ខេត្តបន្ទាយមានជ័យ ៖ ក្រុមចោរលួចគាស់ផ្ទះរបស់ប្រជាពលរដ្ឋមួយសម្បុកមានគ្នា៤នាក់ត្រូវបានកម្លាំងនគរបាលក្រុងសិរីសោភ័ណបើកការស៊ើបអង្កេតស្រាវជ្រាវ និងឈានដល់ការចាប់ឃាត់ខ្លួនជាបន្តបន្ទាប់ ។
លោកវរសេនីយ៍ត្រី អ៊ិត នៀត អធិការរងនគរបាលក្រុងសិរីសោភ័ណបានឲ្យដឹងថា បន្ទាប់ពីមានបណ្តឹងពីជនរងគ្រោះជាម្ចាស់ផ្ទះឈ្មោះ ហាង ទ្រី ភេទប្រុស អាយុ៥៤ឆ្នាំ នៅភូមិ៤ សង្កាត់ព្រះពន្លា ក្រុងសិរីសោភ័ណថា កាលពីថ្ងៃទី០១ ខែសីហា ឆ្នាំ២០១៥ មានចោរលួចគាស់ជញ្ជាំងផ្ទះរបស់គាត់យកអស់ខ្នងកង់ម៉ូតូ១គូ, ម៉ាស៊ីនថត១គ្រឿង,ខោខូវប៊យ២, កម្ទេចត្បូងប៉ៃលិនចំនួន២ថង់តូច, ខ្សែភ្លើង១ដុំ និងក្បាលវីស៊ីឌី១គ្រឿង ខណៈពេលគាត់មិននៅផ្ទះ រវល់ទៅមើលជម្ងឺឯខេត្តសៀមរាប លោកឧត្តមសេនីយ៍ត្រី អាត់ ខែម ស្នងការនគរបាលខេត្តបន្ទាយមានជ័យបានដាក់បទបញ្ជាឲ្យកម្លាំងនគរបាលក្រុងសិរីសោភ័ណត្រូវធ្វើការស៊ើបអង្កេតស្រាជ្រាវរកមុខសញ្ញាសង្ស័យ និងឈានដល់ការបង្ក្រាបចាប់ឃាត់ខ្លួនជាបន្តបន្តាប់ដោយមានកិច្ចសហការជាមួយជនរងគ្រោះ និងមានការសម្របសម្រួល ពីលោកព្រះរាជអាជ្ញារងអមសាលាដំបូងខេត្តបន្ទាយមានជ័យផងដែរ ។
លោកអធិការរងបានបញ្ជាក់ថា ដំបូងនៅថ្ងៃទី០៣ ខែសីហា ឆ្នាំ២០១៥ សមត្ថកិច្ចបានធ្វើការចាប់ឃាត់ខ្លួនឈ្មោះ សាំង សុវណ្ណ ភេទប្រុស អាយុ៣៧ឆ្នាំ និងឈ្មោះ ឆេង វត្តី ភេទប្រុស អាយុ២៦ឆ្នាំ ។ បន្ទាប់មកនៅរសៀលថ្ងៃទី០៤ខែសីហា ឆ្នាំ២០១៥នេះដែរ សមត្ថកិច្ចបានធ្វើការចាប់ឃាត់ខ្លួនឈ្មោះ អួង ចាន់រ៉ាហ្សា ភេទប្រុស អាយុ១៩ឆ្នាំ និងឈ្មោះ ស៊ាង ស៊ីចេង ភេទប្រុស អាយុ១៦ឆ្នាំ ។ ជនទាំង៤នាក់រស់នៅភូមិ៤ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ គឺជាមុខសញ្ញាប្រើប្រាស់គ្រឿងញៀន និងធ្លាប់ធ្វើសកម្មភាពលួចយ៉ាងសកម្ម ។
នៅចំពោះមុខសមត្ថកិច្ច ជនសង្ស័យទាំង៤នាក់បានសារភាពថា ពួកខ្លួនពិតជាបានធ្វើសកម្មភាពលួចគាស់ក្តារជញ្ជាំងផ្ទះរបស់ឈ្មោះ ហាង ទ្រី មែន ហើយចំពោះសម្ភារ និងទ្រព្យសម្បត្តិដែលយកបាន ពួកគេយកទៅលក់បានលុយទិញថ្នាំញៀនជក់អស់ហើយ ។
ដោយផ្អែកទៅលើចម្លើយសារភាព និងមានបណ្តឹងពីជនរងគ្រោះ ជនសង្ស័យទាំង៤នាក់ត្រូវបានកម្លាំងនគរបាលការិយាល័យព្រហ្មទណ្ឌកម្រិតធ្ងន់រៀបចំសំណុំរឿងបញ្ជូនទៅសាលដំបូងខេត្តបន្ទាយមានជ័យដើម្បីចាត់ការតាមនិតិវិធីច្បាប់នៅថ្ងៃទី០៥ ខែសីហា ឆ្នាំ២០១៥នេះ ៕
ចែករំលែកព័តមាននេះ