រាជធានីភ្នំពេញ ៖ បក្សប្រឆាំងកំពុងតែប្រើភាសា «ចាក់ក្រឡេករដ្ឋាភិបាល» រួចធ្វើល្បិចប្រើប្រាស់វប្បធម៌សន្ទនា ដើម្បីដោះស្រាយបញ្ហារបស់ក្រុមបក្សខ្លួនមួយគ្រាៗ គឺនឹងសាបរលាប គ្មានប្រយោជន៍ដល់ជាតិ
រាជធានីភ្នំពេញ ៖ បក្សប្រឆាំងកំពុងតែប្រើភាសា «ចាក់ក្រឡេករដ្ឋាភិបាល» រួចធ្វើល្បិចប្រើប្រាស់វប្បធម៌សន្ទនា ដើម្បីដោះស្រាយបញ្ហារបស់ក្រុមបក្សខ្លួនមួយគ្រាៗ គឺនឹងសាបរលាប គ្មានប្រយោជន៍ដល់ជាតិ ។
យោងតាមគេហទំព័រសង្គមហ្វេសប៊ុក មានរូបសម្តេចនាយករដ្ឋមន្ត្រី ហ៊ុន សែន បានលើកឡើងថា «ការចេញមុខបកស្រាយសារភាពជាសាធារណៈរបស់ប្រធានគណបក្សជំទាស់ CNRP ថ្មីៗនេះ គឺបានបង្ហាញច្បាស់ថា មេដឹកនាំនិងមន្ត្រីគណបក្សមួយនេះ គ្មានសុច្ឆន្ទៈនិងឧត្តមគតិជាតិ ពិតប្រាកដឡើយ ។ ការប្រើភាសា «ចាក់ក្រឡេករដ្ឋាភិបាល» គឺជាចេតនាដើម្បីបន្តបង្កអស្ថិរភាពនយោបាយ និងបញ្ហាដល់សង្គមជាតិ កាន់តែច្រើនឡើង» ។
សម្តេចគូសបញ្ជាក់ថា «ល្បិចប្រើប្រាស់វប្បធម៌សន្ទនា ដើម្បីគ្រាន់តែសម្រាប់ដោះស្រាយបញ្ហារបស់ក្រុមបក្សខ្លួនមួយគ្រាៗ ហើយក៏សាបរលាប គ្មានប្រយោជន៍ដល់ជាតិ ។ ទាំងមេដឹកនាំ និងកូនចៅគណបក្សជំទាស់ ត្រូវមានភាពស្មោះត្រង់ ហើយត្រូវបញ្ឈប់ជាបន្ទាន់នូវយុទ្ធសាស្ត្រចាប់ដៃជាន់ជើង គ្រប់រូបភាពទាំងអស់» ។
លោក សម រង្ស៊ី ប្រធានគណបក្សជំទាស់បានលើកឡើង កាលពីលោកចូលរួមសួរសុខទុក្ខសកម្មជនគណបក្សសង្គ្រោះជាតិ និងសមាជិកព្រឹទ្ធសភានៅពន្ធនាគាព្រៃស ថា «សម្បទានដែលអាចដោះស្រាយ បញ្ហាសកម្មជនរបស់ខ្លួនដែលកំពុងជាប់ពន្ធនាគានោះ គឺប្រហែលជាឈប់ចាក់ចង្កេះគ្នាគ្រប់រឿង» ។
លោកបញ្ជាក់ថា «ពេលនេះយើងមិនត្រូវយកមកនិយាយជាសាធារណៈនោះទេ ដើម្បី កុំឱ្យខូចខាតសាច់ការ ។ ការងារកំពុងធ្វើមិនទាន់បានសម្រេច បើយើងនិយាយជាសាធារណៈ ជួនមានខុស មានត្រូវ វាបែកភក់ បែកម៉ាំ វាអត់ចំណេញ តែបើយើងធ្វើការជាមួយគ្នា បង្ហាញឯកសារ បង្ហាញគំនិតរបស់យើងរៀងៗខ្លួន យើងគួបផ្សំគ្នាទៅនោះ យើងទទួលបានប្រសិទ្ធភាពជាង មិនធ្វើឲ្យមានការប៉ះទង្គិចគ្នាទៀតផង» ។
ទោះបីជាលោក សម រង្ស៊ី បៀបដូចជាស្ថិតក្នុងស្ថានភាពដូចគណបក្សហ្វ៊ុនស៊ិនប៉ិចនាពេលកន្លងមក ក៏លោក សម រង្ស៊ី នៅតែសង្កត់ធ្ងន់ ថា «គណបក្សសង្គ្រោះជាតិដែលលោកដឹកនាំ គឺខុសពីគណបក្សហ្វ៊ុនស៊ិនប៉ិច ដូចមេឃនិងដី និងខុសគ្នាដូចថ្ងៃនិងយប់» ។
