ប៉ូលិសថៃរាយការណ៍កាលពីថ្ងៃទី៣១ សីហា ថា បណ្ដាសម្ភារផ្ទុះដែលប្រើប្រាស់សម្រាប់ផលិតគ្រាប់បែកច្នៃត្រូវបានរកឃើញក្នុងឱកាសនៃប្រតិបត្តិការមួយនៅតំបន់ជាយក្រុងក្បែរកន្លែងដែលជនសង្ស័យ
ប៉ូលិសថៃរាយការណ៍កាលពីថ្ងៃទី៣១ សីហា ថា បណ្ដាសម្ភារផ្ទុះដែលប្រើប្រាស់សម្រាប់ផលិតគ្រាប់បែកច្នៃត្រូវបានរកឃើញក្នុងឱកាសនៃប្រតិបត្តិការមួយនៅតំបន់ជាយក្រុងក្បែរកន្លែងដែលជនសង្ស័យវាយប្រហារភេរវកម្មនៅក្រុងបាងកកត្រូវចាប់ខ្លួនកាលពីថ្ងៃទី២៩ សីហា កន្លងមកនេះ ។
អ្នកនាំពាក្យប៉ូលិសជាតិថៃលោក ប្រាវុធថាវនស៊ីរី អះអាងប្រាប់ AFP ថា យើងបានរកឃើញបាវជីគីមីនានា បណ្ដានាឡិកា ប្រព័ន្ធវិទ្យុព្រមទាំងសម្ភារឯទៀតៗ ដែលប្រើក្នុងការផលិតគ្រាប់បែកច្នៃកាលពីថ្ងៃទី៣០ សីហា ក្នុងផ្ទះល្វែងមួយ ។ ប្រតិបត្តិការនោះធ្វើក្នុងអគារមួយនៃសង្កាត់ មីនប៊ូរី នាជាយក្រុងភាគឦសានជាកន្លែងចាប់ខ្លួនជនសង្ស័យម្នាក់ ។
២សប្ដាហ៍ក្រោយការវាយប្រហារនៅក្រុងបាងកកកាលពីថ្ងៃទី១៧ សីហា ប៉ូលិសថៃពេលនេះផ្ដោតលើបណ្ដាញពួករត់ពន្ធឯកសារក្លែងក្លាយនានា សម្រាប់ភេរវកម្មអន្តរជាតិ ។ បន្ទាប់ពីលើកឡើងពីលទ្ធភាពផ្សេងៗ ទិសដៅចុងក្រោយនៃការស៊ើបអង្កេតរបស់អាជ្ញាធរថៃផ្ដោតលើការរត់ពន្ធដែលមានឯកទេសក្នុងការផលិតលិខិតឆ្លងដែនក្លែងក្លាយដែលចង់សងសឹកចំពោះនយោបាយបង្ក្រាបរបស់របបយោធាកាន់អំណាចនៅថៃ ។
ប៉ូលិសថៃក៏រាយការណ៍នាថ្ងៃទី៣១ សីហា ដែរថា ជនសង្ស័យថ្មី២នាក់ទៀត ម្នាក់ជានារីថៃ ហើយម្នាក់ទៀតជា បុរសបរទេសមិនស្គាល់អត្តសញ្ញាណកំពុងត្រូវតាមរកក្នុងក្របខណ្ឌនៃការសើុបអង្កេត ។ នារីថៃនោះមានឈ្មោះថា WANNA SUANSAN អាយុ២៦ឆ្នាំដែលរស់នៅជាមួយជនសង្ស័យម្នាក់ទៀត ក្នុងផ្ទះមួយដែលគេរកឃើញបណ្ដាសម្ភារសម្រាប់ផលិតគ្រាប់បែក ៕
ចែករំលែកព័តមាននេះ