រាជធានីភ្នំពេញ ៖ ក្រុមការងារអនុសាខាកាកបាទក្រហមខណ្ឌពោធិ៍សែនជ័យ កាលពីវេលាព្រឹកថ្ងៃទី៣១ សីហា ២០១៥ បាននាំយកអំណោយមាន ប្រាក់១លាន ផ្លែឈើមួយចំនួន និងទឹកដោះគោឆៅ៤យួរ ទៅឧបត្ថម្ភដល់លោកស្រី ហ៊ុន សុខនៅ ដែលមានជំងឺកំពុងសម្រាកព្យាបាលនៅក្នុងមន្ទីរពេទ្យកាល់ម៉ែត និងត្រូវការសង្គ្រោះបន្ទាន់ពីសំណាក់ក្រុមគ្រូពេទ្យ ។
លោក ហែម ដារិទ្ធិ អភិបាលខណ្ឌពោធិ៍សែនជ័យ និងជាប្រធានកិត្តិយសអនុសាខាកាកបាទក្រហមខណ្ឌ អមដំណើរដោយលោក ឃឹម ស៊ុនសូដា អភិបាលរងខណ្ឌ លោកស្រី អ៊ឹម ថាវី ប្រធានអនុសាខាកាកបាទក្រហមខណ្ឌ លោក យិន គា នាយករដ្ឋបាលសាលាខណ្ឌ រួមជាមួយមន្ត្រីក្រោមឱវាទជាច្រើនទៀតផងដែរ ។
លោក ហែម ដារិទ្ធិ បានឲ្យដឹងថា លោកស្រី ហ៊ុន សុខនៅ អាយុជាង៣០ឆ្នាំ បម្រើការងារជាអ្នកស្ម័គ្រចិត្តផ្នែកតាមដានកុមារផ្ទុកមេរោគអេដស៏ អគារផ្កាម្លិះគាំទ្រចិត្ត សាស្ត្រសង្គមរបស់សាខាកាកបាទក្រហមរាជធានីភ្នំពេញ និងជាអនុប្រធានភូមិសាមគ្គី១ និងជាប្រធានផ្សារសាមគ្គី ក្នុងសង្កាត់ត្រពាំងក្រសាំង ខណ្ឌពោធិ៍សែនជ័យ ។
លោកស្រីមានជំងឺមហារីកស្បូនធ្ងន់ធ្ងរ និងបានចូលទៅសម្រាកព្យាបាលជំងឺនៅក្នុងមន្ទីរពេទ្យខាងលើយូរថ្ងៃមកហើយ នៅមិនទាន់បានធូរស្បើយនៅឡើយ និងត្រូវការសង្គ្រោះបន្ទាន់ពីសំណាក់ក្រុមគ្រូពេទ្យ ។ ដើម្បីតបស្នងដល់ការខិតខំក្នុងការបម្រើជាតិមាតុភូមិ និងប្រជាពលរដ្ឋ ទើបអនុសាខាកាកបាទក្រហម ចុះសាកសួរសុខទុក្ខ និងបាននាំអំណោយមួយចំនួនឧបត្ថម្ភដល់លោកស្រី ។
លោក ហែម ដារិទ្ធិ អភិបាលខណ្ឌ ក៏បានផ្ដល់ជាកម្លាំងចិត្តដល់លោកស្រីកុំឲ្យអស់សង្ឃឹមឲ្យសោះ ព្រោះលោកស្រីមិនឯកោនោះទេ ដោយបានថ្នាក់ដឹកនាំ មិត្តភក្ដិរួមការងារ ឈឺឆ្អាល ជាពិសេសបានគ្រូពេទ្យដ៏ចំណានៗចាំជួយព្យាបាលជំងឺលោកស្រីបានជាសះស្បើយក្នុងពេលឆាប់ៗនេះ ដើម្បីបានចូលធ្វើការងារដូចដើមឡើងវិញ ៕
ចែករំលែកព័តមាននេះ