ខេត្តកំពង់ស្ពឺ ៖ លោកកែវ សុធា ព្រះរាជអាជ្ញាសាលាដំបូងខេត្តកំពង់ស្ពឺ បានប្រតិកម្មយ៉ាងខ្លាំងជាមួយអ្នកយកព័ត៌មានកោះសន្តិភាពដែលបានសួរទៅលោករឿង មន្ត្រីអង្គការ និងមន្ត្រីកងរាជអាវុធហត្ថលើផ្ទៃប្រទេស
ខេត្តកំពង់ស្ពឺ ៖ លោកកែវ សុធា ព្រះរាជអាជ្ញាសាលាដំបូងខេត្តកំពង់ស្ពឺ បានប្រតិកម្មយ៉ាងខ្លាំងជាមួយអ្នកយកព័ត៌មានកោះសន្តិភាពដែលបានសួរទៅលោករឿង មន្ត្រីអង្គការ និងមន្ត្រីកងរាជអាវុធហត្ថលើផ្ទៃប្រទេស ដែលប្តឹងពីលោកជឿង ថេង ជាមន្ត្រីយោធានៅភូមិភាគ៣ ដែលគេស្គាល់ថា ជាឈ្មួញរកស៊ីដឹកឈើខុសច្បាប់ផងដែរនោះ។
កាលពីរសៀលថ្ងៃទី០៣ សីហា ២០១៥ អ្នកយកព័ត៌មានកោះសន្តិភាពបានសុំសម្ភាសន៍លោកកែវ សុធា ព្រះរាជអាជ្ញាសាលាដំបូងខេត្តកំពង់ស្ពឺ អំពីរឿងមន្ត្រីរបស់អង្គការវ៉ាយអេត និងមន្ត្រីកងរាជអាវុធហត្ថលើផ្ទៃសរុប៦នាក់ ដែលបានដាក់ពាក្យប្តឹងឈ្មោះជឿង ថេង ជាមន្ត្រីយោធានៅភូមិភាគ៣ ដែលជាឈ្មួញរកស៊ីដឹកឈើខុសច្បាប់ បានដឹកនាំកម្លាំងប្រដាប់ដោយអាវុធគ្រប់ដៃប្រុងប្រើប្រាស់កម្លាំងយោធា ដើម្បីរំដោះយកឈើរបស់ខ្លួនដែលត្រូវអង្គការ និងកម្លាំងអាវុធហត្ថឃាត់ចាប់នោះ។
គ្រាន់តែអ្នកយកព័ត៌មានធ្វើការសាកសួរស្រាប់តែលោកកែវ សុធា ព្រះរាជអាជ្ញាសាលាដំបូងខេត្តខឹងឆ្លើយថា រឿងប្តឹងប្តល់គ្នានេះ ខ្ញុំកំពុងធ្វើការសាកសួរបណ្តើរៗតាមនីតិវិធី ហើយកោះហៅសួរម្នាក់ម្តងៗ គឺអ្នកទាំងនោះនៅខេត្តឆ្ងាយៗ ទើបយូរបែបនេះ។ លោកកែវ សុធា បន្តថា ខ្ញុំឆ្ងល់ ថីបានជាអ្នកកាសែតតាមដានរឿងមួយនឹងខ្លាំងម្ល៉េះ ម៉េចខ្លាចខ្ញុំមិនធ្វើការឬអី0x017d7 មិនមែនមានតែមួយរឿងនឹងទេ គឺនៅមានរឿងប្រជាជនច្រើនទៀត ដែលត្រូវដោះស្រាយដែរ។ គ្រាន់តែនិយាយចប់លោកកែវ សុធា ក៏បានចុចទូរស័ព្ទបិទទៅ ដែលសំនួរខាងលើនេះ ហាក់បីដូចជាធ្វើឲ្យលោកព្រះរាជអាជ្ញាក្តៅស្លឹកត្រចៀកខ្លាំងណាស់ សង្ស័យមានអ្វីពាក់ព័ន្ធជាមួយលោកផងក៏មិនដឹង។ ជាធម្មតាអ្នកកាសែតគ្រាន់តែចង់ដឹងអំពីចំណាត់ការរបស់តុលាការចាត់ការទៅលើបុគ្គលម្នាក់នេះ ដោយរបៀបណា ព្រោះរយៈកាលកន្លងមកគាត់ (ជឿង ថេង) សំបូរទៅដោយរឿងអាស្រូវរាប់មិនអស់ទេ គេមិនដែលឃើញច្បាប់ចាត់ការគាត់បានម្តងណាទេ។ ចុះហេតុអ្វី គ្រាន់តែអ្នកកាសែតសុំសំភាសន៏ប៉ុណ្ណឹង បែរជាលោកព្រះរាជអាជ្ញាក្តៅស្លឹកត្រចៀកបែបនេះ0x017d7 រឿងតាមដាន មិនតាមដាន មិនមែនមានតែអ្នកាសែតទេ សូម្បីតែមជ្ឈដ្ឋានប្រជាពលរដ្ឋនៅទូទាំងខេត្តក៏ចង់ដឹងរឿងនេះដែរ។ គួរបញ្ជាក់ផងដែរថា រឿងរ៉ាវចាស់មិនទាន់ទាំងដោះស្រាយចេញផងនោះ កាលពីយប់ថ្ងៃទី០១ សីហា ២០១៥ អង្គការវ៉ាយអេត បានសហការជាមួយកម្លាំងកងរាជអាវុធហត្ថលើផ្ទៃប្រទេសបានព័ទ្ធចាប់រថយន្តរបស់ឈ្មួញរកស៊ីដឹកឈើដុះស្លែឈ្មោះជឿង ថេង ម្នាក់នេះ បានជាង១៨ម៉ែត្រគូបជាថ្មីម្តងទៀត។
សូមរំលឹកថា កាលពីអំឡុងខែមិថុនា ២០១៥ កន្លងទៅ សមត្ថកិច្ចមួយក្រុមដែលមានមន្ត្រីអាវុធហត្ថ និងយោធា រួមទាំងមន្ត្រីអង្គការ និងមេព្រៃផងនោះ បានបើកប្រតិបត្តិការចុះបង្ក្រាបរថយន្តមួយគ្រឿងដែលដឹកឈើខុសច្បាប់ តែត្រូវបានមនុស្សមួយក្រុមចេញមកស្ទាក់ និងរារាំងប្រដាប់ដោយអាវុធគ្រប់ដៃក្នុងន័យប៉ុនប៉ងប្លន់យកវត្ថុតាងឈើល្មើសច្បាប់ពីដៃសមត្ថកិច្ច។ មនុស្សមួយក្រុមនោះ ត្រូវបានស្គាល់ថា មានឈ្មោះជឿង ថេង ជាមេខ្លោងក្នុងការបញ្ជាកូនចៅរបស់ខ្លួនឱ្យធ្វើសកម្មភាពល្មើសនេះ។ ឈើដែលមន្ត្រីយោធាភូមិភាគ៣ ឈ្មោះជឿង ថេង ប្រើប្រាស់អាវុធគំរាមបាញ់សម្លាប់ក្នុងគោលបំណងដណ្តើមយកឈើខុសច្បាប់ទៅវិញនោះ មានចំនួនជាង៦ម៉ែត្រគូប ។ ក្រោយកើតហេតុក្រុមបង្ក្រាបបទល្មើសព្រៃឈើ និងសត្វព្រៃ ដែលសហការជាមួយនឹងអង្គការសម្ព័ន្ធភាពសត្វព្រៃ Wildlife Alliance (WA) រួមមានលោកវរសេនីយ៍ទោ សៀង អ៊ុំ មេបញ្ជាការកងរាជអាវុធហត្ថប្រចាំអង្គការ WA លោកអនុសេនីយ៍ទោ ម៉ិល សារៀម មន្ត្រីអាវុធហត្ថលើផ្ទៃប្រទេស លោកអនុសេនីយ៍ទោ បេ ចំរើន មន្ត្រីកងយោធាភូមិភាគទី៣ លោកឃី ហម មន្ត្រីអាវុធហត្ថលើផ្ទៃប្រទេស លោកគង់ ចិត្រា មន្ត្រីរដ្ឋបាលព្រៃឈើប្រចាំអង្គការ WA និងលោកជន ហុង ជាបុគ្គលិកអង្គការ WA ។ ក្រុមមន្ត្រីទាំងអស់បានដាក់ពាក្យបណ្តឹងចូលអយ្យការអមសាលាដំបូខេត្តកំពង់ស្ពឺ នៅថ្ងៃទី១៥ មិថុនា ២០១៥ កន្លងមក ប្តឹងទៅលើមន្ត្រីយោធាឈ្មោះជឿង ថេង និងបក្សពួក៤នាក់ ពាក់ព័ន្ធទៅនឹងករណី «រារាំងសមត្ថកិច្ចពេលប្រតិបត្តិការប្លន់វត្ថុតាងបទល្មើសព្រៃឈើ និងប៉ុនប៉ងមនុស្សឃាត» ។
គួរបញ្ជាក់ថា ក្រុមសមត្ថកិច្ចរងគ្រោះបានបើកប្រតិបត្តិការចាប់រថយន្ត១គ្រឿង ម៉ាក Hyundai ដែលកំពុងតែដឹកឈើផ្ចឹកអារប្រភេទលេខ១ ចំនួន៧៦២សន្លឹក ស្មើនឹងជាង៦ម៉ែត្រគូប កាលពីវេលាម៉ោងជាង១១យប់ ថ្ងៃទី១០ មិថុនា ២០១៥ ស្ថិតក្នុងភូមិកន្ទួត ស្រុកឪរ៉ាល់។ អ្នកបើករថយន្តបានរត់គេចខ្លួនបាត់ ពេលនោះក្រុមសមត្ថកិច្ចបាននាំយករថយន្ត និងវត្ថុតាងទៅរក្សាទុក។ ប៉ុន្តែបន្ទាប់ពីចេញពីកន្លែងកើតហេតុបានប្រហែល១០០ម៉ែត្រ ស្រាប់តែឈ្មោះជឿង ថេង និងបក្ខពួកចំនួន៤នាក់ផ្សេងទៀត បានបើករថយន្ត១គ្រឿងម៉ាកវីហ្គូទៅរារាំង ហើយបានចុះពីលើរថយន្តនោះ ដោយមានកាំភ្លើងខ្លីម៉ាកឡុក ភ្ជង់គំរាមពួកលោក និងស្រែកឲ្យប្រគល់រថយន្ត និងឈើឲ្យទៅគេវិញ។ មន្ត្រីយោធាឈ្មោះជឿង ថេង នេះ គឺសំបូរទៅដោយរឿងអាស្រូវជាច្រើននាពេលកន្លងមក ដូចជាវ៉ៃមន្ត្រីយោធាខាងអធិការកិច្ចក្រសួងការពារជាតិ និងត្រូវស្ត្រីម្នាក់ប្តឹងពីបទរំលោភសេពសន្ថវៈ រឿងឈ្លោះគ្នាជាមួយមន្ត្រីអាវុធហត្ថខេត្ត រឿងមិនឱ្យឃាត់ចាប់ឡានដឹកឈើគ្រញូង រឿងប្រើអាវុធគំរាមសម្លាប់នគរបាលសេដ្ឋកិច្ចខេត្ត ក្នុងការដែលមន្ត្រីនគរបាលទាំងនោះបានស្ទាក់ឃាត់ឡានដឹកឈើធ្នង់របស់គេជាដើម។
កោះសន្តិភាពបានព្យាយាមសុំការពន្យល់បកស្រាយពីលោកជឿង ថេង ដែលរងនូវការចោទនេះដែរ តែទូរស័ព្ទចូលមិនមានអ្នកទទួល៕
ចែករំលែកព័តមាននេះ