ខេត្តកណ្តាល ៖ លោក ឃ្លាំង វណ្ណធុល នាយខណ្ឌរដ្ឋបាលជលផលកណ្តាល បានដឹកនាំកម្លាំងមន្ត្រីជំនាញក្រោមឱវាទសហការជាមួយកម្លាំងសមត្ថកិច្ចមូលដ្ធានមានប៉ូលិស, ប៉េអឹម, យោធា ចុះប្រតិបត្តិការបង្ក្រាបបទល្មើសនេសាទខុសច្បាប់នារដូវបិទនេសាទនៅតាមបឹងបួរ ព្រែក ទន្លេ ក្នុងភូមិសាស្ត្រស្រុកល្វាឯម ខេត្តកណ្តាល កាលពីថ្ងៃទី២៨ ខែសីហា ឆ្នាំ២០១៥ តាំងពីព្រឹករហូតដល់ល្ងាចពេញមួយថ្ងៃ ។
ក្នុងយុទ្ធនាការប្រតិបត្តិការចុះបង្ក្រាបបទល្មើសនេសាទខុសច្បាប់របស់កម្លាំងចម្រុះខាងលើនេះ ជាលទ្ធផល បង្ក្រាបបានរបាំងព្រួលស្បៃមុងប្រវែង៥៥៥០ម៉ែត្រ, មាត់លូស្បៃមុង៦៥មាត់លូ, បង្គោលឫស្សីតូច-ធំ៣០១០ដើម និងបានចាក់លែងកូនត្រីចម្រុះតូច-ធំចូលក្នុងបឹងធម្មជាតិវិញ៤៣០គីឡូក្រាមផងដែរ ។ ចំណែកឧបករណ៍នេសាទខុសច្បាប់ដែលកម្លាំងចម្រុះបង្ក្រាបបានត្រូវបានរៀបចំធ្វើពិធីដុតកម្ទេចចោលនៅទីទួលចំណុចកើតហេតុនោះតែម្តង ។
ប្រជាពលរដ្ធជាច្រើនដែលរស់នៅក្នុងស្រុកល្វាឯមបានសាទរពីសកម្មភាពរបស់កម្លាំងចម្រុះដែលបានយកចិត្តទុកដាក់ក្នុងការចុះប្រតិបត្តិបង្ក្រាបបទល្មើសនេសាទខុសច្បាប់ដូចភ្លៀងរលឹមនាពេលកន្លងមក ប៉ុន្តែអ្វីដែលធ្វើឲពួកគាត់ព្រួយបារម្ភនោះ គឺការចិញ្ចឹមត្រីឆ្តោខុសច្បាប់មាននៅតាមស្រះ និងបែររាប់រយកន្លែងនៅក្នុងឃុំព្រែកក្មេង ស្រុកល្វាឯម ។
ចំពោះការចិញ្ចឹមត្រីឆ្តោខុសច្បាប់នៅក្នុងឃុំព្រែកក្មេងនេះ ប្រជាពលរដ្ឋចិញ្ចឹម២-៣ពាន់កូន តិចតួចទេ រីឯលោក អ៊ូ សុផាត មេឃុំព្រែកក្មេង និងកូនប្រុសបង្កើតរបស់លោកចិញ្ចឹមត្រីឆ្តោខុសច្បាប់តាមស្រះក្រោយផ្ទះរបស់គាត់រាប់ម៉ឺនកូនឯណោះ ហើយក្នុងមួយថ្ងៃៗយកកូនត្រីល្អិតមកធ្វើជាចំណីត្រីរាប់តោន ។ ចំពោះកូនត្រីល្អិតទាំងនេះ មិនដែលទៅជញ្ជាត់ឈ្នាងយកមកឱ្យត្រីឆ្តោស៊ីទេ មានតែប្រព្រឹត្តបទល្មើសនេសាទដាក់ឡុកស្បៃមុងទើបវាស៊ីគ្រប់គ្រាន់ ។
ចំណុចនេះហើយទើបការបង្ក្រាបបទល្មើសនេសាទមិនមានការថយចុះដូចជាវែកចកអ៊ីចឹង ។
ទាក់ទងបញ្ហានេះ «កោះសន្តិភាព» ព្យាយាមស្វែងរកការបំភ្លឺពីលោក អ៊ូ សុផាត ដែរតែទំនាក់ទំនងមិនអាចធ្វើទៅបាននៅរសៀលថ្ងៃទី៣០ សីហា ២០១៥ នេះ ។
ប្រជាពលរដ្ធបានលើកឡើងទៀតថា តំបន់ណាក៏ដូចតំបន់ណាដែរ «បើសិនជាបង្ក្រាបតែបទល្មើសនេសាទ មិនបង្ក្រាបការចិញ្ចឹមត្រីឆ្តោរទេ បទល្មើសនៅតែកើតមានដដែល» ៕
ចែករំលែកព័តមាននេះ