រាជធានីភ្នំពេញ ៖ មន្ត្រីនគរបាលប៉ុស្តិ៍រដ្ឋបាលស្រះចកបាននិយាយថា ជនសង្ស័យជួញដូរថ្នាំញៀនម្នាក់ត្រូវកម្លាំងនគរបាលប៉ុស្តិ៍រដ្ឋបាលស្រះចកជិះម៉ូតូល្បាត ចាប់ឃាត់ខ្លួនកាលពីវេលាម៉ោង០៩យប់ ថ្ងៃទី០៤ កក្កដា ២០១៥ នៅមុខក្រុមប្រឹក្សាអភិវឌ្ឍន៍(CDC) វិថីព្រះស៊ីសុវត្ថិ ស្ថិតក្នុងភូមិ១១ សង្កាត់ស្រះចក ខណ្ឌដូនពេញ ក្រោយពីសមត្ថកិច្ចឆែកឆេររកឃើញថ្នាំញៀនមួយកញ្ចប់ដែលជនសង្ស័យលាក់ទុកក្នុងកញ្ចប់បារី ។
មន្ត្រីដដែលបាននិយាយទៀតថា នៅវេលាម៉ោងខាងលើ កម្លាំងនគរបាលប៉ុស្តិ៍រដ្ឋបាលស្រះចកបានជិះម៉ូតូល្បាតក្នុងភូមិសាស្ត្ររបស់ខ្លួន លុះមកដល់មុខក្រុមប្រឹក្សាអភិវឌ្ឍន៍(CDC)ស្ថិតក្នុងភូមិ១១ សង្កាត់ស្រះចក ខណ្ឌដូនពេញក៏ប្រទះឃើញបុរសម្នាក់ជិះម៉ូតូម៉ាកគុបជ្រុង៥០ ពណ៌ទឹកប្រាក់បើកលើកំណាត់វិថីព្រះស៊ីសុវត្ថិទៅវិញទៅមកជាច្រើនលើកដោយមានការសង្ស័យកម្លាំងនគរបាលបានហៅឲ្យឈប់ម៉ូតូរួចឆែកឆេរក៏ប្រទះឃើញថ្នាំញៀនប្រភេទម៉ាទឹកកមួយកញ្ចប់ធំដែលជននោះលាក់ទុកក្នុងកញ្ចប់បារី ។
ជនសង្ស័យដែលឃាត់ខ្លួនក្រោយពីរកឃើញថ្នាំញៀនមានឈ្មោះជា ងួនស៊ុន ភេទប្រុស អាយុ៣០ឆ្នាំ មុខរបរមិនពិតប្រាកដ ស្នាក់នៅផ្ទះជួល ផ្លូវលេខ៨៦ ភូមិ២២ សង្កាត់ស្រះចក ខណ្ឌដូនពេញ ក៏ប៉ុន្តែជននេះគឺជាមុខសញ្ញាជួញដូរថ្នាំញៀនដ៏សកម្មផងដែរ។
បច្ចុប្បន្នជនសង្ស័យខាងលើត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលនគរបាលខណ្ឌដូនពេញដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ៕
ចែករំលែកព័តមាននេះ