រាជធានីភ្នំពេញ ៖ រថយន្តកូរ៉េដឹកភេសជ្ជៈធុនធំមួយគ្រឿងដឹកទំនិញ ( ទឹកក្រូច និង គោជល់ ) លើសចំណុះ និងសំពីងសំពោងខ្លាំងពេកមិនអាចទ្រទម្ងន់បានបានរេចង្កូតក្រឡាប់ផ្ងារជើងម្ខាងឡើងលើមេឃ តែសំណាងល្អមិនមានរងរបួសដល់មនុស្សណាម្នាក់ ។
ហេតុការណ៍នេះបានកើតឡើងកាលពីវេលាម៉ោង៦ល្ងាច ថ្ងៃទី៣១ សីហា ២០១៥ ស្ថិតតាមបណ្តោយផ្លូវ៣០ម៉ែត្រ ក្នុងភូមិដំណាក់៣ សង្កាត់ស្ទឹងមានជ័យ ខណ្ឌមានជ័យ ។
សាក្សីនៅកន្លែងកើតហេតុ បានរៀបរាប់ឱ្យដឹងថា នៅមុនពេលកើតហេតុ គេសង្គេតឃើញរថយន្តដឹកទំនិញខាងលើ ពណ៌ខៀវ ពាក់ស្លាកលេខតាកែវ 3A-0863 បើកបរដោយបុរសម្នាក់ និងព្រូម្នាក់ តាមបណ្តោយផ្លូវ៣០ ក្នុងទិសដៅពីជើងទៅត្បូង ក្នុងល្បឿនល្មម ដោយរថយន្តដឹកផ្ទុកពេញទៅដោយទំនិញជាគ្រឿងភេសជ្ជៈ ដែលមានដូចជាទឹកក្រូច ទឹកផ្លែឈើ និងគោជល់ជាដើម ខណៈបើកមកដល់ចំណុចកើតហេតុ ដោយសាររថយន្តមិនអាចទ្រទម្ងន់របស់ទំនិញបានធ្វើឱ្យរថយន្តរេចង្កូតក្រឡាប់ផ្ងារជើងច្រងាងៗឡើងលើកំពប់គ្រឿងភេសជ្ជៈខ្ចាយពាសពេញដងផ្លូវ ប៉ុន្តែមិនបណ្តាលឱ្យមនុស្សណាម្នាក់រងរបួសឡើយ ។
ភ្លាមៗ បន្ទាប់ពីកើតហេតុ សមត្ថកិច្ចមូលដ្ឋានបានចុះអន្តរាគន៍ដល់កន្លែងកើតហេតុ ប៉ុន្តែដោយឃើញថា ករណីខាងលើមិនបានបណ្តាលឱ្យមានរបួសស្នាមដល់អ្នកដទៃ ក៏ដូចជាខូចខាតនូវទ្រព្យសម្បត្តិសាធារណៈនោះ សមត្ថកិច្ចសម្រេចប្រគល់ទំនិញ និងរថយន្តទៅខាងម្ចាស់ដើមគេវិញតែម្តងទៅ៕
ចែករំលែកព័តមាននេះ