ខេត្តកំពង់ឆ្នាំង ៖ គ្រោះថ្នាក់ចរាចរណ៍តូចមួយមិនព្រមប្រញាប់ដោះស្រាយបញ្ចប់រឿង ម្ខាងៗប្រឹងតវ៉ាយកត្រូវរៀងៗខ្លួន បង្កការកកស្ទះចរាចរណ៍ រហូតដល់សមត្ថកិច្ចនគរបាលចរាចរក្រុង រួមទាំងអ្នកកាសែត និងទូរទស្សន៍ទៅដល់ ទើបព្រមសម្របសម្រួលបញ្ចប់រឿង ដោយសុខចិត្តយករថយន្តទៅជួសជុលរៀងៗខ្លួន កាលពីវេលាម៉ោង១និង១០នាទីរសៀលថ្ងៃទី៥ សីហា នៅចំមុខផ្សារលើចំណុចផ្លូវបែកជា៤ ស្ថិតក្នុងភូមិផ្សារលើ សង្កាត់ផ្សារឆ្នាំង ក្រុងកំពង់ឆ្នាំង ។
សាក្សីនៅកន្លែងកើតហេតុ បាននិយាយថា មុនពេលកើតហេតុ គេឃើញរថយន្តកាមរីគូទស្វិត បាញ់ថ្នាំពណ៌កងរាជអាវុធហត្ថ ពាក់ស្លាកលេខខេមរភូមិន្ទ 2-2348 បើកបរដោយមន្ត្រីកងរាជអាវុធហត្ថម្នាក់មិនស្គាល់ឈ្មោះ តាមបណ្តោយផ្លូវជាតិលេខ៥ ក្នុងទិសដៅពីត្បូងទៅជើង លុះមកដល់ចំណុចកើតហេតុ មានរថយន្តម៉ាកឡិចស៊ីស RX.300 មួយគ្រឿង ពណ៌ស្ករ ពាក់ស្លាកលេខភ្នំពេញ 2V-1638 បើកបរដោយមន្ត្រីនគរបាលម្នាក់មិនស្គាល់ឈ្មោះដែរ បើកចេញពីមុខផ្សារលើក្នុងទិសដៅពីកើតទៅលិច ហើយក៏ជ្រុលបុកជាមួយរថយន្តកងរាជអាវុធហត្ថ ក្នុងទិសដៅខ្វែងគ្នា បណ្តាលឱ្យកំពឹតកាងខាងមុខបន្តិចបន្តួចរៀងៗខ្លួន ក្នុងនោះរថយន្តកាមរីបែកស្តុបជំហៀងខាងស្តាំម្ខាងផងដែរ ។ ភាគីទាំងពីរ ដែលម្ខាងជាមន្ត្រីកងរាជអាវុធហត្ថ ឯម្ខាងទៀតជាមន្ត្រីនគរបាលបាន ជជែកគ្នាយកត្រូវរៀងៗខ្លួន មិនព្រមដោះស្រាយបញ្ចប់រឿងសោះ ។
មន្ត្រីនគរបាលក្រុងកំពង់ឆ្នាំង បានឱ្យដឹងថា ដោយសារមិនព្រមដោះស្រាយបញ្ចប់រឿ ហើយបង្កឱ្យកកស្ទះចរាចរណ៍នោះ សមត្ថកិច្ចនគរបាលក៏ទៅជួយសម្រួលចរាចរណ៍ និងសុំឱ្យភាគីទាំងពីរសម្របសម្រួលគ្នាទៅ ស្របពេលនោះ ក្រុមអ្នកកាសែត ទូរទស្សន៍ក៏បានទៅដល់ ភាគីទាំង២បានប្រញាប់ចូលក្នុងរថយន្ត ហើយបើកចេញទៅរៀងៗខ្លួនដោយគ្រាន់តែប្រាប់ថា ព្រមយករថយន្តទៅធ្វើរៀងៗខ្លួន ៕
ចែករំលែកព័តមាននេះ