លោក សម រង្ស៊ី បញ្ជាក់ថា «ហ្វ៊ុនស៊ិនប៉ិចធ្វើរណបគេ លក់ខ្លួនឱ្យគេ យើងមិនបាច់និយាយទេថាថោកយ៉ាងម៉េច តែខ្ញុំសុំធ្វើការកត់សម្គាល់ថា ការដែលគេចាប់សកម្មជន ក៏ដូចជាចាប់សមាជិកព្រឹទ្ធសភានោះ គឺបង្ហាញចំពោះមុខប្រជារាស្ត្រខ្មែរថា គណបក្សសង្គ្រោះជាតិស្មោះត្រង់ ។ គណបក្សសង្គ្រោះជាតិមិនរណបអ្នកណា ហើយមន្ត្រី និងសកម្មជនគណបក្សសង្គ្រោះជាតិ មិនលក់ខ្លួនឲ្យអ្នកណាទាំងអស់ ។ ដោយសារយើងថ្លៃថ្នូរ ដោយសារយើងរឹងមាំ ដោយសារយើងច្បាស់លាស់ ទើបគេធ្វើបាបយើង ។ តើមានដែលឃើញសមាជិកគណបក្សហ្វ៊ុនស៊ិនប៉ិចណា ត្រូវគេចាប់ដាក់គុកទេ ? បើលក់ខ្លួនឲ្យគេអស់ហើយ ចាំបាច់គេចាប់ដាក់គុកធ្វើអី» ។
ទាក់ទិននឹងការលើកឡើងរបស់លោក សម រង្ស៊ី ត្រូវបានលោក ញឹក ប៊ុនឆៃ អនុប្រធានទី២ គណបក្សហ្វ៊ុនស៊ិនប៉ិច មានប្រសាសន៍ច្រានចោល និងបានគូសបញ្ជាក់ថា «អ្វីដែលគេចាប់ខ្លួន គឺធ្វើខុសនឹងច្បាប់ ។ ឧទាហរណ៍ សមាជិកព្រឹទ្ធសភាម្នាក់នោះ ហេតុអីបានគេចាប់ខ្លួននោះ ដោយសារតែសមាជិកម្នាក់នោះក្លែងឯកសារសន្ធិសញ្ញារវាងសាធារណរដ្ឋប្រជាមានិតកម្ពុជា ជាមួយនឹងសាធារណរដ្ឋសង្គមនិយមវៀតណាម នៅឆ្នាំ១៩៧៩ ។ ព្រោះអ្នកក្លែងនោះមិនបានគិតដល់ថា សម័យនោះគេប្រើអង្គុលីលេខ ហើយសម័យនេះគេកែប្រែដោយវាយនឹងកុំព្យូទ័រ ដូច្នេះវាខុសគ្នា ។ គ្រាន់តែចំណុចនេះមួយ បានបង្ហាញថាក្លែងបាត់ទៅហើយ» ។
ជាមួយគ្នានោះដែរលោក ញឹក ប៊ុនឆៃ បានឲ្យដឹងទៀតថា «មានសមាជិកគណបក្សសង្គ្រោះជាតិមួយរូបទៀត បានចោទរដ្ឋាភិបាលថាប្រើប្រាស់ផែនទីក្លែងក្លាយ ដែលការចោទនេះ អាចនឹងមានទោសផងដែរ ។ ជាងនេះមានសមាជិកមួយចំនួនទៀតបានធ្វើសកម្មភាពខុសនឹងច្បាប់ផងដែរ ក៏អាចនឹងមានទោសដែរ» ។
នៅថ្ងៃទី១៨ សីហា គេហទំព័រដើមអម្ពិល បានដកស្រង់សម្តីសម្តេចតេជោ ហ៊ុន សែន ដោយចោទមេដឹកនាំគណបក្សប្រឆាំងថាជា «មេចោរ» បន្ទាប់ពីលោក សម រង្ស៊ី បានអះអាងថា នឹងឈប់ចាក់ចង្កេះរដ្ឋាភិបាលពីរឿងរសើបមួយចំនួនរួចមក ។
