ខេត្តមណ្ឌលគិរី ៖ កម្មករវៀតណាមម្នាក់បានស្លា.ប់បាត់បង់ជីវិតនៅមាត់រណ្តៅរ៉ែមាសរបស់លោក តែ គឹមសាន នៅក្នុងឃុំចុងផ្លាស់ ស្រុកកែវសីមា ខេត្តមណ្ឌលគិរី កាលពីវេលាម៉ោង៨ និង៣៥នាទីយប់
ខេត្តមណ្ឌលគិរី ៖ កម្មករវៀតណាមម្នាក់បានស្លាប់បាត់បង់ជីវិតនៅមាត់រណ្តៅរ៉ែមាសរបស់លោក តែ គឹមសាន នៅក្នុងឃុំចុងផ្លាស់ ស្រុកកែវសីមា ខេត្តមណ្ឌលគិរី កាលពីវេលាម៉ោង៨ និង៣៥នាទីយប់ ថ្ងៃទី២៨ សីហា ២០១៥ ប៉ុន្តែករណីស្លាប់មនុស្សនេះហាក់បីដូចជាមានការបិទបាំង និងអាថ៌កំបាំងបំផុតពីលោក តែគឹម សាន ដែលជាម្ចាស់រណ្តៅនៅទីនោះ ព្រោះមានការខ្សឹបខ្សៀវពីមាត់មួយទៅមាត់មួយថា ភាគច្រើនការស្លាប់នៅទីនោះគឺអាចបណ្តាលពីការជីក ឬដាក់គ្រឿងបំផ្ទុះបំបែកថ្មខុសបច្ចេកទេស ។ តែមកដល់ពេលនេះគេថា អ្នកស្លាប់នៅមាត់រណ្តៅរ៉ែមាសនោះគឺរអិលជើងដួលបោកក្បាលទៅនឹងដីបណ្តាលឱ្យស្លាប់ទៅវិញ ។
មហាជននានានៅតំបន់នេះក៏ដូចជាក្រុមគ្រួសារសពបានស្នើឱ្យសមត្ថកិច្ចជំនាញជួយស្រាវជ្រាវរកមូលហេតុនៃការស្លាប់នេះឲ្យបានច្បាស់ផង ។
លោក ស៊ុន ប៊ុនធឿន អធិការស្រុកកែវសីមាបានប្រាប់ថា លោកទទួលបានព័ត៌មានថា អ្នកស្លាប់នោះគឺរអិលជើងបោកក្បាលស្លាប់ ។ លោកបានបង្វែរព័ត៌មាននេះឱ្យសួរទៅលោកអធិការរងម្នាក់ទៀត ព្រោះគាត់ជាអ្នកកាន់របាយការណ៍ ។
លោក សូរ សុវណ្ណ ស្នងការរងខេត្តបានប្រាប់ថា លោកគ្រាន់តែទទួលបានព័ត៌មានមកថា មានអ្នកស្លាប់ពិតមែន តែមូលហេតុពិតប្រាកដនៃការស្លាប់នោះមិនទាន់ដឹងមូលហេតុច្បាស់នៅឡើយទេ ។
លោក តែ គឹមសាន ម្ចាស់រណ្តៅរ៉ែមាស អ្នកយកព័ត៌មានបានព្យាយាមសុំការបំភ្លឺជុំវិញបញ្ហានេះដែរតាមរយៈទូរស័ព្ទជាច្រើនខ្សែ តែខាងក្រមហ៊ុនទូរស័ព្ទឆ្លើយថា លេខដែលោកអ្នកកំពុងហៅមិនត្រឹមត្រូវទេ ។
ព័ត៌មានចុងក្រោយដែលយើងទទួលបានពីអធិការរងស្រុកកែវសីមាម្នាក់សុំមិនបញ្ចេញឈ្មោះប្រាប់ថា អ្នកស្លាប់នោះជាជនជាតិវៀតណាម ឈ្មោះឡេ វ៉ាន់ធាន ភេទប្រុស អាយុ២៤ឆ្នាំ ។
ករណីកម្មករស្លាប់ក្នុងតំបន់ធ្វើរ៉ែមាសតែងកើតមានជាញឹកញាប់ ព្រោះតែទាក់ទងនឹងបច្ចេកទេសនៅមានកម្រិត ហើយម្យ៉ាងទៀតអណ្តូងរ៉ែខ្លះមានជម្រៅរាប់រយម៉ែត្រ ចឹងហើយបានជាមានករណីបាក់ដីសង្កត់មនុស្សជាហូរហែ ៕
ចែករំលែកព័តមាននេះ