កិច្ចជួបពិភាក្សាជាមួយអង្គការហាឆាន់ខាំ
ខេត្តសៀមរាប ៖ នៅព្រឹកថ្ងៃទី០១ កញ្ញា ២០១៥នេះ លោក ពៅ ពិសិដ្ឋ អភិបាលរងនៃគណៈអភិបាលខេត្ត បានជួបធ្វើការប្រជុំពិភាក្សាជាមួយលោក ឃឹម យ៉ង់អ៊ុក ជាប្រធានអង្គការហាឆាន់ខាំ
ខេត្តសៀមរាប ៖ នៅព្រឹកថ្ងៃទី០១ កញ្ញា ២០១៥នេះ លោក ពៅ ពិសិដ្ឋ អភិបាលរងនៃគណៈអភិបាលខេត្ត បានជួបធ្វើការប្រជុំពិភាក្សាជាមួយលោក ឃឹម យ៉ង់អ៊ុក ជាប្រធានអង្គការហាឆាន់ខាំ ក្នុងការដោះស្រាយនូវបញ្ហាពីការសាងសង់សំណង់គ្មានច្បាប់អនុញ្ញាត ព្រមទាំងកាប់រានព្រៃឈើ នៅភូមិត្រាំងពពេល ឃុំតាសៀម ស្រុកស្វាយលើ ដោយមានការចូលរួមពីលោក អ៊ុំ រាត្រី អភិបាលរងខេត្តបន្ទាយមានជ័យ ព្រមទាំងអស់លោកជាថ្នាក់ដឹកនាំមន្ទីរពាក់ព័ន្ធ និងអាជ្ញាធរស្រុកស្វាយលើផងដែរ ។
តាមការបញ្ជាក់របស់លោកអភិបាលរងស្រុកស្វាយលើបានឱ្យដឹងថា ក្នុងពេលកន្លងមកនេះ អង្គការហាឆាន់ខាំ ដែលបានធ្វើការបោះទីតាំងនៅភូមិសាស្ត្រស្រុកស្វាយលើ ពុំបានសុំច្បាប់ទំលាប់ត្រឹមត្រូវទេ ហើយថែមទាំងបានសាងសង់អគារសិក្សា និងធ្វើការឈួសឆាយដីព្រៃទៀតផង ។
តាមការបញ្ជាក់របស់លោក ឃឹម យ៉ង់អ៊ុក ប្រធានអង្គការហាឆាន់ខាំ ក៏បានឱ្យដឹងថា ការសាងសង់អគារសិក្សា និងទីគោរពសាសនានេះ ក្នុងគោលបំណងដើម្បីអភិវឌ្ឍន៍នៅតំបន់នោះជូនប្រជាជន ហើយកន្លងមកអង្គការបានធ្វើការចុះកិច្ចព្រមព្រៀងជាមួយក្រសួងកសិកម្មដើម្បីអភិវឌ្ឍន៍លើវិស័យកសិកម្មនៅក្នុងតំបន់នោះផងដែរ ។
លោកក៏បានឱ្យដឹងទៀតថា អង្គការរបស់លោកបានបង្កើតនៅខេត្តបន្ទាយមានជ័យ១កន្លែង និងខេត្តសៀមរាប១កន្លែង តែនៅពុំទាន់មានច្បាប់អនុញ្ញាតត្រឹមត្រូវពីអាជ្ញាធរខេត្តសៀមរាបទេ ។ ម្យ៉ាងទៀតការមកធ្វើសាលារៀននៅលើទីតាំងនេះគឺដោយសារចង់បំពេញបំណងនៃសេចក្តីស្រឡាញ់របស់ភរិយារបស់លោកដែលស្រឡាញ់ទឹកដីកម្ពុជា ហើយចង់ធ្វើអ្វីមួយដើម្បីផ្តល់ផលប្រយោជន៍ដល់ប្រជាជនកម្ពុជា កាលពីមុនពេលភរិយាគាត់ទទួលមរណភាពដោយគ្រោះថ្នាក់ចរាចរណ៍នៅប្រទេសកូរ៉េ ហើយក៏បានមកទិញដីព្រៃពីប្រជាពលរដ្ឋនៅភូមិត្រាំងពពេល ឃុំតាសៀម មានទំហំ៣៥០ហិចតា ក្នុងនោះលោកក៏បានទទួលនូវកំហុសឆ្គងដែលពុំបានធ្វើទៅតាមច្បាប់នៅប្រទេសកម្ពុជាផងដែរ ។
លោក ពៅ ពិសិដ្ឋ ក៏បានធ្វើការណែនាំមួយចំនួនដល់ប្រធានអង្គការហាឆាន់ខាំ ព្រមទាំងបានធ្វើការបញ្ជាក់ផងដែរដល់លោក អ៊ុំ រាត្រី អភិបាលរងខេត្តបន្ទាយមានជ័យ សូមជួយធ្វើការជាមួយអង្គការហាឆាន់ខាំឱ្យបានស្គាល់ច្បាស់អំពីរបៀបរបបច្បាប់របស់ព្រះរាជាណាចក្រកម្ពុជា ដោយសំអាងលោកជាថ្នាក់ដឹកនាំមួយរូបត្រូវតែស្គាល់ច្បាស់ពីការងាររដ្ឋបាលមុននឹងធ្វើការសាងសង់អ្វីមួយ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