ខេត្តកំពង់ស្ពឺ ៖ បុរសវ័យចំណាស់ជាមនុស្សពិការម្នាក់ ដែលបានដាច់ជើងទាំងសងខាងដោយសារតែជាន់មីននៅលើសមរភូមិជាង២០ឆ្នាំមកហើយ បច្ចុប្បន្នទ្រាំរស់នៅយ៉ាងលំបាកវេទនាបំផុត រំពឹងលើប្រពន្ធនិងកូនជាអ្នករកស៊ីចិញ្ចឹមជីវិតប៉ុណ្ណោះ ។
ខេត្តកំពង់ស្ពឺ ៖ បុរសវ័យចំណាស់ជាមនុស្សពិការម្នាក់ ដែលបានដាច់ជើងទាំងសងខាងដោយសារតែជាន់មីននៅលើសមរភូមិជាង២០ឆ្នាំមកហើយ បច្ចុប្បន្នទ្រាំរស់នៅយ៉ាងលំបាកវេទនាបំផុត រំពឹងលើប្រពន្ធនិងកូនជាអ្នករកស៊ីចិញ្ចឹមជីវិតប៉ុណ្ណោះ ។
ជួបជាមួយអ្នកយកព័ត៌មានកោះសន្តិភាព បុរសវ័យចំណាស់ដែលជាជនពិការជើងទាំង២ខាងលើនេះ បាននិយាយរៀបរាប់ទាំងក្តីក្តុកក្តួលថា រូបគាត់ឈ្មោះ កុយ គឹមឈឿន អាយុ៦០ឆ្នាំ សព្វថ្ងៃរស់នៅក្នុងខ្ទមកម្សត់ ស្ថិតនៅក្នុងភូមិផ្សារចាស់ សង្កាត់ស្វាយក្រវ៉ាន់ ក្រុងច្បារមន ។
បុរសធ្លាក់ខ្លួនពិការ បានបន្តថា រូបគាត់បានចូលបម្រើការជាយោធាតាំងពីខែកុម្ភៈ ឆ្នាំ១៩៧៩ ក្នុងអង្គភាពយោធាខេត្តកំពង់ស្ពឺ ដើម្បីការពារទឹកដី លុះរហូតដល់ថ្ងៃទី២៩ តុលា ១៩៩០ ថ្នាក់លើក៏បានបញ្ជូនគាត់ទៅសមរភូមិប្រយុទ្ធជាមួយខ្មាំងសត្រូវ ដើម្បីការពារទឹកដីនៅទិសស្រុកឱរ៉ាល់ ខណៈកំពុងប្រយុទ្ធគ្នានោះជាអកុសលរូបគាត់បានជាន់មីនរបួសជើងទាំង២ ។ ភ្លាមៗនោះដែរ ថ្នាក់លើបានដឹកយកមកសង្គ្រោះនៅអង្គភាព ដោយសារតែរបួសធ្ងន់ពេក គ្រូពេទ្យក៏សម្រេចចិត្តកាត់ជើងគាត់ទាំង២តែម្តង ។ ចាប់តាំងពីពេលនោះមក រូបគាត់ក៏បានធ្លាក់ខ្លួនទៅជាមនុស្សពិការរហូតមកដល់សព្វថ្ងៃនេះ ។
លោកបានបន្តទាំងទឹកមុខស្រងូតស្រងាត់និងក្តីក្តុកក្តួលបំផុតថា ចាប់តាំងពីធ្លាក់ខ្លួនជាមនុស្សពិការមក គាត់រស់នៅយ៉ាងសែនលំបាកវេទនាខ្លាំងណាស់ ទាំងការហូបចុក ទាំងការធ្វើដំណើរ សព្វថ្ងៃបានប្រពន្ធរបស់គាត់ឈ្មោះ ងួន ចាន់ហន អាយុ៦២ឆ្នាំ ជាអ្នកជួយលើកទឹកចិត្ត ព្រមទាំងកូនស្រី-ប្រុសរបស់លោកជួយមើលថែរហូតមកដល់បច្ចុប្បន្ននេះ ទើបលោកគិតថា សូម្បីតែសត្វស្រមោចតូចមួយដែលមានជីវិតនៅចង់រស់ ចុះទម្រាំតែលោកជាមនុស្សត្រូវខំប្រឹងតស៊ូរស់តទៅទៀតដើម្បីឃើញការរីកចម្រើនរបស់ប្រទេសជាតិ មានការអភិវឌ្ឍន៍ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន ។
ជាចុងក្រោយ បុរសវ័យចំណាស់ពិការជើងទាំង២បានលើកដៃសំពះសុំសំណូមពរដល់ថ្នាក់លើ ជាពិសេសសម្តេចអគ្គមហាសេនាបតីតេជោ ហ៊ុន សែន មេត្តាជួយរូបគាត់ផង សព្វថ្ងៃគាត់រស់នៅជួបការលំបាកវេទនាខ្លាំងណាស់ គាត់ពិការជើងទាំង២ និងមានម្តាយចាស់ជរាអាយុ៩០ឆ្នាំ ពិការភ្នែកមើលមិនឃើញទៀតក្នុងបន្ទុកគ្រួសារ រាល់ថ្ងៃរំពឹងតែប្រពន្ធ និងកូនៗប៉ុណ្ណោះ គាត់សុំអង្វរទៅសម្តេចតេជោ សូមសម្តេចមេត្តាជួយឱ្យរូបគាត់បានទៅរស់នៅមានដីស្រែចម្ការ ផ្ទះស្នាក់នៅសមរម្យ ក្នុងមជ្ឈមណ្ឌលយោធិនពិការ៣៧១កោះស្លាផង ។
រូបគាត់សង្ឃឹមថា ថ្នាក់លើ ជាពិសេស សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជួយរូបគាត់ ក៏ដូចជាក្រុមគ្រួសារដែលកំពុងជួបការលំបាកនោះ ដែលកន្លងមក សម្តេចតេជោ និងសម្តេចកិត្តិព្រឹទ្ធបណ្ឌិត បានជួយដល់ជនពិការច្រើនរូបមកហើយ ៕
ចែករំលែកព័តមាននេះ