លោក សយ សុភាព ត្រូវបានបណ្តាញផ្សាយព័ត៌មានវីអូឌី អះអាងថា លោកបានសម្ភាសន៍តាមទូរស័ព្ទជាមួយសម្តេចតេជោ ហ៊ុន សែន ដោយដកស្រង់សម្តីថា ៖ «ក្រុមចោរដែលបំផ្លាញស្ថិរភាពកន្លងទៅ បានចេញមុខសារភាពហើយ គឺលោក សម រង្ស៊ី និងគណបក្សរបស់គាត់ ហៅថា ក្រុមចោរ ហើយអ្នកដែលបង្កអស្ថិរភាព គឺលោក សម រង្ស៊ី និងគណបក្សរបស់គាត់ ដែលតែងតែចាក់ពីក្រោយខ្នងរាជរដ្ឋាភិបាល» ។
លោកបានដកស្រង់ទៀតថា ៖ «អ៊ីចឹង ដើម្បីជម្រះមន្ទិលសម្រាប់គណបក្សប្រជាជន សម្រាប់សម្តេចតេជោ សម្រាប់រាជរដ្ឋាភិបាល គណបក្ស សម រង្ស៊ី ក៏ដូចជាលោក សម រង្ស៊ី ខ្លួនឯងផ្ទាល់ ត្រូវកែគ្រប់ចំណុចដែលខ្លួនបានធ្វើនូវអំពើទុច្ចរិត មកលើសម្តេចនាយក មកលើរាជរដ្ឋាភិបាល និងមកលើគណបក្សប្រជាជន ។ អាហ្នឹងទើបវប្បធម៌សន្ទនា អាចដើរទៅមុខបាន ព្រោះថ្ងៃនេះ មេចោរបានចេញសារភាព» ។
សម្រាប់អ្នកនាំពាក្យគណបក្សប្រជាជនកម្ពុជា លោក សុខ ឥសាន្ត ក៏ត្រូវបានដកស្រង់សម្តីថា ហាក់មិនជឿថា សម្តេចនាយករដ្ឋមន្ត្រី បានប្រើពាក្យពេជន៍បែបនេះទេ ។ លោកបញ្ជាក់ថា ៖ «ខ្ញុំយល់ថា ខ្លឹមសារហ្នឹងដូចជាមិនមែនជាសម្តីគាត់ផ្ទាល់ទេ ព្រោះខ្ញុំចំណាំមើល គាត់មិនដែលមានប្រសាសន៍តាពាសទេ ។ អ៊ីចឹងបានថា ខ្ញុំមិនអាចបកស្រាយបាន ព្រោះខ្ញុំអត់បានឮផ្ទាល់» ។
ដោយឡែក មន្ត្រីជាន់ខ្ពស់គណបក្សសង្គ្រោះជាតិ លោក អេង ឆៃអ៊ាង ថ្លែងថា បើការស្រង់សម្តីនោះ ពិតជាសម្តីរបស់សម្តេចតេជោ ហ៊ុន សែន មែននោះ លោកថា លោកសោកស្តាយ ព្រោះនៅគ្រានេះ ភាគីទាំងពីរគួររកដំណោះស្រាយបញ្ហាជាតិ ប្រសើរជាងដាក់បន្ទុកឱ្យគ្នាទៅវិញទៅមក ។
លោកថា ៖ ប្រសិនជាការថ្លែងហ្នឹងជាការពិត ខ្ញុំសោកស្តាយចំពោះការប្រើពាក្យពេចន៍ ព្រោះអ្នកនយោបាយ ការប្រើប្រាស់ពាក្យពេចន៍មានច្រើនណាស់ យើងអាចប្រើប្រាស់ភាសាដែលសមរម្យថ្លៃថ្នូរ ។ អ៊ីចឹងបានថា យើងគួររកគ្នាគិតអំពីរកដំណោះស្រាយ វាល្អជាងការដាក់បន្ទុក ការបន្ទោសគ្នា ។ កាលណាយើងគិតតែរឿងបន្ទោស អត់គិតរឿងដំណោះស្រាយ វាមិនចម្រើន មិនចំណេញដល់ប្រទេសជាតិទេ ។
អ្នកសង្កេតការណ៍លើកឡើងថា «ការឆ្លើយឆ្លងគ្នាទៅវិញទៅមក រវាងលោក សម រង្ស៊ី និងសម្តេចតេជោ ដែលអ្នកសារព័ត៌មានដកស្រង់សម្តី យកទៅផ្សាយនៅពេលនេះ ធ្វើឡើងស្របពេល ដែលស្ថានការណ៍នយោបាយចាប់ផ្តើមឡើងកម្តៅ ខណៈសកម្មជននិងមន្ត្រីជាន់ខ្ពស់របស់គណបក្សប្រឆាំង សរុប១៥នាក់ ត្រូវបានអាជ្ញាធរ ចាប់ដាក់ពន្ធនាគារព្រៃស ជាបន្តបន្ទាប់» ៕
ចែករំលែកព័តមាននេះ