ខេត្តប៉ៃលិន ៖ បុរសពីរនាក់រងរបួសធ្ងន់ ត្រូវកម្មករធ្វើផ្លូវជាមួយគ្នានៅក្បែរនោះឃើញទាន់ នាំគ្នាវាយបំបែកកញ្ចក់រថយន្ត រួចទាញយកជនរងគ្រោះចេញពីរថយន្តបញ្ជូនទៅសង្គ្រោះនៅមន្ទីរពេទ្យប្រទេសថៃ ។ ខណៈបើកបររថយន្តដឹកប្រេងម៉ាស៊ូតជាច្រើនប៊ីដុងនៅលើផ្លូវដែលទើបតែឈូសឆាយថ្មីក្នុងល្បឿនលឿន បណ្តាលឱ្យរអិលកង់មុខធ្លាក់ទៅខាងស្តាំក្រឡាប់ផ្ងារជើងរបួសទាំងពីរនាក់តែម្តង កាលពីវេលាម៉ោង៥និង៤៥នាទីល្ងាចថ្ងៃទី២៩ សីហា ២០១៥ កន្លងទៅនេះ ស្ថិតនៅចំណុចផ្លូវជាតិលេខ១០ចាស់ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ។
ប្រភពព័ត៌មានបានឱ្យដឹងថា បុរសរងគ្រោះទាំង២នាក់ខាងលើនេះ ម្នាក់ ឈ្មោះ ទិត្យ ថៃ អាយុ៥២ឆ្នាំ ជាប្រធានសន្តិសុខកាស៊ីណូក្រោន ជាអ្នកបើកបររថយន្តម៉ាកតាកូម៉ា មួយបាំងកន្លះ ពណ៌ស ពាក់ស្លាកលេខភ្នំពេញ 2D-1662 មួយគ្រឿង រងការខូចខាតយ៉ាងដំណំ និងម្នាក់ទៀតឈ្មោះ ល័ក្ខ អាយុ៣០ឆ្នាំ ជាអ្នកបើកបរគ្រឿងចក្រឈូសឆាយដីធ្វើផ្លូវលំខាងលើ និងបាត់ប្រាក់អស់ចំនួន៦លានរៀល អ្នកទាំងពីរនាក់រស់នៅភូមិកើតហេតុខាងលើ ៕
ចែករំលែកព័តមាននេះ