រាជធានីភ្នំពេញ ៖ ទូហ្គេមខុសច្បាប់ និងជាគ្រឿងឧបករណ៍អេឡិចត្រូនិចមួយសម្រាប់ពង្វក់ដល់ស្មារតី និងអារម្មណ៍របស់ក្មេងៗសិស្សសាលាចំនួន៦គ្រឿងត្រូវបានអាជ្ញាធរខណ្ឌមានជ័យដឹកនាំដោយលោក ពេជ្រ កែវមុនី អភិបាល នៃគណៈអភិបាលខណ្ឌមានជ័យ នៅព្រឹកថ្ងៃទី០៥ ខែសីហា ឆ្នាំ២០១៥នេះ បានធ្វើការវាយកម្ទេច និងដុតបំផ្លាញចោលនៅចំណុចបរិវវេណដីឡូតិ៍ក្នុងផ្ទៃបឹងទំពុន ស្ថិតក្នុងភូមិទួលរកា សង្កាត់ចាក់អង្រែក្រោម ។ ក្នុងការកម្ទេចទូហ្គេមខុសច្បាប់ជាច្រើនគ្រឿងខាងលើនេះក៏មានការចូលរួមពីសំណាក់លោក ឌី រ័ត្នខេមរុណ អភិបាលរងខណ្ឌ, មេបញ្ជាការកងរាជអាវុធហត្ថខណ្ឌ, អធិការរង និងមន្ត្រីចំណុះសាលាខណ្ឌមានជ័យជាច្រើនរូបទៀតផងដែរ ។
លោក ពេជ្រ កែវមុនី អភិបាលខណ្ឌមានជ័យបានមានប្រសាសន៍ឱ្យដឹងថា បណ្តាទូហ្គេមជាច្រើនគ្រឿងដែលអាជ្ញាធរធ្វើការវាយកម្ទេច និងដុតបំផ្លាញចោលនៅពេលនេះ គឺជាទូរហ្គេមដែលអាជ្ញាធរបង្ក្រាបបានកាលពីពេលថ្មីៗកន្លងមកនៅតាមបណ្តាភូមិសាស្ត្រសង្កាត់ទាំង៤នៅក្នុងខណ្ឌមានជ័យទាំងមូល ។ លោកអភិបាលបានបន្តទៀតថា ដោយអនុវត្តតាមបញ្ជាផ្ទាល់របស់លោក ប៉ា សុជាតិវង្ស អភិបាល នៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរាជធានី ដែលលោកតែងតែធ្វើការក្រើនរំលឹកជារឿយៗដល់មន្ត្រីក្រោមឱវាទគ្រប់ជាន់ថ្នាក់ ជាពិសេសកម្លាំងគណៈបញ្ជាការឯកភាពតាមបណ្តាខណ្ឌនៅក្នុងរាជធានី ធ្វើយ៉ាងណាត្រូវយកចិត្តទុក ដាក់ខ្ពស់ចំពោះបញ្ហាបទល្មើស ក៏ដូចជាល្បែងស៊ីសងផ្សេងៗគ្រប់រូបភាពទាំងអស់ដែលកំពុងកើតមាននៅមូលដ្ឋានរបស់ខ្លួន ដោយក្នុងនាមជាប្រធានគណៈបញ្ជាការធ្វើយ៉ាងណាត្រូវធ្វើការបង្ក្រាប ក៏ដូចជាទប់ស្កាត់ឱ្យបាន ដោយមិនបណ្តែតបណ្តោយឱ្យកើតមានជាដាច់ខាត ។
