ខេត្តបន្ទាយមានជ័យ ៖ ជនសង្ស័យជួញដូរសារធាតុញៀនខុសច្បាប់វ័យក្មេងម្នាក់ត្រូវបានកម្លាំងកងរាជអាវុធហត្ថខេត្តបង្ហាញមុខជាសាធារណៈ និងរៀបចំសំណុំរឿងបញ្ជូនទៅសាលដំបូងខេត្តបន្ទាយមានជ័យ ដើម្បីចាត់ការតាមនិតិវិធីច្បាប់នៅថ្ងៃទី០៤ ខែសីហា ឆ្នាំ២០១៥ នេះ ។
តាមប្រភពព័ត៌មានពីមន្ត្រីកងរាជអាវុធហត្ថខេត្តបន្ទាយមានជ័យបានឲ្យដឹងថា ជនសង្ស័យដែលត្រូវបានចាប់ឃាត់ខ្លួនឈ្មោះ ពៅ ធី ហៅហួរ ភេទប្រុស អាយុ១៧ឆ្នាំ មានស្រុកកំណើតនៅភូមិស្រុកមោងប្ញស្សី ខេត្តបាត់ដំបង បច្ចុប្បន្នមកស្នាក់នៅបន្ទប់ជួលស្ថិតក្នុងភូមិក្បាលកោះ សង្កាត់-ក្រុងប៉ោយប៉ែត ខេត្តបន្ទាយមានជ័យ ។ ជនសង្ស័យត្រូវបានកម្លាំងកងរាជអាវុធហត្ថក្រុងប៉ោយប៉ែតចុះប្រតិបត្តិការល្បាតពេលយប់វេលាម៉ោង១០ និង៣០នាទី ថ្ងៃទី០២ខែសីហា ឆ្នាំ២០១៥ នៅក្នុងភូមិសាស្ត្រភូមិក្បាលកោះ សង្កាត់ប៉ោយប៉ែត ក៏ប្រទះឃើញ ដោយមានការសង្ស័យ និងមានប្រភពព័ត៌មានពីប្រជាពលរដ្ឋល្អ សមត្ថកិច្ចបានធ្វើការឃាត់ខ្លួនត្រួតពិនិត្យរកឃើញថ្នាំញៀនប្រភេទមេតំហ្វេតាមីនគ្រាប់ពណ៌ក្រហម មានអក្សរ WY ចំនួន២០គ្រាប់ ដែលជនសង្ស័យបានលាក់ទុកក្នុងខ្លួន និងដកហូតបានលុយខ្មែរចំនួន៣៧ម៉ឺនរៀល, លុយថៃចំនួន៧៣០បាត និងលុយអាមេរិកចំនួន១៥ដុល្លារ ។
ប្រភពដដែលបានបញ្ជាក់ថា នៅចំពោះមុខសមត្ថកិច្ច ជនសង្ស័យបានសារភាពថា ខ្លួនគេពិតជាបានប្រព្រឹត្តអំពើជួញដូរនូវសារធាតុញៀនខុសច្បាប់នេះមែន ការប្រព្រឹត្តនេះជាច្រើនលើកមុនពេលដែលសមត្ថកិច្ចចាប់ខ្លួនបាន ។
ដោយផ្អែកលើចម្លើយសារភាពរបស់ជនសង្ស័យ និងបង្ក្រាបដកហូតបានវត្ថុតាងជាក់ស្តែង ជនសង្ស័យឈ្មោះ ពៅ ធី ហៅហួរ ត្រូវបានកម្លាំងជំនាញរបស់កងរាជអាវុធហត្ថខេត្តបន្ទាយមានជ័យរៀបចំសំណុំរឿងបញ្ជូនទៅសាលាដំបូងខេត្តចាត់ការតាមនិតិវិធីច្បាប់ហើយថ្ងៃនេះ ៕
ចែករំលែកព័តមាននេះ