បន្ទាយមានជ័យ ៖ ទំនិញ និងសាច់ និងគ្រឿងក្នុងមាន់ទាខូចគុណភាពជាច្រើនមុខ ត្រូវបានមន្ត្រីជំនាញកាំកុងត្រូលសាខាខេត្តសហការជាមួយស្ថាប័នពាក់ព័ន្ធនៅច្រកទ្វារអន្តរជាតិប៉ោយប៉ែតនាំយកទៅដុតកម្ទេចចោលកាលពីរសៀលថ្ងៃទី៣០ សីហា ២០១៥ បន្ទាប់ពីចាប់បាននៅច្រកទ្វារអន្តរជាតិប៉ោយប៉ែត និងតាមទីផ្សារនានា ក្នុងខេត្តនាពេលកន្លងមក ។
លោក ហុង លៀង អនុប្រធានទី១ ផ្នែកស្ថិតិទីផ្សារនៃសាខាកាំកុងត្រូលខេត្ត បានឲ្យកោះសន្តិភាពដឹងថា ទំនិញដែលនាំយកមកដុតកម្ទេចចោលនេះ មួយចំនួនធំគឺជាសាច់ និងទំនិញដែលមន្ត្រីជំនាញរបស់លោកចាប់បាននៅច្រកទ្វារអន្តរជាតិប៉ោយប៉ែត ខណៈឈ្មួញលួចបង្កប់តាមរទេះអូសចេញពីដីថៃ ។
លោកអនុប្រធានទី១រូបនេះ បានបន្តថា សាច់ និងគ្រឿងក្នុងមាន់ទាមានចំនួន៩៥គីឡូក្រាម ក្រៅពីនេះជាទំនិញគ្មានស្លាកសញ្ញា និងកាលបរិច្ឆេទប្រើប្រាស់ត្រឹមត្រូវដូចជាសម្បកការ៉េម កម្ទេចមី ចាហួយមិចហ្វ្រូត ផ្លែឈើត្រាំ ក្នុងនោះក៏មានចាហួយយីហោ«ថាញ់ប៊ិញ» ផលិតនៅប្រទេសវៀតណាម ដែលមន្ត្រីជំនាញចុះត្រួតពិនិត្យនៅលើទីផ្សាររកឃើញនៅក្នុងស្រុកថ្មពួក នាពេលកន្លងមកផងដែរ ។
លោកបានបញ្ជាក់ថា មួយរយៈពេលចុងក្រោយនេះ ដោយអនុវត្តន៍តាមបទបញ្ជាពីលោកអគ្គនាយកកាំកុងត្រូលឲ្យពង្រឹងការត្រួតពិនិត្យតាមទីផ្សារ និងការនាំចូលទំនិញគ្រប់ប្រភេទពីប្រទេសជិតខាង តាមបន្ទាត់ព្រំដែន រកទំនិញហាមឃាត់ ដូចជា សាច់ខូចគុណភាព គ្មានស្លាកសញ្ញា និងកាលបរិច្ឆេទត្រឹមត្រូវ ។
លោក ស៊ាន ស៊ីណាត ប្រធានសាខាកាំកុងត្រូលខេត្ត បានដាក់បទបញ្ជាដល់មន្ត្រីក្រោមឱវាទត្រូវពង្រឹងការត្រួតពិនិត្យគ្រប់ទីផ្សារនៅទូទាំងស្រុក/ក្រុងក្នុងខេត្ត និងមាត់ច្រកទ្វារអន្តរជាតិ ព្រមទាំច្រកតំបន់ទាំង៣ ៕
ចែករំលែកព័តមាននេះ