ខេត្តកណ្ដាល ៖ យុវជនម្នាក់ជាសន្តិសុខរោងចក្រត្រូវបាននគរបាលស្រុកស្អាងចាប់ខ្លួនកាលពីថ្ងៃទី៣០ ខែសីហា បន្ទាប់ពីបានលួងលោមក្មេងស្រីអាយុ១២ឆ្នាំម្នាក់រួមរ័កបានសម្រេចនៅក្នុងបន្ទប់ទឹកក្នុងផ្ទះខ្លួន
ខេត្តកណ្ដាល ៖ យុវជនម្នាក់ជាសន្តិសុខរោងចក្រត្រូវបាននគរបាលស្រុកស្អាងចាប់ខ្លួនកាលពីថ្ងៃទី៣០ ខែសីហា បន្ទាប់ពីបានលួងលោមក្មេងស្រីអាយុ១២ឆ្នាំម្នាក់រួមរ័កបានសម្រេចនៅក្នុងបន្ទប់ទឹកក្នុងផ្ទះខ្លួន ស្ថិតក្នុងភូមិព្រែកឡុង ឃុំរកាខ្ពស់ ស្រុកស្អាង ខេត្តកណ្តាល កាលពីម៉ោង៨ព្រឹក ថ្ងៃទី២៧ ខែសីហា ឆ្នាំ២០១៥កន្លងទៅ ។
មន្ត្រីនគរបាលផ្នែកព្រហ្មទណ្ឌស្រុកស្អាងបានឲ្យដឹងថា ជនសង្ស័យដែលបានចាប់ខ្លួនឈ្មោះ នាង ចន្ថា ភេទប្រុស អាយុ១៩ឆ្នាំ ជនជាតិខ្មែរ មុខរបរសន្តិសុខរោងចក្រ មានទីលំនៅភូមិ-ឃុំខាងលើ ។ ការចាប់ខ្លួនជនសង្ស័យនេះធ្វើឡើងតាមពាក្យបណ្ដឹងរបស់ឪពុក-ម្ដាយក្មេងស្រីរងគ្រោះដែលរស់នៅភូមិ-ឃុំជាមួយគ្នា និងមានការឯកភាពសម្របសម្រួលពី លោក លឹម សុគន្ថា ព្រះរាជអាជ្ញាអមសាលាដំបូងខេត្តកណ្តាល ។
មន្ត្រីនគរបាលបានឲ្យដឹងទៀតថា កន្លងមកក្នុងអំឡុងដើមខែសីហា ជនសង្ស័យឈ្មោះ នាង ចន្ថា បានព្យាយាមលួងលោមក្មេងស្រីរងគ្រោះរួមរ័កជាមួយគ្នា ប៉ុន្តែមិនបានសម្រេច បានត្រឹមតែស្ទាបអង្អែលប៉ុណ្ណោះ ។ លុះដល់ថ្ងៃកើតហេតុទី២៧ ខែសីហា ឆ្នាំ២០១៥ វេលាម៉ោង៨ព្រឹក ក្មេងស្រីរងគ្រោះបានទៅមើលទូរទស្សន៍នៅរោងលក់កាហ្វេ-បាយនៅផ្ទះរបស់ឈ្មោះ នាង ចន្ថា ។ ពេលនោះឈ្មោះ នាង ចន្ថា បានបបួលជនរងគ្រោះទៅបន្ទប់ទឹករួចបិទទ្វារ និងបានរួមរ័កជាមួយក្មេងស្រីរងគ្រោះដោយឈរផ្អែកជញ្ជាំងថ្មរហូតបានសំរេច រួចក៏ស្លៀកខោអាវរាងខ្លួនចេញក្រៅបន្ទប់ទឹកមកមើលទូរទស្សន៍ធម្មតា ។
ក្រោយមកក្មេងស្រីរងគ្រោះមានអាការៈឈឺចាប់ប្រដាប់ភេទ ហើយឪពុក-ម្ដាយក្មេងស្រីរងគ្រោះសួរនាំដេញដោលទើបប្រាប់ការពិតដឹង ។ លុះមកដល់ថ្ងៃទី៣០ ខែសីហា ឆ្នាំ២០១៥ ទើបឪពុក-ម្តាយប្តឹងឈ្មោះ នាង ចន្ថា មកសមត្ថកិច្ចនគរបាល ហើយសមត្ថកិច្ចក៏បានធ្វើការឃាត់ខ្លួនឈ្មោះ នាង ចន្ថា មកធ្វើការសាកសួរតែម្ដង ។
នៅចំពោះមុខសមត្ថកិច្ចនគរបាល ឈ្មោះ នាង ចន្ថា សារភាពថា ចាប់តាំងពីដើមខែសីហា ឆ្នាំ២០១៥ នេះខ្លួនបានលួងលោមក្មេងស្រីរងគ្រោះរួមរ័កជាច្រើនលើក តែនាងមិនព្រម បានត្រឹមតែស្ទាបអង្អែលប៉ុណ្ណោះ លុះដល់ថ្ងៃកើតហេតុខាងលើទើបលួងលោមរួមរ័កបានសម្រេច ។
នគរបាលបានឲ្យដឹងថា បើទោះបីជនង្ស័យ និងក្មេងស្រីរងគ្រោះត្រូវរ៉ូវគ្នាមិនមានការបង្ខិតបង្ខំ ឬចាប់រំលោភក្ដី ជនសង្ស័យនៅតែមានទោសពីបទរួមភេទជាមួយក្មេងស្រីជាអនីតិជនអាយុ ក្រោម១៥ឆ្នាំ ។
ពេលនេះសមត្ថកិច្ចនគរបាលស្រុកស្អាងបានកសាងសំណុំរឿង ដើម្បីបញ្ជូនជនសង្ស័យទៅតុលាការដើម្បីចាត់ការបន្តតាមច្បាប់ ៕
ចែករំលែកព័តមាននេះ