ខេត្តកំពត ៖ កម្លាំងនគរបាលវរសេនាតូចលេខ៦០១ការពារព្រំដែនគោកបានហាមឃាត់ភាគីវៀតណាមដែលយកគ្រឿងចក្រមកកាយដីកៀកកិតព្រំដែននៅទល់មុខបង្គោល៣០៦ជាប់ភូមិសាស្ត្រភូមិកោះចំការ
ខេត្តកំពត ៖ កម្លាំងនគរបាលវរសេនាតូចលេខ៦០១ការពារព្រំដែនគោកបានហាមឃាត់ភាគីវៀតណាមដែលយកគ្រឿងចក្រមកកាយដីកៀកកិតព្រំដែននៅទល់មុខបង្គោល៣០៦ជាប់ភូមិសាស្ត្រភូមិកោះចំការ ឃុំបឹងសាលាខាងត្បូង ស្រុកកំពង់ត្រាច កាលពីវេលាម៉ោង៩ និង៣០នាទីព្រឹក ថ្ងៃទី៣ សីហា ២០១៥។
ប៉ុន្តែសកម្មភាពដែលភាគីវៀតណាមបានជីកកាយនោះ បើយោងតាមមន្ត្រីនគរបាលវរសេនាតូច៦០១បានឱ្យដឹងថា ភាគីវៀតណាមបានផ្អាកជីកហើយ តែនៅវេលាម៉ោង១រសៀល ថ្ងៃទី៣ សីហា ភាគីវៀតណាមបន្តជីកដីកន្លែងផ្សេងទៀតនៅចន្លោះបង្គោល៣០៧-៣០៨ និងគ្រឿងចក្រមួយគ្រឿងទៀតបានជីកនៅវេលាម៉ោង៣រសៀល ថ្ងៃទី៣ ដដែលនៅចន្លោះបង្គោល៣០៨-៣០៩ ប្រវែង៣ម៉ែត្រ ទទឹង៧ម៉ែត្រ ជម្រៅ២ម៉ែត្រ តែត្រូវបាននគរបាលការពារព្រំដែនខ្មែរហាមឃាត់ឱ្យផ្អាកដែរហើយ។
តាមប្រភពមួយបានធ្លាយពីមន្ត្រីសាលាខេត្តកំពតនិយាយថា អាជ្ញាធរខេត្តកំពត និងខេត្តកៀងយ៉ាងគ្រោងនឹងជួបគ្នានៅចុងសប្តាហ៍ខាងមុខនេះដើម្បីពិភាក្សាគ្នាពីបញ្ហាភាគីវៀតណាមនៅតែបន្តកាយដីនៅកៀកកិតព្រំដែន។
គេបានសម្គាល់ឃើញថា កាលពីចុងខែកក្កដា ២០១៥ នេះ ភាគីវៀតណាមបានយកគ្រឿងចក្រកាយដីធ្វើផ្លូវកៀកនឹងព្រំដែនម្តងហើយម្តងទៀតនៅក្នុងភូមិថ្កូវ ឃុំប្ញស្សីស្រុកខាងលិច ស្រុកកំពង់ត្រាច តែត្រូវបានកងនគរបាលការពារព្រំដែន និងទាហានការពារព្រំដែនចុះហាមឃាត់ ប៉ុន្តែមកដល់ដើមខែសីហា នេះ ភាគីវៀតណាមបន្តកាយដីកន្លែងផ្សេងទៀតទាំងថ្ងៃ ទាំងយប់៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