រាជធានីភ្នំពេញ ៖ ផ្សែងហុយចេញពីលើអគារជាន់ទី២ក្នុងរោងចក្រកាត់ដេរយីហោអាតឃីត បង្កឲ្យមានការភ្ញាក់ផ្អើលដល់សមត្ថកិច្ច និងរថយន្តពន្លត់អគ្គិភ័យចុះទៅជួយអន្តរាគមន៍ កាលពីវេលាម៉ោង៧និង៣០នាទីយប់ថ្ងៃទី២៧ សីហា តាមផ្លូវបេតុងអត់លេខ ភូមិដំណាក់ធំ៣ សង្កាត់ស្ទឹងមានជ័យ ខណ្ឌមានជ័យ ។
ប្រជាពលរដ្ឋរស់នៅក្បែរកន្លែងកើតហេតុ បានឲ្យដឹងថា មុនពេលកើតហេតុ គេឃើញមានផ្សែងហុយចេញពីក្នុងរោងចក្រជាន់ទី២ ធ្វើឲ្យពួកគាត់រាយការណ៍ទៅលោកនាយនគរបាលប៉ុស្តិ៍រដ្ឋបាលស្ទឹងមានជ័យ ចុះទៅដល់គោះទ្វាររោងចក្រមិនបើកទ្វារឲ្យសមត្ថកិច្ចចូលទៅជួយអន្តរាគមន៍ទេ ។ បន្ទាប់មក សមត្ថកិច្ចបានទូរស័ព្ទហៅរថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញចំនួន៣គ្រឿងមកដល់ ខាងរោងចក្របើកទ្វារឱ្យតែមួយប្រលោះតូចសម្រាក់ដាក់ទុយោបាញ់ទឹកចូលទៅបាញ់ពន្លត់អស់មួយគ្រឿងបានរលត់ទៅវិញ ។
ចំពោះអគ្គិភ័យខាងលើនេះ តំណាងរោងចក្របានឲ្យដឹងថា បណ្តាលមកពីឆ្លងចរន្តអគ្គិសនីធ្វើឲ្យឆេះក្រណាត់អស់មួយចំនួនតូច និងឆេះខូចម៉ាស៊ីនផុងអស់៤គ្រឿង មិនមានអ្នករងរបួសទេ ។ លើសពីនេះទៀត តំណាងរោងចក្របានបញ្ជាក់ថា មូលហេតុដែលខាងរោងចក្រមិនព្រមបើកទ្វារឲ្យសមត្ថកិច្ចចូលទៅក្នុងរោងចក្រដោយគេគិតថា ឆេះទ្រង់ទ្រាយតូចអាចគ្រប់គ្រងបាន ម្យ៉ាងទៀត ខ្លាចមានជនឆ្លៀតឱកាសចូលទៅលួចយករបស់របរមានតម្លៃនៅក្នុងរោងចក្រ ។
ប្រជាពលរដ្ឋ បាននិយាយថា រោងចក្រខាងលើនេះទើបតែចាប់ផ្តើមដំណើរការ ហើយរើសបុគ្គលិកចូលជាបន្តបន្ទាប់មិនទាន់គ្រប់នៅឡើយទេ ៕
ចែករំលែកព័តមាននេះ