រាជធានីភ្នំពេញ ៖ បុរសជាប្តីជូនប្រពន្ធទៅធ្វើការ និងត្រូវដាក់ពាក្យសុំលាឈប់ពីការងារ ពេលត្រឡប់មកផ្ទះវិញត្រូវចោរគាស់ផ្ទះរើកកាយរបស់របររាយប៉ាយពេញផ្ទះលួចយកកូនជ្រូកដីដែលមានលុយ៦ម៉ឺនរៀល និងកាបូបស្ពាយ១
រាជធានីភ្នំពេញ ៖ បុរសជាប្តីជូនប្រពន្ធទៅធ្វើការ និងត្រូវដាក់ពាក្យសុំលាឈប់ពីការងារ ពេលត្រឡប់មកផ្ទះវិញត្រូវចោរគាស់ផ្ទះរើកកាយរបស់របររាយប៉ាយពេញផ្ទះលួចយកកូនជ្រូកដីដែលមានលុយ៦ម៉ឺនរៀល និងកាបូបស្ពាយ១ បង្កឲ្យមានការភ្ញាក់ផ្អើលកាលពីវេលាម៉ោង៣និង៣០នាទីទៀបភ្លឺឈានចូលថ្ងៃទី២៦ សីហា ស្ថិតនៅផ្ទះជួលលេខ១១៩ បន្ទប់លេខ៣ ក្រុម២ ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ ។
ស្ត្រីជាប្រពន្ធ ឈ្មោះ ប៉ុន ចំរើន អាយុ៣១ឆ្នាំ បម្រើការងារនៅហាងបារាំងមួយ ស្នាក់នៅផ្ទះជួល ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ និងបុរសជាប្តីឈ្មោះ ផៃ ឡាង អាយុ២៣ឆ្នាំ ជាកម្មករសំណង់ ។ មុនពេលកើតហេតុ ប្រពន្ធបានឱ្យប្តីជូនទៅធ្វើការ ដោយសារតែគាត់ត្រូវដាក់ពាក្យសុំលាឈប់ពីការងារដើម្បីទៅធ្វើការនៅកន្លែងផ្សេងទៀត រហូតដល់៤និង៣០នាទីទៀបភ្លឺទើប២នាក់ប្តីប្រពន្ធត្រឡប់មកផ្ទះ ស្រាប់តែឃើញទ្វារបន្ទប់បើកចំហ ហើយបើកភ្លើងទុកចោល ហើយរបស់របររាយប៉ាយពេញក្នុងផ្ទះ ភ្លាមៗនោះគាត់បានរកមើលរបស់របរស្រាប់តែឃើញបាត់កូនជ្រូកដី ក្នុងកូនជ្រូកដីនោះគាត់សន្សំលុយ៦ម៉ឺនរៀល ត្រូវចោរលួចយកទៅបាត់ រួមជាមួយកាបូប១តម្លៃ២០ដុល្លារ ។
ក្រោយពេលកើតហេតុ ទាំងពីរនាក់ប្តីប្រពន្ធក៏នាំគ្នាទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលចាក់អង្រែលើ ឲ្យជួយអន្តរាគមន៍ ៕
ចែករំលែកព័តមាននេះ