្វីក្រៅពីចាំមើលសំណែននោះទេ សូម្បីយានយន្តចតគ្មានសណ្ដាប់ធ្នាប់ក៏មិនយកភ្នែកមើលដែរ ចោរឆក់កាបូប ឬខ្សែ.កអ្នកដំណើរនៅក្បែរនោះ ក៏មន្ត្រីរូបនេះមកខ្វល់ជួយដេញ ឬ ទាក់ទងសុំជំនួយពីសមត្ថកិច្ចដទៃឡើយ ។ ពោលគឺមន្ត្រីរូបនេះខ្វល់ខ្វាយតែពីរឿងមើលសំសែនមួយមុខប៉ុណ្ណោះ ។
លោក ជេត វណ្ណនី ស្នងការនគរបាលរងខេត្ត បានឱ្យដឹងថា សមត្ថកិច្ចបាននិងកំពុងធ្វើការស្រាវជ្រាវរកមុខសញ្ញាជនដៃដល់នោះហើយ តែមិនទាន់មានតម្រុយទេ ។ ព្រោះជនរងគ្រោះមិនទាន់អាចសាកសួរយកព័ត៌មានបាន ដោយសារតែរបួសធ្ងន់ពេកនិយាយមិនទាន់កើត ៕
ចែករំលែកព័តមាននេះ