ខេត្តបន្ទាយមានជ័យ ៖ លោកអនុសេនីយ៍ត្រីភ្លឹង វិចិត្រ នាយផ្នែកសណ្តាប់ធ្នាប់ចរាចរណ៍នៃអធិការដ្ឋាននគរបាលស្រុកព្រះនេត្រព្រះបានឲ្យដឹងថា កាលពីវេលាម៉ោង៤ និង១៥នាទីទៀបភ្លឺ ថ្ងៃទី០៤ សីហា ២០១៥ នៅលើកំណាត់ផ្លូវជាតិលេខ៦ មុខការិយាល័យអប់រំស្រុកព្រះនេត្រព្រះ ស្ថិតក្នុងភូមិជប់វារី ឃុំជប់វារី ស្រុកព្រះនេត្រព្រះ មានគ្រោះថ្នាក់ចរាចរណ៍រវាងម៉ូតូកង់៣កែច្នៃបុកជាមួយម៉ូតូសណ្តោងរទេះដឹកសាច់ជ្រូកបណ្តាលឲ្យបុរសម្នាក់ឈ្មោះកូវ គឿយ ភេទប្រុស អាយុ៣៧ឆ្នាំ នៅភូមិជប់ ឃុំជប់វារី ស្រុកព្រះនេត្រព្រះ ដាច់ជើងទាំង២ ។
បុរសរងគ្រោះបើកម៉ូតូម៉ាកហុងដាធុនសេ១០០ ពណ៌ក្រហម ស៊េរីចាស់ សណ្តោងរទេះដឹកសាច់ជ្រូក ចំណែកម៉ូតូកង់៣កែច្នៃធុនសេ១០០កូរ៉េ ពណ៌ក្រហម ពាក់ស្លាកលេខភ្នំពេញ 1F.8530 បើកបរដោយឈ្មោះ យ៉េន ចាន៉ឌី ភេទប្រុស អាយុ២៩ឆ្នាំ នៅភូមិក្បាលស្ពាន២ សង្កាត់ប៉ោយប៉ែត ក្រុងប៉ោយប៉ែត ។
លោកនាយផ្នែករូបនេះបានបញ្ជាក់ថា មុនពេលកើតហេតុ អ្នកបើកម៉ូតូកង់៣កែច្នៃ បានធ្វើដំណើរពីទិសខាងកើតទៅលិច ពេលមកដល់ចំណុចកើតហេតុបានបើកវ៉ាជែងរថយន្តនៅពីមុខធ្វើឲ្យរេចង្កូតទៅបុកម៉ូតូសណ្តោងរទេះដឹកសាច់ជ្រូកមកលក់នៅផ្សារចក្រី ដែលបើកក្នុងទិសដៅបញ្ច្រាសទិសគ្នាពីលិចទៅកើតពេញទំហឹងបណ្តាលឲ្យក្រឡាប់រទេះ ឯអ្នកបើកបរឈ្មោះ កូវ គឿយ រងរបួសបាក់ជើងទាំង២ ត្រូវបានបញ្ជូនទៅព្យាបាលនៅមន្ទីរពេទ្យក្បែរនោះ ។
មូលហេតុនៃគ្រោះថ្នាក់នេះ មកពីអ្នកបើកម៉ូតូកង់៣ច្នៃបើកវ៉ាជែងមិនប្រយ័ត្ន ក្នុងស្ថានភាពគ្រោះថ្នាក់ អ្នកបើកបរម៉ូតូបង្កហេតុពេលនេះកំពុងជួយមើលអ្នករងគ្រោះនៅមន្ទីរពេទ្យ៕
ចែករំលែកព័តមាននេះ