សូមបញ្ជាក់ថា ដោយគោរពទៅតាមបទបញ្ជាផ្ទាល់របស់ប្រធានគណៈបញ្ជាការឯកភាពរាជធានី គេកត់សម្គាល់ឃើញថា រយៈពេលប្រមាណ២ខែកន្លងមកនេះ សម្រាប់ភូមិសាស្ត្រខណ្ឌមានជ័យបានធ្វើការទប់ស្កាត់នូវបទល្មើសជាច្រើន ដូចជាលួច ឆក់ ប្លន់ ជាដើម និងធ្វើការបង្ក្រាបបាននូវទីតាំងលួចលាក់ប្រព្រឹត្តល្បែងស៊ីសងខុសច្បាប់មួយចំនួនធំផងដែរ ដូចជា បៀ អាប៉ោង កន្ទុយលេខ បញ្ជល់មាន់ និងជាពិសេសគឺទីតាំងហ្គេមបាញ់ត្រីខុសច្បាប់ជាច្រើនទីតាំងក្នុងភូមិសាស្ត្រខណ្ឌទាំងមូលត្រូវបានបង្ក្រាប ដោយក្នុងរយៈពេល២ខែនេះ អាជ្ញាធរបង្ក្រាបបានចំនួន៣ទីតាំង ស្មើនឹង៤លើក ដកហូតទូហ្គេម៦គ្រឿងយកមករក្សាទុកនៅសាលាខណ្ឌរង់ចាំធ្វើការវាយបំផ្លាញ និងដុតកម្ទេចចោលដូចរូបភាពជាក់ស្តែង ។
លោកអភិបាលខណ្ឌមានជ័យបានបញ្ជាក់ថា ហ្គេមបាញ់ត្រីទាំងនេះគឺជាប្រភេទហ្គេមមួយដែលយកលុយទៅប្តូរជាកាក់មកវិញ ដើម្បីលេង ហើយវាគឺជាប្រភេទហ្គេមដែលពង្វក់ស្មារតីក្មេងៗតូចៗ ឬយុវជនមួយចំនួនឱ្យបំភ្លេច ក៏ដូចជាបោះបង់ការរៀនសូត្រចោល ។ ដូច្នេះហើយក្នុងនាមជាអាជ្ញាធរមូលដ្ឋានត្រូវតែធ្វើការបង្ក្រាប និងទប់ស្កាត់ជាបន្ទាន់ យើងមិនបណ្តែតបណ្តោយឱ្យមានទីតាំងបែបនេះ រីករាលដាលកាន់តែច្រើននៅក្នុងភូមិសាស្ត្រខណ្ឌមានជ័យជាដាច់ខាត ។
ឆ្លៀតក្នុងឱកាសខាងលើនេះ ក្នុងនាមជាប្រធានគណៈបញ្ជាការឯកភាពខណ្ឌមានជ័យ លោកអភិបាលបានប្តេជ្ញាថា នឹងខិតខំបន្តសកម្មភាពចុះបង្កាបង្ក្រាបឱ្យអស់នូវសកម្មភាពបទល្មើសលួច ឆក់ ប្លន់ បញ្ហាគ្រឿងញៀន កន្ទុយលេខ និងល្បែងស៊ីសងគ្រប់បែបយ៉ាង បន្ថែមទៀតទៅថ្ងៃមុខ ដោយអាជ្ញាធរមិនព្រងើយកន្តើយបណ្តែតបណ្តោយឱ្យសកម្មភាពអសន្តិសុខបែបនេះកើតមានជាបន្តបន្ទាប់ទៀតឡើយ ។
ជាចុងក្រោយលោក ពេជ្រ កែវមុនី ក៏បានផ្តាំផ្ញើដល់មន្ត្រីក្រោមឱវាទទាំងអស់ពង្រឹងសមត្ថភាពរបស់ខ្លួនបន្ថែមទៀត ដើម្បីបម្រើការងារ ក៏ដូចជាថែរក្សាសន្តិសុខ សុវត្ថិភាព ជូនបងប្អូនប្រជាពលរដ្ឋនៅក្នុងមូលដ្ឋានឱ្យរស់នៅប្រកបទៅដោយភាពសុខសប្បាយជានិរន្តតទៅ ៕
ចែករំលែកព័តមាននេះ