រាជធានីភ្នំពេញ ៖ ជនសង្ស័យម្នាក់បានធ្វើសកម្មភាពលួចកាច់កញ្ចក់រថយន្តម៉ាកហាយលែនឌ័រ ដែលម្ចាស់បានចតនៅខាងមុខផ្ទះបានសម្រេច តែត្រូវបានម្ចាស់រថយន្តឃើញទាន់ ចាប់ឃាត់ខ្លួនប្រគល់ឲ្យសមត្ថកិច្ចនគរបាលប៉ុស្តិ៍បឹងកេងកង៣ ។
រាជធានីភ្នំពេញ ៖ ជនសង្ស័យម្នាក់បានធ្វើសកម្មភាពលួចកាច់កញ្ចក់រថយន្តម៉ាកហាយលែនឌ័រ ដែលម្ចាស់បានចតនៅខាងមុខផ្ទះបានសម្រេច តែត្រូវបានម្ចាស់រថយន្តឃើញទាន់ ចាប់ឃាត់ខ្លួនប្រគល់ឲ្យសមត្ថកិច្ចនគរបាលប៉ុស្តិ៍បឹងកេងកង៣ ។ ការចាប់ឃាត់ខ្លួននេះបានកើតឡើងកាលពីវេលាម៉ោង១ និង៣០នាទីថ្ងៃត្រង់ ថៃ្ងទី៤ ខែសីហា ឆ្នាំ ២០១៥ ស្ថិតនៅចំណុចមុខផ្ទះលេខ២ ផ្លូវលេខ៣៩៦ សង្កាត់បឹងកេងកង៣ ខណ្ឌចំការមន ។
សមត្ថកិច្ចនគរបាលប៉ុស្តិ៍បឹងកេងកងទី៣បានឲ្យដឹងថា ជនសង្ស័យដែលធ្វើសកម្មភាពលួចកាច់កញ្ចក់រថយន្តនេះមានឈ្មោះ សៀង ប៉េងឡេង ភេទប្រុស អាយុ២៤ឆ្នាំ មានមុខរបរជាងជុសជុលរថយន្ត ។ មុនពេលកើតហេតុ ជនសង្ស័យបានដើរទៅធ្វើសកម្មភាពលួចកាច់កញ្ចក់រថយន្តម៉ាក ហាយលែនឌ័រមួយគ្រឿងបានសម្រេចចំនួន១គូ(ទាំងសងខាង) ខណៈពេលដែលកំពុងធ្វើសកម្មភាពនោះ ស្រាប់តែត្រូវបានម្ចាស់រថយន្តចេញមកឃើញទាន់ ក៏ស្រែកឆោឡោថា ចោរៗ បង្កឲ្យមានការភ្ញាក់ផ្អើល ធ្វើឲ្យជនសង្ស័យភ័យក៏រត់គេចខ្លួន រួចបោះកញ្ចក់រថយន្តចោល ប៉ុន្តែត្រូវបានម្ចាស់រថយន្តដេញតាមពីក្រោយចាប់ឃាត់ខ្លួនបានប្រគល់ឲ្យសមត្ថកិច្ចតែម្តង ។
នៅចំពោះមុខសមត្ថកិច្ច ជនសង្ស័យរូបនេះបានសារភាពថា ខ្លួនពិតជាធ្វើសកម្មភាពលួចកាច់កញ្ចក់រថយន្តរបស់ជនរងគ្រោះពិតប្រាកដមែន ហើយបច្ចុប្បន្នជនសង្ស័យខាងលើត្រូវបានសមត្ថកិច្ចនគរបាលប៉ុស្តិ៍បឹងកេងកង៣ ធ្វើការសាកសួរ និងបញ្ជូនខ្លួនទៅកាន់អធិការដ្ឋាននគរបាលខណ្ឌចំការមន ដើម្បីឃុំខ្លួនបណ្តោះអាសន្ន និងកសាងសំណុំរឿងបញ្ជូនខ្លួនទៅតុលាការ ចាត់ការតាមផ្លូវច្បាប់ ៕
ចែករំលែកព័តមាននេះ