ខេត្តកំពង់ធំ ៖ កាលពីព្រឹកថ្ងៃទី៣០ សីហា ២០១៥ គ្រួសារកងទ័ព២៨គ្រួសារ ប្រចាំនៅទីបញ្ជាការកងវរសេនាតូចលេខ១នៃតំបន់ប្រតិបត្តិការសឹករងខេត្តកំពង់ធំស្ថិតក្នុងឃុំសាលាវិស័យ
ខេត្តកំពង់ធំ ៖ កាលពីព្រឹកថ្ងៃទី៣០ សីហា ២០១៥ គ្រួសារកងទ័ព២៨គ្រួសារ ប្រចាំនៅទីបញ្ជាការកងវរសេនាតូចលេខ១នៃតំបន់ប្រតិបត្តិការសឹករងខេត្តកំពង់ធំស្ថិតក្នុងឃុំសាលាវិស័យ ស្រុកប្រាសាទបាល្ល័ង្គ បានទទួលស័ង្កសីចំនួន៥០០សន្លឹក សម្រាប់ប្រក់ដំបូលផ្ទះ រួមជាមួយគ្រឿងឧបភោគ បរិភោគមួយចំនួន ដែលជាអំណោយរបស់សម្តេចអគ្គមហាសេនាបតីតេជោ និងសម្តេចកិត្តិព្រឹទ្ធបណ្ឌិតតាមរយៈ លោក ហ៊ុន ម៉ាណែត ។
ក្នុងឱកាសជួបជាមួយបងប្អូនយោធិន និងគ្រួសារកងទ័ព លោកវរសេនីយ៍ទោ មែ ស៊ីថន ជំនួយការលោក ហ៊ុន ម៉ាណែត បានពាំនាំការផ្តាំសាកសួរសុខទុក្ខពីសំណាក់ លោក ហ៊ុន ម៉ាណែត ជូនចំពោះបងប្អូនយោធិន ជាពិសេសថ្លែងអំណរគុណជូនចំពោះភរិយាក្រុមគ្រួសារយោធិនទាំងអស់ ដែលជានិច្ចកាលតែងតែបានផ្តល់ការគាំទ្រ និងការលើកទឹកចិត្តដល់ស្វាម៉ីជាកងទ័ព ហើយនេះ គឺជាកម្លាំងចិត្ត និងជាកត្តាជម្រុញដ៏មានសារសំខាន់បំផុតសម្រាប់កងទ័ពក្នុងការបំពេញបេសកកម្មជូនជាតិមាតុភូមិដ៏បវរនៃយើង ។
លោកវរសេនីយ៍ឯក ញូង ធី មេបញ្ជាការរង និងជានាយសេនាធិការតំបន់ប្រតិបត្តិការសឹករងខេត្តកំពង់ធំក្នុងនាមជំនួសមុខឲ្យនាយទាហាន នាយទាហានរង ពលទាហាន និងគ្រួសារកងទ័ពនៃកងវរសេនាតូចលេខ១ ទាំងអស់ បានគោរពថ្លែងអំណរគុណយ៉ាងជ្រាលជ្រៅបំផុតជូនចំពោះ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលជានិច្ចកាលតែងតែគិតគូរពីសុខទុក្ខរបស់កងទ័ព និងគ្រួសារកងទ័ព និងសូមគោរពជូនពរសម្តេចទាំងពីរ បុត្រាបុត្រី និងចៅប្រុសចៅស្រី សូមជួបប្រទះតែពុទ្ធពរបួនប្រការ គឺអាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ៕
ចែករំលែកព័តមាននេះ