មនុស្សម្នាក់ស្លាប់ ហើយជាង១០០នាក់ត្រូវរបួសកាលពីថ្ងៃទី៣១ សីហា ពេលមានការប៉ះទង្គិចគ្នាដែលផ្ទុះឡើងនៅជិតអគារសភាអ៊ុយក្រែន រវាងប៉ូលិសនិងពួកបាតុករដែលប្រឆាំងនឹងការធ្វើវិសោធនកម្មរដ្ឋធម្មនុញ្ញស្តីពីវិមជ្ឈការ ។
រដ្ឋមន្ត្រីមហាផ្ទៃអ៊ុយក្រែន លោក ARSEN AVAKOV គូសបញ្ជាក់ថា ទាហានម្នាក់នៃកងឆ្មាំជាតិ អាយុ២៥ឆ្នាំ បានស្លាប់នៅមន្ទីរពេទ្យក្រោយរងរបួសធ្ងន់ពេលមានការប៉ះទង្គិចគ្នាដោយសារអំបែងដែក ។ យោងតាមរដ្ឋមន្ត្រីរូបនេះថា មនុស្សដល់ទៅ១២២នាក់រងរបួសក្នុងការប៉ះទង្គិចគ្នា ហើយត្រូវបញ្ជូនទៅមន្ទីរពេទ្យ។ ក្នុងចំណោមអ្នករបួសទាំងនេះ១១នាក់ស្ថិតក្នុងស្ថានភាពធ្ងន់ធ្ងរ ។ អ្នកកាសែតយ៉ាងតិច៣នាក់ ក៏ស្ថិតក្នុងចំណោមអ្នករបួសដែរ ។
ការប៉ះទង្គិចគ្នាផ្ទុះឡើងពេលសភាអ៊ុយក្រែនត្រៀមអនុម័តលើការធ្វើវិសោធនកម្មរដ្ឋធម្មនុញ្ញទាក់ទិននឹងវិមជ្ឈការ ដែលត្រូវផ្តល់ស្វ័យភាពថែមទៀតដល់តំបន់លូហ្គានស្ក៍ និងតំបន់ដូណេតស្ក៍ ដែលនៅតំបន់ទាំងនេះចាប់តាំងពីខែមេសា ឆ្នាំ២០១៤ មកមានជម្លោះបង្ហូរឈាមគ្នារវាងកងទ័ពរដ្ឋាភិបាល និងពួកឧទ្ទាមបំបែកខ្លួននិយមស្និទ្ធរុស្ស៊ី ។
ការប៉ះទង្គិចគ្នាផ្ទុះឡើងនាវេលាម៉ោង១០ព្រឹកម៉ោងក្នុងស្រុក ពេលសកម្មជនមួយក្រុមបានប្រឆាំងនឹងធ្វើវិសោធនកម្មនោះ ហើយវាយប្រហារលើប៉ូលិសនៅមុខអគារសភាជាមួយដបសាំងដុត និងគ្រាប់បែកផ្សែង ហើយប៉ូលិសក៏បានតបតវិញយ៉ាងខ្លាំងក្លា ។ ការប៉ះទង្គិចគ្នាក្លាយទៅជាអំពើហិង្សា៣ម៉ោងក្រោយមកពេលមានការគប់គ្រឿងផ្ទុះដាក់ប៉ូលិស បណ្តាលឱ្យប៉ូលិសច្រើនសិបនាក់រងរបួស ។ ក្រោយការប៉ះទង្គិចគ្នា បាតុករ៣០នាក់ត្រូវចាប់ខ្លួន ៕
ចែករំលែកព័តមាននេះ